أفتاكسات زوج محظور

 

 

إيمان العادلى

 

الحلقة الأربعون

 

(الجزء الثانى ) أفتاكسات زوج صايم

 

إلهام وممدوح

 

بعد مشاحنات وحبة فستاكنات من إلهام واه يانى بتشك فيا يا مجنون

ومصالحات وبشتكنات من ممدوح

أتصالحوا الحمد لله و٠٠٠٠٠٠

 

إلهام : صباح الفل يا حبيبى إصحى بقى عملتلك الفطار بقينا الظهر

 

ممدوح : صباح الخير يا حبيبتى

أكييد مصحيانى بدرى كده عاوزة طلبات من برة وكالعادة العيال نايمين ومفيش غيرى أللى شقيان

 

إلهام : بدرى ايه يا راجل ده أحنا الساعة 1 الظهر والعصر داخل علينا

 

ممدوح : ما يخش ياستى أهو الأيام شبه بعضها ولا مستعجلة على الغدا ليه يعنى ما أحنا أهو متهببين فى البيت

 

إلهام : ماهو انا أصلى نازلة رايحة ل سامية أختى اقعد شوية معاها أفك عن نفسى يا دوحة

 

ممدوح : أيوة يا أختى فكى عن نفسك وجيبلنا كورونا معاكى

العيال عيالها بيخرجوا ويسهروا برة ولا مراعيين حظر ولا زفت ولا أبوهم كمان مصيبة تانية كل يوم يسهر مع أصحابه برة البيت

اكييد حد فيهم حيجيب كورونا معاه

مفيش روح لأختك بقولك ولا هى كمان تيجى

خلى الحظر يعدى على خير ويسترها معانا ربنا

 

إلهام : يوووة أنت كده دايمآ قهرنى نفسيا إهئ إهئ وكاتم حريتى

الموضوع مش كورونا يا حبيبى ولا عيال اختى وجوزها

دى غيرة رجالة أه أنا عارفها

 

ممدوح : أصطبحى وقولى يا صبح غيرة مين يا أختى أللى بتقولى عليها دى

فوقى كده وخدى بالك لكلامك لا والله أطلع الحظر عليكى من أول اليوم

ها

 

إلهام : إهئ إهئ أنت كده لما تتزنق ومتعرفش ترد

تيجى عليا وتقولى أعمل وأسوى

 

ممدوح : مردش على إيه يا هانم وايه اللى زنقنى يا أختى

ها ما تردى

 

إلهام : علشان أنت إهئ إهئ مخلتنيش شاركتها فى مشروعها

وانت من يومها حاططها فى دماغك هى وجوزها وأخويا ومراته كمان

 

ممدوح : طب لمى يومك على الصبح ومش فطران يا إلهام ولا نازل أجيب طلبات وحتخمد أنام وإياكى أسمع صوتك

وكمان مفيش نزول ليكى فاهمة

 

إلهام : لأ مش فاهمة ها و ٠٠٠٠٠٠

 

خالد : يووووة على الصبح خناقات

حرام عليكم بقى

صوتكم صحانى من النوم

يقطع الحظر وسنينه

صدق المثل أللى قال ( تعرف أمك وأبوك لأ جربهم فى الحظر يا معلم )

 

ممدوح : أمك دى خميرة عكننة يا أبنى

شئ كده يخرجك من شعوره

قال بغير من أختها وأخوها قال

 

إلهام : ماشى والنييعمة منا قاعدة لكم فيها ورايحة ل ماما و ٠٠٠٠٠

 

ممدوح : يوووووة روحى مطرح ما تروحى ها

 

خالد : يووة يا بابا روق كده يا حبيبى وأنا حجهزلك فطار ملوكى ونفطر سوا كده راجل ل راجل بلا ستات بلا هم

 

ممدوح : ايه طقم الحنية ده مش مرتاحلك ياض يا خالد

عموما فطرنى مكان امك اللى غضبانة علطول دى

 

خالد عمل فطور ملوكى وكوبيتين شاى فى الخمسينة و ٠٠٠٠

 

خالد : بقولك يا بوس

 

ممدوح : قول هات ما عندك ماهو يوم باين من أوله

 

خالد : بص بقى أنا عاوز أجيب عربية وسألت وعرفت ممكن. ٠٠٠٠٠٠

 

خالد : اى اى يا عينى

أه إلحقينى يا ماما أى

طب استنى اسمعنى طيب

أى اى حكملك الموضوع

 

أقولكم أستنونى بكرة

ونشوف

هيييج