استشارى التطوير الوظيفى  معتز موسى :اعرف نفسك اول طريق النجاح

كتب محمد محسن

 

الكلام عن التاهيل والتدريب والبحث عن الوظائف اول طريق النجاح للشباب لذا كانت الاهمية لمتخصصين فى مجال التدريب والتطوير معتز موسى احد الشباب المجتهدين فى مجال الموارد البشرية والتدريب وله تجربة فى عالم التدريب بعنوان بوصلة للتدريب على اكتشاف القدرات والمهارات للشباب لذا كان الحوار معه مهم

 

كلمنا عن مجال عمللك وخبراتك؟

 

انا معتز موسى خريج كلية اللغات وترجمة جامعة الأزهر ، البداية اني ابن لعائلة أصحاب بيزنس تجاري وقضيت باقي طفولتي ومراهقتي وسط البيع والشراء والعملاء ومدرسة البيع ولدت فيا ميول وخبرات جعلتني عايز اطور في نفسي أكتر وابتدى التطير بدخولي الكلية اشتغلت في مجال التسويق والتدريس بجانب شغلي مع عائلتي سعياً لإثبات نفسي .

 

دخلت في في مجال الموارد البشرية قبل ما اتخرج وبعد فترة من التطوع والتعلم والدورات اهتمامي كله أصبح في مجال التدريب والتطوير وبالأخص التطوير الوظيفي –  Career Development

 

وبعد فترة اشتغلت في عدد من المؤسسات واهتمامي كله انصب في تخصص التطوير الوظيفي للشباب أو بالأحرى من ثانوي للخريجين وبعد عدة دراسات من جامعات عالمية مثل هارفارد وجورجيا وويزلاين وقراء كتب كبيرة قدرت اوصل في خلال سنتين لتجربة تدريبية مختلفة ومنهج مدروس ومُطبق لمساعدة الشباب بطرق عملية وليس بمجرد كلمات تحفيزية مثل باقي المدارس الوهمية.

 

أسست في 2017 مدرسة البوصلة والحمدلله قدرت في اقل من 3 سنوات خلق مجتمع كبير ناضج طموح مركز في تغيير نفسه وشبابه بيشتغلوا في الوظائف والمهن اللي سبق اكتشافها في خلال فترة دراستهم بالمدرسة.

 

هل يؤثر محتوي التعليم علي مسيرة الانسان؟

 

طبعاً  لأن مكونات الإنسان الحقيقة اللي بتساعده يتطور هي “معلومات ” و “مهارات” و “سلوك” فالتعليم بيحدث الفارق الكبير وبيفرق ما بين شخص وتاني بجودة المكونات الثلاثة.

 

وخليني أقول ان التعلم هو اللي بيفرق فعلاً في مسيرتنا كبني آدمين مش التعليم التقليدي ، لأن كلنا ببساطة كلنا خريجي مدارس تعليم مختلفة ومننكرش ان هو اللي وضع حجر أساسنا لكن التعلم وخصوصاً التعلم الذاتي هو المُساهم الأكبر في اختلافنا لأنه اختياري وكل شخص بيختار طريقه بنفسه حسب طموحه وهدفه في الحياة وإرادته لتحقيقهم.

 

ازاي اختار المسار الوظيفي المناسب ليا؟

 

اختيار المجال الوظيفي شئ مش صعب بس تطور العالم من حوالينا وسرعة كل شئ بيصعبوا علينا اتخاذ قرار اختيار البدء ، وعلاوة على كده التنافسية الشرسة الموجودة في سوق العمل مع ضغوط الحياة وعجلة التطور الروتينية في بلادنا وقصر المدة ما بين كل جزء : تخرج .. جيش.. اي شغل .. جواز .. ضغط.

 

فوسط المراحل دي بيكون صعب جداً الموازنة مابين معادلة (أي شغل عشان يكون فيه دخل مادي ) و (لازم أبدء كارير كويس عشان استمر فيه مدى الحياة ويوفرلي حياة كريمة فيها فرص).

 

عشان كده بنصح دايماً بالبداية خلال الجامعة قبل التخرج أو في بداية أول 5 سنين بعد التخرج.

 

لإختيار المجال الوظيفي  خطوات كالتالي :

 

1- الوعي الذاتي زي معرفة نمط الشخصية والميول المِهنية والمهارات الفطرية والمواهب ان وُجدت.

 

2- معرفة القيم المِهنية اللي هتحقق رضاك الوظيفي بحيث على الأساس ده بنختار المجال.

 

3- عمل قائمة بكل المجالات المهنية اللي تتناسب مع كل النقاط السابقة واختيار منها بناء على سؤال وتقييم أكتر من خبير أو استشاري في المجال .

 

4- اختيار المجال الذي يتوافر فيه (القدرة والفرصة) قدرة طبيعية على الحفظ .. الفهم .. الحساب .. التحليل وفرصة يعني وجود وطلب حقيقي في السوق.

 

5- استشكاف الوظايف المتبقية من الخيارات من خلال التطوع حضور المؤتمرات الوظيفية أو التدريب الداخلي بأحد الشركات.

 

6- استبعاد مفهوم (الرغبة) أو الشغف في بداية الطريق لأن بالخطوات السابقة ستصل إليه ولكن ليس شرط أساسي للبدء لأنهم بييجوا مع الوقت والتجربة.

 

7- أهم شئ التجربة من غيرها مش هنقدر نقيم اللي يناسبنا حتى لو استعنا بأكبر خبير كوتشينج في العالم.

 

ما هي اهم مفاتيح النجاح؟

 

النجاح مصطلح عام جداً ومفهومه بيتغير من إنسان لإنسان بس خلينا نختذله في مفهوم عام مُتفق عليه وهو “الوصول” بمعنى شخص عنده فكرة معينة أو هدف معين ممكن نقول ان مفتاح الوصول ممكن يكون مثلاً ( اختيار هدف ملائم ، التخطيط الصحيح ليه ، التأكد من الخطة ، الصبر إلخ).

 

من خلال خبرتي في الوصول لأهدافي الوظيفية بشكل عام والمِهني بشكل خاص لقيت ان مُفتاح النجاح هو يتلخص في الجملة دي : الإستمرارية مهما كان سواء وجود نتايج أو لا التجربة وسط الرحلة هتعلم وتخلينا نقَّيس الخطة ونخليها ملائمة أكتر.

 

هل النجاح علم ولاحظ؟

 

الإتنين بس الحظ معناه هنا زي ما ربنا قال : القدر السعيد ، ورنا ذكر في القرآن وقال : وَأَنْ لَيْسَ لِلْإِنْسَانِ إِلَّا مَا سَعَى * وَأَنَّ سَعْيَهُ سَوْفَ يُرَى * ثُمَّ يُجْزَاهُ الْجَزَاءَ الْأَوْفَى

 

وده رد قوي على إن الحظ السعيد بيأتي للي بيسعى أكترومن وجهة نظري اللي بيسعى أكتر وبيطبق باللي عنده حتى لو كان نصف علم ما عند واحد تاني مودي أو خمول أو كسلان لأن الأول هيتعلم في النص والتاني هيوصل متأخر أو هيزهق وعلمه مش هيفيد بحاجة ففي النهاية اللي بيوصل العنيد المُثابر.

 

الفرق بين التدريب والكوتشينج؟

 

الفرق بينهم مش كبير من وجهة نظري الإتنين بيتفقوا في التغيير لكن التدريب عملية عامة بتركز على مجموعة متدربين بتركيز عام ومنهج واحد للوصول لهدف تدريبي محدد يحدث تغيير في المهارة والسلوك والمعرفة أو يحل مشكلة.

 

غير أن الكوتشينج مبني على التسهيل مش التعليم ، بمعنى مساعدة عميل معين بمجموعة من الأسئلة والتحليلات للوصول لهدفي حياتي أو مِهني خاص بيه لوحده مش شرط بمنهج واحد مش شرط يحل مشكلة مش شرط يطور ال3 مكونات المعرفة والسلوك والمهارة ممكن يخليه يكتشف واحدة منهم عشان يستعين بيها العميل في الوصول لهدفه يعني مُجملاً الكوتش مرآة صافية مُفصلة ومَرنة لشخص بعينه.

 

اي حد عاوز ينجح في مساره المهني ايه مفاتيح النجاح في مجال عمله ؟

 

دايما بنصح ب3 حاجات في الإجابة على السؤال ده :

 

Mentor – community – consistency

 

بمعنى يكون فيه مُرشد دايماً سابقنا في مجالنا بنتعلم منه الدروس المُستفادة اللي تساعدنا نتفادى الأخطاء اللي هتعطلنا ، ومجتمع ذات توجه مشترك يكون ميال لنفس مجالي الوظيفي وبيشتغل فيه  لأنه هيساعدني أواكب متطلبات السوق المهمة من المعرفة والمهارة والسلوك وهيخلق نوع من أنواع التنافسية اللي هتساعدني أكتمل بغير وأطور من نفسي وأحاوط نفسي بهالة إيجابية تنقذني من وهم الفشل الوظيفي الدائم بحجة الواقع المختلف، وآخر وأهم شئ هو الإستمرارية في التعلم والبحث والإطلاع والإستمرارية في الفشل للوصول للهدف المَتمنى.

 

؟  اي حد عاوز يمتهن مسار الكوتشينج ايه الطريق الصحيح لكي يصبح مدرب معتمد

 

أهم شئ يكون لديه المهارة والمعرفة وقبلهم السلوك أو الإعتماد والشهادة هما سُبله للتسويق لأن معيار الإفادة للعميل هو التغيير مش الشهادة .

 

واجب على المهتم بالكوتشينج يدرس الأول “علم النفس الإيجابي”  و “مهارات التواصل ” ويتدرب على تطبيقهم بشكل مكثق قدر ما كان .

 

بنصح بكتب كتير موجودة بالفعل على الإنترنت ولكن محتوى أجنبي وبنصح بالإستعانة بدورات ومسارات تعليمية  الموجودة على مواقع عالمية مثل كورسيرا وايدكس وفيوتشرليرن.

 

أما للإعتماد فأحد أكبر المؤسسات في الإعتماد حالياً هي مؤسسة

 

ICF – International Coach federation

 

ايه روشتة النجاح بالنسبة للشباب عموما؟

 

التركيز على مجالات المستقبل

 

استثمر فلوسك كلها في تعلم مهارات البيع والتسويق والمهارات الناعمة

 

القراءة في علم النفس عمرها ما كانت تخصص

 

اتجوز لما تبني كارير ولو عايز تتجوز بدري ابني كارير بدري

 

الشغف كدبة كبيرة بيعمل منها ناس كتير فلوس وربح سيبك منها الشغل طول عُمره للجيب.

 

الفلوس من أهم معايير التطوير

 

ابدأ تطوير من وانت في جامعة

 

التطوع شئ كويس جداً لو في المكان الصح

 

مفيش حاجة اسمها قطر عشان يفوتك