كرات البطاطس باللحمة المفرومة والبشاميل

إيمى عاطف

 

المقادير:

• نص كيلو لحمة مفرومة

• 1 بصلة متوسطة مفرومة

• رشة / ملح، فلفل أسود، بابريكا، قرفة، جوزة الطيب (اختياري)

• 5–6 بطاطس متوسطة الحجم (مسلوقة بقشرها)

• شوية بقدونس مفروم

 

للبشاميل:

• 3 معالق كبار دقيق

• 3 معالق كبار زيت

• 3 كوبايات حليب

• نص مكعب مرقة دجاج (اختياري)

• ملح وفلفل أسود

 

للوجه:

• جبنة موتزاريلا مبشورة

 

⸻

 

طريقة التحضير:

1. شوّحي البصلة في شوية زيت لحد ما تصفر، وضيفي اللحمة وبهريها (ملح، فلفل، قرفة…) وسيبيها تستوي.

2. اسلقي البطاطس بقشرها، ولما تستوي، قشريها واهرسيها كويس جدًا.

3. بهري البطاطس (ملح، فلفل أسود، بابريكا، بقدونس مفروم).

4. حضّري البشاميل:

• شوّحي الدقيق في الزيت شوية

• نزّلي بالحليب تدريجيًا مع التقليب

• ضيفي البهارات والمرقة، وقلبي لحد ما يتقل

5. خدي حتة بطاطس مهروسة، افرديها على إيدك، وحطي جواها شوية لحمة مفرومة

وغلّفيها كويس على شكل كورة.

6. في صينية فرن، افردي معلقتين كبار من البشاميل تحت، ورصي كرات البطاطس

7. صبي باقي البشاميل على الوش، وادخلي الصينية الفرن

8. قبل ما تشغلي الشواية، طلّعي الصينية، رشي الموتزاريلا على الوش

9. دخليها تاني تحت الشواية لحد ما تاخد لون ذهبي حلو.