طواجن المكرونة باللحمة المفرومة والفراخ

إيمى عاطف

المقادير:

• 1 كيس مكرونة قلم

• 250 جم لحمة مفرومة

• 1 بصلة كبيرة مفرومة

• 1 قرن فلفل حار (اختياري)

• 500 جم طماطم معصورة ومصفاة

• 1 ملعقة كبيرة صلصة طماطم

• رشة سكر

• رشة زعتر

• ¼ ملعقة صغيرة قرفة

• ملح وفلفل حسب الرغبة

• 1 ملعقة كبيرة زيت

طريقة التحضير:

أول حاجة هنعصج اللحمة، هنشوح البصلة في شوية زيت لحد ما تذبل، بعدين نضيف اللحمة المفرومة ونفضل نقلبها لحد ما تستوي، بعدها نحط الملح والفلفل ورشة بهارات ورشة قرفة خفيفة، ونضيف الفلفل الحار عشان يديها طعم رائع.

بعد كده نضرب الطماطم في الخلاط ونصفيها، في حلة على النار نحط شوية زيت يسخن، بعدين نضيف عصير الطماطم ورشة السكر والملح والفلفل والزعتر ومعلقة الصلصة ونسيبها تغلي دقيقة واحدة بس، ونطفي النار.

نجيب الطاجن وندهنه زيت، ونرص اللحمة المعصجة في القاع ونساويها كويس، بعدين نحط المكرونة ناية من غير سلق، ونضيف عليها الصلصة الساخنة، وبعدها نزود مياه مغلية لحد ما يدوب تغطي المكرونة بس، ونغطي الطاجن بورق فويل.

ندخل الطاجن فرن سخن جدًا على درجة حرارة عالية لمدة 30 دقيقة، بعدين نطلعه ونسيبه يهدى شوية قبل التقديم، وبعدها يتقلب ويتقدم بأحلى شكل وطعم، وبالهنا والشفا!

لو حابة تعمليه بالفراخ بدل اللحمة:

هنبدل اللحمة المفرومة بقطع فراخ صغيرة (يفضل صدور مخلية)، ونتبلها بالملح والفلفل ورشة زعتر وبهارات فراخ، ونتبع نفس الخطوات لكن بدل ما نعصج اللحمة، هنشوح الفراخ في شوية زيت لحد ما تاخد لون ذهبي، وبعدها نكمل باقي الخطوات بنفس الطريقة.