السلام عليكم ورحمة الله وبركاته انا عندى مشكلة وعاوزة اراء حكيمة من غير ما حد يقولى اتطلقى لأن ظروفى مش هينفع

 

انا متجوزة بقالى سنة وبشتغل جوزى زى اى راجل فيه مميزات وعيوب اتجوزنا صالونات وهو كان مطلق ومعاه بنت مع مامتها وفضل بعد الانفصال من غير جواز ٧ سنين لأنها بهدلته محاكم ومصاريف

المهم من تانى شهر جواز واحنا تقريبا فى خصام مستمر بمعنى ممكن يعمل حاجة غلط ولما ازعل يسيبنى بال ٣ اسابيع والشهر لحد ما انا اروح واكلمه وفهمته كتير أن فترة خطوبتنا كانت قصيرة ومينفعش أننا كل مدى بنبعد مش بنقرب مفيش فايدة بيرمى اللوم عليا انى انا اللى باخد جنب طب ماهو انت اللى غلطان مش من حقى ازعل مستاهلش انك تخاف على زعلى وتراضينى حتى بكلمة كويسة مفيش استجابة .. كلمته فى عيب فيا طيب لا طب بعمل حاجة تضايقك شكلى لبسى اهتمام بنفسى لا كله تمام يقولى المشكلة انك بتاخدى جنب وانا مبحبش اتكلم لما يكون فى مشكلة عشان منتخانقش قولتله يعنى نردم المشكلة ونخلى فى بعد وجفا وتراكمات عشان انت مش عاوز تتكلم ف المشكلة ميردش عليا

طول الوقت عينه ف التليفزيون أكلمه ف اى حاجة ميردش ولو رد بعد عذاب بكلمة ويقفل ويكمل فرجة ع التليفزيون بالنسباله ادمان

اغلب مشاكلنا تافهة ولكن المشكلة الأساسية اللى بتتكرر أنه مثلا شغلى جنب شغله ب ٥ دقائق مثلا اتحايلت عليه ييجى ياخدنى لانه بيروح بااوبر بدل مااتبهدل ف المواصلات كانت النتيجة كدب مستمر منه يبقى خارج ف نفس معاد شغلى ويقول انا ادامى ساعة واجى ويروح يقعد عند أمه عشان ميروحنيش معاه طب ليه معرفش كذلك برضو لما يرجع من شغله بدرى برضو بيكدب عليا ومبيرضاش يقول إنه جه مع أن ولا بحاسبه راح فين ولا جه منين ولا اعرف عنه حاجة حتى فلوسه ايه وكام ويعمل ايه معرفش ولا كل يوم مثلا بيعدى على مامته ف ازعل لانى مستوعبة أنها ست كبيرة وحقها وهو الوحيد ف اخواته اللى بيقوم على طلباتها ومعنديش مشكلة ف كدا .. إهمال فظيع افضل طول اليوم ف شغلى لا يسأل ولا يتصل ولو اتأخرت ولا يفكر يشوفنى فين ولا حصلى ايه عاتبته بالراحة على ده يتعدل يومين وبعدها نرجع تانى حتى العلاقة بيننا هى مرة كل شهر ونص ونتخانق بعدها ونفضل بالشهر ونص مفيش تعامل حتى لما كنت بتابع مع الدكتورة عشان الحمل نفس الكلام لما الدكتورة زهقت وانا تعبت من العلاجات وزن أهله ليه مخلفناش لحد دلوقتى مش ببقى عارفة ارد أقوالهم ايه هجيبه لوحدى انا يعنى وهو بيتبارد كأن محصلش حاجة وعايش حياته مش فارقة معاه

كل اللى يعرفه أنه يرمى مصروف الشهر وبس فهمته كذا مرة أن الحياة مش قرشين ترميهم وان الجواز مودة ورحمة مفيش نتيجة اشتكيت لأخته مفيش نتيجة مش لاقية حل معاه وحقيقة نفسيتى تعبت وبقيت بطلع عصبيتى ف شغلى على زمايلى وعلى أهلى من كتر الكبت اللى انا فيه

 

رد بريد قراء بوابة العاصمة

اوعي تخلفي منه دا بني آدم مريض هيتعبك نفسيا واظن كدا اكيد عرفتي من اسلوبه مراته أطلقت لي

ليه بترجعي مواصلات؟

ما تركبي اوبر زيه

الكداب للاسف ملوش حل طبع زفت الله يكون في عونك

بس تجاهليه متحسسيهوش إنه حد مهم ولا انت فين ولا حاجه يمكن يتغير