سر اللحمة المسلوقة

إيمى عاطف

 

ماهو سلق اللحمه مش حته لحمه وشويه ميه بهارات دي لحمه يعني لازم تتعامل بطريقه ارقي من كده

✅تكنيك سلق اللحمه✅

 

👈خدعوك فقالوا إن الملح مع اللحمه م الاول بيأخر تسويتها

 

اولا كده من واقع خبرتي احب اقولكم أن اضافه الملح مع اللحمه من الاول مش بيأخر سواها خالص ولا بيفرق بالعكس بتكون متملحه وجميله وليها طعم

 

👈اول حاجه نحضر ميه مغليه علي جنب

 

👈هنشوح اللحمه ف معلقه صغيره سمنه بلدي مع فص مستكه اول مايسيح ننزل باللحمه. وعليها رشه فلفل اسود لا تكاد تري بالعين المجردة

 

👈تاخد صدمه من كل الجوانب ننزل عليها بميه مغليه لااازم تكون بتغلي مينفعش ميه بارده هتخلي اللحمه تجرمز يعني تشد ومتستويش كويس وكمان لون الشوربه وريحتها مش هتكون احسن حاجه

 

👈تغلي كام غلوه كده نروح نلم الرغاوي أو الريم اللي هايظهر علي وش الحله عشان الشوربه تكون صافيه وشفافه كده ونضيف الملح وعودين كرفس

 

👈بعد ما نشيل الريم ننزل بورق اللورا والحبهان وكام واحده فلفل اسود حب مش مطحون بقا نركز

 

اسمعك ياللي بتقولي كنا شوحناهم مع اللحمه لاء يا فالحه كده ليها ريحه وفي التشويح ليها ريحه تانيه انا عاوزك تجربيها كده المرادي تحسي الاكله بيور اكتر

 

وبردو اسمعك ياللي بتقولي كنا ضفناهم من اول ما حطينا الميه اقولك لما تيجي تشيلي الريم هيتشالو معاكي وهتحطي توابل تاني 👇

👈مع نص معلقه معلقه صغيره سكر ا تمام اوي

 

هتقولوالي والطماطم والبصل اللي حابب يحط براحته لكن كتغيير جربو الطريقه دي ودوقو الطعم الاصلي بتاع اللحمه منغير بهارات ولا اضافات كتير هتلاقوه احلي كتيييير

 

تغلي عشر دقائق مع بعض علي نار عاليه بعدين نوطي النار شمعه هتاكلو حته لحمه دايبه وطريه ومزبده وكل انسجتها مستويه تتاكل بالمعلقه من حلاوتها

يللا بقا رغيف وحته لحمه ملبسه كده و سخنه ورشه ملح وفلفل