أفتاكسات زوج صايم

 

 

إيمان العادلى

 

الحلقة الثامنة عشر

 

إلهام وممدوح

 

إلهام : بتقول ايه يا ممدوح عديتى مخصمومة من مصروف البيت للشهر الجاى

 

ممدوح : يا حبيبتى قولى طيب صباح الخير يا حبيبى

كل سنة وأنت طيب يادوحة وتعملى لنا كوبيتين شاى وطبق بسكوت وكحك من إيدينا الحلوة دى نفطر بيهم يوم العيد

ولا نمتى وصحيتى على النكد

 

إلهام : وهو كان تمر فيك تعبى طول رمضان ووقفة المطبخ شهر بحاله وفطار وسحور وشاى وقهوة أنت وعيالك

أخرتها تقولى عديتك مخصمومة زيهم

ليه أن شاء الله وهو انا كنت جبت لبس العيد ولا خدت منك حساب الكوافير أنا كمان زى ما عيالك عملوا إهئ إهئ

 

ممدوح : يا حبيبتى أحنا فى العيد والناس صاحية بتضحك فى وش بعض وبيغنوا العيد فرحة وأنتى صاحية على النكد برضه

الله يرحمه سعد زغلول لما قال مفيش فايدة

 

إلهام :إهئ إهئ ما هو كله منك بتعشق تنكد عليا حتى فى العيد ومستخسر فيا عيدية وكلمتين حلوين فى العيد بعد تعبى شهر كامل

 

ممدوح : ههههههه يا حبيبتى بهزر معاكى هو أنا أقدر برضه أزعلك

عديتك ياروحى من غير خصم مصروف البيت ها مبسوطة يا قلبى

 

إلهام: يووة يا دوحة كان لازم هزراك البايخ ده على الصبح

حقوم بقى يا حبى أجهز فطار العيد يا حبى هههههه وطبق الكحك والبسكوت من عمايل إديا

 

ممدوح : عمايل إدينا يا روحى متنسيش

 

خالد ورهف : صباح الفل يا بابا كل سنة وأنت طيب يا حبيبى

ماماا أعملنا معاكى شاى باللبن يا حياتى وطبق بسكوت

 

إلهام : عنيا يا حبايبى حجهز الفطار بسرعة

 

خالد : بابا يا حبيبى حنزل شوية مع أصحابى نتمشى فى الشارع

عيد بقى ياحبيبى

 

ممدوح : مفيش نزول يا خالد انا قلت كده علشان كورونا

ما اهو انا ومامتك فى البيت مخرجناش ولا روحنا عند جدتك ولا عند ماما

مفيش خروج من البيت يا خالد

 

خالد : يوووة يا ماما يا ماااااما تعالى شوفى

 

إلهام : فى ايه ادى الشاى والبسكوت أهو

 

خالد : بابا مش راضى ينزلنى أتمشى مع صحابى شوية فى الشارع زهقت يا ماما وصحابى أتفقت معاهم وحيعدوا عليا أقولهم ايه يعنى بابا حبسنى فى البيت

يرضيك يا ماما يضحكوا عليا

 

ممدوح : والله عال وكمان أتفقت معاهم وظبطت الليلة من غير إذنى يا سى خالد طيب ايه رأيك ما أنتش نازل

 

إلهام : خلاص يا ممدوح سيبه ينزل شويه مع صحابه وحيلبس الكمامة والجفلز وياخد باله

مش كده يا خالد

 

خالد : اه والنبى يا بابا مش حقلع الكمامة وحاخد الكحول فى جيبى

والنبى والنبى يا بابا

 

ممدوح : يووووة على حنية قلبى دى أللى مضيعانى معاكم

خلاص أنزل بس تاخد لبالك وتعمل تباعد بينك وبين الناس مترين على الأقل وأوعاك تشرب حاجة من الشارع سامع

 

خالد : حاضر يا حبيبى ربنا يخليك ليا

 

رهف : عينى يا عينى على الحنية

طيب بص يا حبيبى أنا كمان حنزل أتمشى مع صحابتى وناكل جلاس بس مش حندوب فى قلوب الناس هههههه

 

ممدوح : ما هى كملت ياهانم أنتى وعيالك

أتفضلى أخرجى يا رهف بنفس تعليمات خالد سامعة

 

رهف : حاضر يا حبيبى حروح ألبس صحابى قربوا يعدوا عليا

 

ممدوح : والله عال حتى رهف مظبطة صحابها

الا انت يا دوحة اللى قاعد ومحظور

 

إلهام : حبيبى يا حبيبى يا روحى

ممكن أروح شوية عند مامتى وحلبس الكمامة زى العيال

 

ممدوح : أيه بتقولى ايه يا هانم

 

بكرة حنعرف ممدوح حيعمل أيه مع إلهام

أستنونى