مطلوب عروسة

---

 

إيمان العادلى

الحلقة التاسعة

الحمد لله هربت من عصمت ونويت أنى مش حتجوز ولا عاوز أتجوز ولا عاوز أشوف أى عروسة
هو العمر بعزقة ولا بعزقة يا حمادة

أميرة : حمادة أنت هنا
عندى لك حتت عروسة

حمادة : مش عاوز أسمع سيرة اى عروسة فى البيت خلاص حرمت وخحد أجازة يجى 6 شهور كده على ما أفوق من صدمة عصمت

أميرة : يوووة أنت كده حساس ورهيف يا حمادة بص بقى جيبالك عروسة أورجانيك وقمر

حمادة : أورجانيك أزاى يا أختى مش فاهم

أميرة : جمال ربانى وعينين متكحلة من يوم ما أتولدت حاجة قمر كده أختها صاحبتى من الكليه وقالتلى عليها وأختها قمر برضه وأورجانيك بس يا خسارة مخطوبة

حمادة : أنا تعبت يا بنتى من موال العروسة ده مش عاوز أتنيل

الحاجة أميمة : يعنى أيه مش حتتنيل دى أختك قالتلى وأحنا وافقنا عليهم وحددنا ميعاد الخميس الجاى وخدت فلوس التورتة من أبوك

حمادة : هى منين العروسة يا زفتة يا أميرة

أميرة : من بلد جنب بلدنا حنسافر مشوار صغير كده أبوها إمام مسجد وعامل جمعية خيرية لمساعدة الناس وتحفيظ القرأن وأمها ست بيت مكافحة و٠٠٠٠٠

بعد شوية

الحاج محمود : وصلنا أهو رن الجرس يا حمادة ربنا يجعل فيها القبول

أبو العروسة : اهلا وسهلا نورتونا وشرفتونا أتفضلوا أتفضلوا

حمادة : نورك يا حاج والله

أم العروسة : يادى النور اللى هل علينا نورتونا
أزيك يا أميرة ياحبيبتى يعنى لولا موضوع ريم العروسة مكنتش شفتك أهلا وسهلا حاجة أميمة

حمادة : الله البيت مريح أوى وأبوها راجل وشه بيطلع نور وأمها ست طيبة زى أمى بصراحة البت أميرة نشنت صح وبعدين أمها طلعت أورجانيك صح ما بال العروسة بقى كفاية أسمها ريم بينها حتضحكلى أخيرا وحكمل نص دينى

الحاجة أميمة : مش حنشوف العروسة يا حبيبتى ولا أيه

ام العروسة : والله الحاج صعب شوية فى الحاجات دى محبكها شوية مبيحبش حد يشوف البنات الا لو خطيبها فعلا وكده يعنى

حمادة : وأنا حخطبها أزاى وانا مشفتهاش طب حتى هى تشوفنى وتقول رأيها

أم العروسة : يا لهوى يا أحمد يا أبنى هو أحنا عندنا بنات تقول رأيها ده كان أبوها دبحها الرأى رأى أبوها

حمادة : دبحها أزاى يعنى هو أحنا سنة كام بالظبط

الحاج محمود : بنستأذنك يا حاج نشوف العروسة وهى كمان تشوف احمد برضه

ابو العروسة : تشوف مين يا حاج أنا بناتى ميتكشفوش على خطاب أبدا ولا راجل يشوفها غير جوزها

الحاج محمود : أزاى يا حاج يعنى يتجوز واحدة مشفهاش ده حتى الشرع محلل ينظر لوجها والكفين

أبو العروسة : وجه ايه وكفين ايه اللى حيبرق فيهم أبنك ويبحلق وهو انا حرضى بكده وأفرض يعنى العريس معجبتوش يبقى الناس يقولوا ايه على بنتى والخطاب يجيوا أزاى وبنتى أترفضت
أنت ترضاها لبنتك أميرة

الحاج محمود : أه أرضاها لبنتى هو عيب لا سمح الله لما تشوف عريسها ولا هو يشوفها وأحنا قاعدين

ام العروسة : متزعلش نفسك يا حاج العروسة شبهى تمام كده وشبه أختها رباب صاحبة أميرة
ما تقولى يا أميرة على حلاوة رباب والله لو ماكانت مخطوبة مكنتش عزتها عليك

الحاجة أميمة : أيه الكلام ده يا حبيبتى اختها ايه وشبه مين أحنا عاوزين نورى العروسة لأبنى احمد يشوفها ويقرر بنفسه والعروسة كمان تقرر

ام العروسة :خلاص أدخلى وشوفيها ولو عجبتك يبقى حتعجب أبنك ونتمم الجوازة ولو معجبتكيش يادار ما دخلك شر والبت محدش شافها ونحلف بكده

حمادة : لا طبعا هى ماما هى اللى حتتجوزها ولا أنا وبعدين هو انا حاكل منها حته ولا أيه ما هى كمان حتشوفنى برضه حقها هو فى أيه يا جماعة أنا مش فاهم والله

ابو العروسة : معندناش بنات تتشاف يا تخطبها زى ما أختها أتخطبت والست الوالدة وأختك تشوفها وتقرر يا مفيش جواز

الحاج محمود : ده كلام ميعجبناش يا حاج وبعدين هى الدنيا بتتقدم ولا بتتأخر ولا أنتم عايشين فى دنيا تانية

ابو العروسة : أنت بتشتمنا فى بيتنا يا حاج محمود طب طلبكم مرفوض ومفيش عندى بنات للجواز ونورتونا و ٠٠٠٠

حمادة : وأنا كمان مش عاوز أشوفها ولا عاوز نسبكم من أصله
وكمان عاوز التورتة ها
يلا يا بابا
يلا يا ماما
إمشى يا وش النحس أدى مجايبك قال أورجانيك قال ماله الهجين يعنى

أستنونى بكرة وحلقة جديدة