بسكويت الجبنة الرومى

 

 

وطريقته سهله جداً

 

المقادير..

 

كوبايتين من الدقيق المنخول

كوباية من الجبنة الرومى المبشوره ناعم

نص كوباية من الحليب

معلقتين كبار من الزبدة الباردة بدرجة حرارة التلاجة

معلقة صغيرة من البيكينج بودر

رشة ملح

بيضة واحدة

 

الطريقة..

 

بنضيف الزبدة على الدقيق ونفركهم سوى بإيدينا لغاية ما يبقى الدقيق زى الرمل المبلول.

 

بعدها بنضيف الجبنة الرومى ومعلقة البيكينج بودر ورشة الملح ونقلب كل المكونات مع بعض كويس جدا.

 

وبعدين بنضيف البيضه ونقلبها مع الخليط لغاية ما تتجانس معاه تماما.

 

وآخر حاجه بنضيف نص كوباية الحليب بالتدريج لغاية ما تتكون معانا عجينه متماسكة وسهلة فى التشكيل وما بتلزقش فى ايدينا.

 

بنسيب العجينة نص ساعه فى التلاجة ترتاح وبعدين نطلعها ونفردها بين كيس بلاستيك نضيف عشان تتفرد معانا بسهولة ونوصلها لإرتفاع وسمك حوالى نص سم او أكتر شوية.

بعدين نبتدى نقطعها بأى أشكال إحنا حابينها ونرصها فى صينية أو صاج مدهونين زيت

وندهن الوش بخليط مكون من معلقة من الحليب عليه رشة صغيرة جداً من النسكافيه ورشة صغيرة جدا من السكر ونقلبهم كويس وندهن بيهم وش البيسكوت كله ونرش سمسم أو حبة البركة على الوش حسب الرغبة وممكن نضيف جبنة رومى أو موتزاريلا .

وندخلهم الفرن على درجة حرارة ١٦٠ أو ١٧٠ لغاية ما ياخدوا لون ذهبى من فوق ومن تحت.

وكده خلاص نبتدى ناكل بقى

وبالهنا والشفا