أفتاكسات زوج محظور

 

 

إيمان العادلى

 

الحلقة الثالثة والعشرون

(الجزء الثانى) أفتاكسات زوج صايم

إلهام وممدوح

 

رهف : بابا يا حبيبى أجى أساعدك وأجهز معاك البيتزا والحشوات

 

ممدوح : أه تعالى جهزى الزيتون والفلفل وقطعيلى الفراخ حتت صغيرة وشوفى أخوكى عاوزاها بأيه

 

رهف : خااااالد عاوز البيتزا بأيه

 

خالد: أنا بحبها بالسجق أوعى تعمليها ليا بالفراخ بقولك أهو

 

رهف : طيب أنا مش حعمل حاجة أنا حجهز ل بابا الحشوات بس

بابا خالد عاوزها بالسجق أشتريت سجق يا حبيبى مع الطلبات

 

ممدوح : جبت كل حاجة معايا زى المكتوب بالظبط

يلا وسعى بقى وأطلعى من المطبخ وسيبى الشيف دوحة يظبطلكم أحلى بيتزا ولا بيتزا هت

 

رهف : ( ربنا يستر) ماشى يا حبيبى لو عوزت مساعدة نادينى

 

إلهام : رهف تعالى هنا

أبوكى سيباه لوحده فى المطبخ بيهبب ايه روحى يلا معاه ساعديه

 

رهف : يوووة يا ماما هو طردنى منه بالذوق وقالى خلاص مش عاوزة مساعدة منى

ما تروحى أنتى يا ماما بصى بصة على السريع كده

 

إلهام : لأ يا حبيبتى أنا أجازة من المطبخ 3 أيام والنبى لو ولع حتى ما حدخل أطفيه

ده أنا أتهريت منكم فى رمضان

بريح يا نااس يومين أجازة يا بشر

 

رهف : أنا مالى بقى وربنا يستر وبابا ميخربهاش ونلاقى حاجة ناكلها

 

الوقت عدى وممدوح فى المطبخ ساعتين وخبط ورزع وصوانى تقع وهيصه وفجأة

 

ممدوح : خاالد رهف إلهام تعالوا بقى شوفوا عمايل إديا وكل واحد ياخد البيتزا بتاعته

يا سلام يا دوحة يا جاامد انت

 

خالد ورهف : الله يا بابا شكلها تحفة السجق والفراخ بتاعتنا

وماما مرجريتا وأنت ايه دى يا بابا

 

ممدوح : عملتها بالجمبرى كل واحد ومزاجه

كلوا بقى وقولوا رأيكم

 

خالد : ( هى تخينة أوى زى ما تكون عيش كده ليه وفيها طعم غريب مش عارفه )

(أه يا بطنى يانى )

 

ممدوح : ها يا خلودة أيه رأيك

 

خالد : أه اه حلوة يا بابا بس تخينة شوية

 

ممدوح : انت اللى مبتفهمش فى البيتزا المهم الطعم أخباره أيه

 

خالد : حلوة يا حبيى تسلم إيدك بس هو فى طعم غريب كده منش عارفه

 

ممدوح : طعم إديا وحياة عنيا هههههه

 

رهف : ايه ده يا بابا فى طعم غريب فى الفراخ والبيتزا تخينة أوووى

 

إلهام : أوعى كده منك ليه أما أشوف بتاعتى

أيه ده يا ممدوح البيتزا فيها طعم غريب أنت عملتها أزاى

عملتها زى ما كتبتلك الطريقة

 

ممدوح : وأعملها بطريقتك ليه هو أنتى مش إجازة يا هانم مالى ومال طريقتك بقى

 

إلهام : ماشى يا حبيبى يا جوزى ممكن تقولنا تاتشك الممدوحى كان أيه

 

ممدوح : المهم أيه رأيكم الأول فى عمايل إديا

 

خالد ورهف وإلهام : تجننن يا بابا

قولنا بقى عملت أيه علشان ناكل

 

ممدوح : حديكم السر بقى وإمرى لله انا حطيت زيت زيتون فى العجينة

 

إلهام : ها قول علطول يا حبيبى أعصابى لا تتحمل

 

ممدوح : وقلت بقى يا دوحة بدل ما أعجنها بزبادى عجنتها بحليب

وأتوصيت بزيت الزيتون فى العجينة علشان تطلع هشة حطيت كوبية ونص

وعملت شاورمة الفراخ بزيت الزيتون علشان تبقى صحية

بس هو يعنى نسيت حاجة صغيرة كده أفتكرتها بعد ما رشيت الصلصة والجبن

 

إلهام : أيه يا حبيبى يا نور عينى قول

 

ممدوح : نسيت الخميرة بس

 

إلهام ورهف وخالد : يا لهوووووووى يا أنااااا من بابا وأفتكساته

 

أستنونى بكرة ونشوف ممدوح تانى يوم حيأكلهم أيه

أستنونى