أفتاكسات زوج صايم
إيمان العادلى
الحلقة التاسعة عشر
إلهام وممدوح
إلهام : أيه يا دوحة بقول حخطف نفسى كده زى العيال وأخرج أروح لمامتى فى العيد وأقول ل سامية أختى تيجى معايا
ممدوح : والله عال العال كله بياخد قررات وبينفذها مع نفسه ومفيش راجل هنا ناخد رأيه يا هانم
مفيش خروج من البيت فاهمة
إلهام : إهئ إهئ مش فاهمة ها
وحنزل أروح ل ماما وحكلم سامية تيجى معايا
هو أيه ده مقدرتش على العيال عاوز تتحكم فيا إهئ إهئ
ممدوح : تحكم ايه يا هانم يا عاقلة
أنا خايف على مامتك وعلى مامتى دول ناس كبار فى السن المفروض نخاف عليهم ومنروحش لهم
شفتينى روحت لأمى ولا لحد من أخواتى
إعقلى يا إلهام وخافى عليهم
كلميها فون وفهميها وهى أكيد فاهمة وخايفة على نفسها
إلهام : بس أنا نفسى أروح ل ماما يا ممدوح وأعيد عليها دى وحشتنى ومشفتهاش من قبل رمضان
ممدوح : يا حبيبتى لازم تتحملى علشان تحميها وتكون بخير
أستهدى بالله كده وقومى كلميها وعقلى أختك سامية هى كمان
وأنا حقوم أجهزلك الفسيخ والرنجة وأحط تكات ممدوح وحركاته ومستنيك يا حبيبتى فى المطبخ
إلهام : طيب يا حبيبى حكلم ماما فون وأفهمها أنى خايفة عليها وأكلم سامية أفهمها برضه وأجيلك نجهز الغدا على ما العيال يجيوا
ممدوح دخل المطبخ وهو مبسوط لأنه عرف يقنع إلهام واليوم نفد من النكد اليومى
وبدأ بتجهيز الفسيخ والرنجه وطبعا منسيش يحط أفتكاساته وتكاته
إلهام : دوحة حبيبى كلمت ماما وفهمتها لاقيتها فعلا خايفة حد يروح لها زى ما قلتلى يا حبيبى وسامية كمان أقتنعت بكلامى
ممدوح : طيب تمام تعالى بقى طلعى الأطباق على السفرة وجهزيها على ما أكلم الولاد وأشوفهم أتأخروا ليه
إلهام : عيونى يا حبيبى
واوو ايه تقطيعة الفسيخ اللى تجنن دى وكمان مشهيصه طحينة يا تكاتك يا دوحة
والرنجه كمان مقطعها هههههه بالمسطرة ( برضه منسيش أنه مهندس ) ومهندس لنا الرنجة
والبصل يا لهوووى يجنن مرصوص ازاى كده يا حبيبى
وأيه الطبق الغريب ده اللى فيه طحينة وشكله غريب عن الطحينة
وفين البطارخ اللى أنا جيباها
مممدددوح فين البطارخ يا حبى ده انا جايبها مخصوص العيال بيحبوها موووت
وأيه الطبق العجيب ده
ممدوح : عجبك التقطيع والتجهيز يا روحى وشفتى رصة البصل فى الطبق
مزاج يا حبى وتاتشات الشيف ممدوح
إلهام : برضه مقلتليش فين البطارخ وايه الطحينة الغريبة دى
ممدوح : ما هو أنا بقى عملت طبق الشيف ممدوح
حتاكلوه وتتجننوا من حلاوته
ضربت البطارخ مع الطحينة والليمون وبصلية فى الخلاط وطلع الطبق الجميل ده
إلهام : يا لهوووووووى يا مممدوووح
البطارخ راحت
أه يانى يا إلهام وعمايل جوزى فيا
وأفتكاساته
أقول للعيال أيه
بكرة حنعرف العيال عملوا ايه
وأفتاكسة ممدوح أخبارها ايه
أستنونى
