سر من أسرار المكرونة
إيمى عاطف
لو هتعملى اى نوع مكرونة بالصلصة هيبقى فى شوية تكات بسيطة هتنقل الطعم فى حته تانيه خالص
المكرونة اسلقيها ٨٠ فى الميه علشان تكمل تسويه فى الصلصة وشيلى كوبايه من ماية سلق المكرونة هنحتاجه بعدين واوعى تغسلى المكرونة بعد السلق
فى الخلاط حطى الطماطم وعليها بصلة مكعبات وقرن فلفل حار او بارد حسب الرغبة حطى معلقة ثوم مقطع فى الزيت ولما يصفر انزلى عليه بمعلقة من معجون الطماطم ومعلقة خل قلبى وانزلى بعصير الطماطم ضيفى رشة زعتر وفلفل اسود وبابريكا والملح ونص معلقة صغيرة سكر واتركيها لحد ما تتسبك تماما والزيت يطلع على وش الصلصة وشمى الريحه بقى يا عسسسل
ضيفى كوبايه من ماية سلق المكرونة تغلى مع الصلصة بعدين انزلى عليها بالمكرونة قلبيها كويس واقفلى الناااار علشان تفضل جوسى وماية سلق المكرونة هتدى الصلصة قوام سميك
جربوها جميلة جدا مش هتبطلوا تعملوها قدموا المكرونة مع المشويات او البانيه أوالبطاطس المقليه وبألف هنا وعافية
