أنا أهلي انفصلوا من زمان اوى. أبويا طلق أمي وسابنا في الغربه في دولة خليجية

. أمي كانت تشتغل هناك واتجوزت تاني بعدها بسنتين تقريبا.

كان عندي أقل من 3 سنين لما اتجوزت. اختي الاكبر مني كانت

أقل من 5 سنين. احنا الاتنين وعينا عالدنيا لقينا نفسنا عايشين

في بيته نناديه بابا وكان فعلاً نعم الأب والمربي والموجّه. بعد

كدا جم كمان أخويا واختي اخر العنقود وعمره ما فرق بيننا احنا

الاربعة أو حسسنا اني انا واختي الكبيرة مش من صلبه.

في نفس الوقت استمرت علاقتنا بأبويا البيولوجي كويسه

خاصه بعدما رجع مصر نهائي. مكنش بيصرف علينا لكن عالاقل

كان بيبقى بيننا تواصل بالتلفون طول السنة وكنا نزوره في

الاجازات لما ننزل مصر.

المهم عدت السنين والحمدلله اتجوزت ومن شهرين بس خلفت

ابني وسميناه انا وجوزي على اسم بابا.

للأسف متوقعتش ردة الفعل تبقى وحشه كدا اوى من الحاج

أبويا البيولوجي. سمعني كلام زي السم وقالي مش هيستقبل

ابني ولا عاوز يشوفه الا لو غيرت اسمه. ومش هوا بس أهله

كلهم زعلوا مني وقاطعوني عماتي وولادهم كلهم.

حاولت أفهمهم ان الاسم مجرد اسم حتى كدبت عليهم وقلتلهم

جوزي اللي اختاره وصدف انه نفس اسم جوز أمي بس لا حياة

لمن تنادي.

قلت لنفسي اسيبهم شويه تهدى النفوس وعدت شهرين اهو

وحاولت تاني معاهم وبرضه نفس ردة الفعل.

هوا انا غلطانه؟ طيب ايه الحل؟ خلاص انا كمان اسيبهم

براحتهم ونفضل كدا ماليش علاقه بيهم ولا ايه الحل؟

 

 

رد بريد قراء بوابة العاصمة

والله مجرد استخدامك لوصف والدك الحقيقى

( بأبويا البيولوجى) كفاية إنه يخليكى ما تسأليش

ولا تفكرى فى الموضوع لان انتى كرمتى الراجل

اللى ربى وكبر مش واحد كان مجرد اسم فى

شهادة الميلاد لأ وليه عين هو وإخواته يزعلوا

والله انا شفت بنت أجنبية زوج والدتها اللى رباها

بس كان والدها الحقيقى على تواصل معاها يوم

فرحها والدها الحقيقى سلمها لزوج امها يسلمها

للعريس وقال تقدير لتعبه معاها وتربيته ليها

لكن احنا نرمى وعايزين نحصد على الجاهز