تأخرالكلام عند الاطفال من الحاجات اللي بتسبب قلق عند اي أم وتبدأ بمقارنة طفلها بالأطفال اللي في نفس سنه , بس لازم كل أم تبقي عارفة ان اي مهارة الطفل بيكتسبها بيختلف توقيت بدايتها من طفل لاخر حسب كذا عامل .
طب امتي نقول ان الطفل متأخر في الكلام ؟؟
لو وصل لعمر 12 شهر ومقدرش يصدر اي صوت يدل علي الكلام , او لو وصل لعمر 18 شهر ومنطقش اي كلمة زي ماما او بابا او اي اسم تاني وبعض الأطباء بيزودوا السن ده لسنتين , او لو وصل لعمر 3 سنين ولسه مبيقدرش يعبر عن نفسه بشكل واضح في الوقت دا لازم الأم تعرض طفلها علي الطبيب للكشف عليه وعمل الفحوصات لمعرفة السبب اللي ممكن يكون واحد من الأسباب دي :
– مشكلة في السمع سواء خلقية او نتيجة التهابات الأذن المتكررة .
– اصابة الطفل بالشفة الارنبية او الحنك المشقوق .
– اصابة الطفل باللسان المربوط .
– اصابة الطفل بمتلازمات مرضية زي متلازمة داون .
– اصابة الطفل بالتوحد .
– اذا كان الطفل مصاب بصعوبات التعلم .
– الشلل الدماغي او اصابات الدماغ .
– او لأسباب اجتماعية زي عدم تحدث الوالدين مع طفلهم او ان الطفل يكون عايش في بلد اجنبية لغتها مختلفة عن لغة والديه
