اللي فهموا ماتكلموش
وعشان كده..
الحقيقة لحد يومنا مُعتمه
أوقات بتلاقي الحل الأمثل.. إنك تسكت
علشان لو قولت..
كلامك جايز مش هيليق علي عقل
الخلق
اوقات الكلمة مكانها الأفضل..
يبقي الحلق
والحقيقة.. قطر داير بين بلاد ملهاش محطه
واللي فاهم صح جدا.. ده اللي راكب بالأونطه
واللي خبي في الحقايق جوا شنطة
شاف عقول الناس وقال
إيه يفيدك لو تقول!
شفت أخر شبر فاضي في السما؟!
زي أول متر في الأرض البتول..
مين هيفهم معني مش واضح!
ولا واضح.. بس محتاج لو تدقق..
مش هيفضي حد مره عشان يقارن
مين كلامه بجد أصدق..
مش مهم يلاقوا معني الحق فين
فيه أهم كتير نروح له
الشهوة أحلي..
والكلام مش كاس عشان تحلي الحروف
واللي عايش لو يشوف
كان يصب المعني للغايبين..
يمكن يفوقوا
بس فين؟!
ولا مين يقدر يقول الحق صافي
والناس تصدق كلها..
من غير مايطلع كدب متغلف في هيئة يقين
اللي فهموا ماتكلموش..
بس ماتوا مبسوطين.
