مطلوب عروسة

الحلقة الثالثة

 

إيمان العادلى

 

 

بصوا بقى بعد حكايتى مع الراجل المادى واللى كان فاكرنى أستبن

انا قلت أريح شوية وأهرب من موضوع الجواز ده لكن دائمآ الريح لا تأتى بما تشتهى السفن وهوبة

 

الحاجة أميمة : بص يا حمادة لاقيتلك عروسة بيقولوا عليها قمر

 

حمادة : مين أللى بيقول يا ماما

 

الحاجة أميمة : أختك أميرة قالتلى عليها العروسة بنت خالة صاحبتها سمر

 

حمادة : يا ماما أنا راضى ذمتك هى أميرة بتشوف أصلا ولا حتى عندها تمييز ده فصوص مخها شغالين كلهم شمال

يبقى عليه العوض فى العروسة

 

الحاجة أميمة : أميرة تعالى قولى لأخوكى على العروسة

 

أميرة: بص يا سيدى هى مليانه حبه صغيرة وخمرية شوية وعينيها خضراء مقبولة الشكل يعنى و لسه بتدرس فى كلية الأداب

 

حمادة : يبقى بناء على رؤيتك الشمال و توقعى السليم ان البنت رفيعة أو معصعصة مش مقبولة الشكل على الاطلاق وتقريبا حاصله على الماجستير فى المحاسبه و بيضاء و عيونها سودة

طيب نروح بقى و نشوف العروسة

 

الحاجة أميمة : توكلنا على الله حقول لأبوك علشان يديلك ال 300 ج بتوع الجاتوه

يلا يمكن ربنا يجعل فيها القبول

 

حمادة : روحنا لبيت العروسة انا وأمى وأبويا وأميرة طبعا واسطة الخير

بمجرد وصولنا البيت انا تنحت وأنبهرت الناس مستواهم عالى اوى وساكنين فى قصر كبير يا لهوك يا حمادة أنا فين وهما فين

خدم وحشم ولا قصر الملك فاورق

 

امى الفرحة بتنط من عينيها و مانعة نفسها بالعافيه من زغروده محشورة فى زورها

 

بابا كالعادة الأمور دى متهموش المهم يكونوا طيبيبن

 

أما البت أميرة فتايهة كالعادة

 

و انا  عاوز اعيط وأجرى

طيب السؤال ليه

هتروح فين يا حمادة فى العالم دى

 

الحاج محمود :أيه يا حمادة فوق يلا أحنا داخلين القصر

 

حمادة :القصر شكله غريب فعلا

عامل زى القصور أللى بتطلع فى التليفزيون

وهوبة

 

أبو العروسة: اهلا اهلا

اهلا يا أحمد صح

 

حمادة :ايوه حضرتك انا احمد “قدمته للعيلة بابا .. ماما . اميرة أختى

بصراحة ابوها كان

لطيف و محترم وهوبة أمها دخلت

حاجة كده شبه إنجى فى رد قلبى

وشبه حريم السلطان ست شيك أووى بس تحسها قرشانة اول ما قعدت فضلت تقول لنا عن

جدها لأبوها كان وزير الحقانية و جدها لأمها كان وزير الداخلية

انا مش هفية برضه انا جدى كان باش محضر أد الدنيا ولا عمى امين شرطه اسم الله يعرف يجيب التايهة من غير حتى ما تكرمشله 5 ج المهم القعدة  ما بين ابويا و امى و الباشا ابو العروسه و امها جات مثمرة وأفتكروا الماضى وأيامه وأشى أسماء ممثلين على أسماء شوارع

ومطربين ولا عمرى سمعت عنهم خايف يعرفوا انى بسمع بنت الجيران ولا حمو ولا أوكا ولا حتى بيكا ويولعوا فيا

انا كان مالى ومال الجوازة الطين دى منك لله يا أميرة

يا ترى دول عاوزين الشبكه بكام ب

500 الف مثلا والله شوية على مستواهم ده

ولا أسكنها فين يا دهوتى فى الشقة اللى خدتها من مشروع إسكان الشباب وبالقسط كمان

يا فضيحتك يا حمادة لو عرفوا إنى معنديش عربية وأبويا بيسلفنى عربيته بالبنزين  ولا لو عرفوا مرتبى كمان ده أكيد بنتهم بتاكل بيه أيس كريم

الله هما الوقت خدهم لهم ساعة بيحكوا فى ايه  ولحد دلوقتى مشفتش العروسة

وهوبه

دخلت العروسه عاديه خالص متوسطة الجمال و الطول و الاناقه

بعد 10 دقايق كلام عرفت انها متوسطة فى كل حاجة

طيب ده مؤشر خير إن أمكانيات العروسة مش أوى وأنا الصراحة مسمسم والعين عليا

وهوبة

 

الحاج محمود : يلا يا حمادة سلم على الباشا وإن شاء الله يكون فى نصيب

 

حمادة : طيب مينفعش نطلبها فى اول قعده لازم نروح و نستنى كام يوم واتصل بأبوها واشوف الرد

 

المهم

مشينا من عند الناس و انا نازل مسهم ومتنح مش بنطق بولا كلمه

وفجأه

 

الحاج محمود : بدرى عليك السهوكة والسرحان يا حمادة ولا أتعلقت بيها

 

حمادة : تعليق ايه يا حاج ده أنا بفكر بس فى الأتى

 

بعد يومين المده أللى أتفقوا عليها اتصلت بأبوها

 

حمادة : أزى حضرتك يا انكل انا احمد اللى جيت من يومين عند حضرتك

 

أبوالعروسة : اه اهلا اهلا ازيك يا احمد و ازى الأسرة كلها

 

حمادة الحمد لله بيسلموا على حضرتك و بيسألوا ان كان فى فرصه تانيه نتشرف بزيارتكم

 

أبو العروسة :قولى يا أحمد انت قلتلى انت من عائلة مين يعنى جدك مين عمك بيشغل مناصب أيه كده مثلا احكيلى عن عيلتك

 

حمادة : أنا عيلتى محترمة وأبويا راجل عظيم بفخر بيه ربانى أنا وأختى وعلمنا أحسن تعليم

 

ابو العروسة: اممم .. طيب انا هبقى اكلم والدك ان شاء الله .. خد بالك من نفسك مع السلامه.

و قفل الخط.

 

حمادة :طبعا كده أنا عرفت الرد

بس أميرة لازم أديها على دماغها وأهزئها زى ما هزئتنى معاهم

أنت يا زفت يا أميرة مش قلتيلى أنك قلتلهم كل حاجة عن ظروفى

 

أميرة :اقسم بالله العظيم قلت لهم كل حاجه بالتفصيل الممل و هما رضيوا و ابوها قال مبيهموش الطبقية والكلام الفاضى ده المهم أنه بيشترى راجل

 

حمادة :امال ايه بقى

 

أميرة : بص ادينى يومين و انا هجيبلك الخبر اليقين

 

حمادة : يومين كاملين وانا بغلى

 

أميرة : عرفت السبب وأطقست من البنات صحابها فى بلدهم

 

حمادة : قولى يا وش النحس

 

أميرة: بص يا سيدى البت العروسة طلعت بتحب واد كده من البلد بتاعتهم ومن مستواها برضه وأبوه عنده قصر بس الواد تقيل كده وبرطة فى نفسه مخطبهاش و ٠٠٠٠٠

حمادة : يعنى أيه يا وش النحس بتحب واد من مستواها وهو أنا أيه من المستوى العاشر ولا من لفل الوحش

ده أنتى يومك اسود معايا لو أللى فى دماغى طلع صح

 

أميرة : أيه أللى فى دماغك

 

حمادة : البت العروسة وأبوها عملونى كوبرى للواد اللى بتحبه

يعنى يغيظوا الواد بعريس علشان يحركوه

 

أميرة : أسم الله عليك تكونش كنت معايا وانا بقرر الستات عنها

 

حمادة : محدش يحوشنى

حدبحك يا أميرة وأشرب من دمك

 

المهم الدم بيغلى فى عروقى وحتجنن لازم أنتقم يا جدعان من الباشا وبنته مكسورة الرقبه

وهوبه

 

حمادة : سلام عليكم يا عمى الف مبروك للانسه بنتك بخطوبتها

 

أبو العروسة: عقبالك يا احمد معلش الجواز قسمه و نصيب

 

حمادة: صحيح قسمه و نصيب صحيح انا من عيلة متوسطة لكن محترمة وعندها من الأخلاق اللى يمنعها تستغل ولاد الناس كطعم فى إصطياد العرسان والحمد لله أننا ناس نفسيتنا سوية مش وضيعة زيك

و رحت رازع السماعه فى وشه

أه والله زى ما بقولكم كده وأنا كلى سعادة وأجلال

المهم دى حكايتى مع العروسة

 

أستنونى بكرة وحكاية جديدة