رسالة إلى زوجه الابن ..

بقلم.. رانيا اسامة

عزيزتي
رحلتك الحقيقية كشخص مسؤل عن آخرين… بتبدأ يوم خروجك من بيت اهلك…

رحله لازم تكوني مستعده لها كويس جدا…
واول استعداد هو إخلاص النيه…
ولو فاكرة انك مسؤله عن جوزك وولادك وبيتك والاكل والنظافه… الخ من مسؤليات حياتيه تبقى قاصرة الفكر.. ومحدودة الافق

أمور كتير لازم تكون في نيتك قبل خطوة الارتباط منهم اهل زوجك…. أسرتك الجديده…
ف…..

لو مش في نيتك العون على طاعه الله… خليكي فبيت اهلك
لو مش فنيتك البر والعون على صله الرحم… خليكي فبيت اهلك
لو مش فنيتك العمااااار… والصلاح… والاجتهاد لراحه أشخاص اخرين هيبقوا عيلتك… برضو خليكي فبيت اهلك

اريح لك واريح لناس هتوجعيهم معاكي…..

لو مش عون لزوجك ع الطاعه… وبر اهله يبقى بتخسريه.. وتخليه يخسر دنيا وآخرة.

لو مش قادرة تتقبلي انك بقيتي عضو جديد فاسره تاني لازم تحافظي على علاقتهم… وتبقى قادرة تكوني اخت لناس مش من دمك
و قادرة تكوني صديقة… لناس جداد عليكي
و قادرة تكوني بنت لام وأب مخلفوكيش
يبقي برضو… خليكي فبيت اهلك..

لو محبتيهوش…. لدرجه انك تسعي انه مايخسرش اهله
يبقي سبيه… لواحده تاني تعينه على الجهاد ده…
نعم انه جهاد… وشتات نفسي بيعيشه الزوج اذا ما قررت الزوجه ان تخيره
انا او اهلك
يارب تكون الايام المفترجه دي فرصة لبنات تكتير قطعت ازواجها عن أهلهم…
زوجات محتاجات أشد الاحتياج لاعاده النظر
زوجات في أمس الحاجه للأجر… والارتقاء بالنفس.
انتي مش ملزمة تحبيهم….
ولا ملزمة تعملي فوق طاقتك
بس ملزمة تعيني زوجك على البر..
ملزمة ماتحرميش ام من ابنها
ملزمة ماتحرميش جده من احفادها
ملزمة متتدخليش فمساعدته الماديه لاهله
ملزمة تعملي اللي بتبقى عاوزه اخوكي يعمله مع أهله…

ملزمة تتقي الله في أهل زوجك… ليبارك لك الله في أسرتك

دامت بيوتكم عامرة مستقرة