ادوية الكوليسترول الحقيقة والاشاعات اللي لازم تعرفها
إيمى عمرو
فيه ناس بتاخد دواء الكوليسترول وهي خايفة منه
وفيه ناس بتوقفه بمجرد ما تسمع انه بيدمر الكبد او العضلات
وفيه ناس فاكرة ان الكوليسترول طالما نزل في التحليل يبقى خلاص مش محتاجين الدواء
تعالى نفهم الحكاية ببساطة
🔴 اولا يعني ايه ادوية الستاتين
دي اشهر مجموعة ادوية لعلاج الكوليسترول الضار
ومن اشهر انواعها
★ اتورفاستاتين
★ روزوفاستاتين
★ سيمفاستاتين
★ برافاستاتين
والاسماء التجارية بتختلف من شركة للتانية
لكن كلهم بيشتغلوا بفكرة متقاربة
🔴 الدواء بيشتغل ازاي؟؟
خلينا نتخيل ان الكبد هو مصنع الكوليسترول الرئيسي في الجسم
الستاتين بيقلل تصنيع الكوليسترول داخل المصنع ده
لكن فيه حاجة اهم
لما الكوليسترول يقل داخل الكبد
الكبد بيزود عدد الابواب اللي بتسحب الكوليسترول الضار من الدم
وبالتالي بيحصل تااثير مزدوج
★ الكبد ينتج كوليسترول اقل
★ ويسحب كمية اكبر من الكوليسترول الضار من الدم
وده السبب في ان الدواء فعال جدا في خفض الكوليسترول
🔴 هل الدواء بيحمي من الجلطات فعلا؟؟؟
اه ودي اهم حقيقة علمية
الكوليسترول الضار ممكن يدخل جدار الشرايين ويتراكم مع الوقت
وتتكون ترسبات بتضيق الشريان
والاخطر ان بعض الترسبات ممكن تتمزق وتتكون فوقها جلطة تسد الشريان
وهنا ممكن تحصل جلطة القلب او المخ
الستاتين بيقلل كمية الكوليسترول الضار اللي بتوصل لجدار الشرايين
وبيساعد على تقليل تطور الترسبات وتثبيت بعضها
يعني احنا مش بنعالج رقم في التحليل فقط
احنا بنحاول نحمي القلب والمخ من الجلطات
🔴 هل الستاتين بيدمر الكبد؟؟؟
دي اشاعة محتاجة تصحيح
الستاتين ممكن يسبب ارتفاع بعض انزيمات الكبد عند بعض الناس
لكن ده مش معناه ان الكبد بيتدمر
الاصابة الكبدية الخطيرة بسبب الستاتين نادرة جدا
والاهم ان مريض الكبد الدهني ممكن ياخد الستاتين لو محتاجه
وجود دهون على الكبد مش سبب لمنع الدوا
لكن لازم تقييم الدكتور خصوصا في حالات امراض الكبد الشديدة او غير المستقرة
🔴 هل الستاتين بيسبب وجع العضلات؟؟؟
اه دي من الاثار الجانبية المعروفة
بعض الناس ممكن تحس بوجع او شد او ثقل في العضلات
خصوصا عضلات الفخذين والكتفين
لكن مش كل وجع عضلات سببه الدوا
ولو حصلت المشكلة نعمل ايه
★ نراجع العلاقة بين ظهور الوجع وبدء العلاج
★ نراجع الادوية التانية اللي المريض بياخدها
★ الدكتور ممكن يطلب تحليل انزيم العضلات
★ ممكن يغير نوع الستاتين
★ او يقلل الجرعة
★ او يجرب طريقة مختلفة لتناول العلاج
ومهم تعرف ان عدم تحمل نوع معين مش معناه ان كل انواع الستاتين هتسبب نفس المشكلة
وفيه حالة نادرة جدا ممكن يحصل فيها تكسير شديد للعضلات
ولو ظهر ضعف شديد او وجع عضلات غير محتمل مع بول لونه غامق لازم ترجع للدكتور
🔴 هل الستاتين بيسبب السكر؟؟؟
الحقيقة انه ممكن يزود احتمالية ظهور السكر عند بعض الناس
خصوصا اللي عندهم استعداد للاصابة من البداية
زي اللي عندهم
سمنة
او مقاومة انسولين
او السكر عندهم قريب من مرحلة المرض
لكن الزيادة دي غالبا بسيطة
والنقطة المهمة ان حماية القلب والشرايين من الجلطات عند المريض اللي محتاج الدوا غالبا اكبر بكتير من الخطر المحتمل لظهور السكر
وعشان كده ظهور السكر مش معناه اننا نوقف الستاتين تلقائيا
لكن نهتم بمتابعة السكر والوزن والتغذية
🔴 هل الستاتين بيسبب النسيان والزهايمر؟؟؟؟؟
انتشرت اشاعات كتير عن الموضوع ده
لكن الدراسات الكبيرة ما اثبتتش ان الستاتين بيسبب الزهايمر او تدهور الذاكرة على المدى الطويل
فيه شكاوى نادرة من النسيان او التشوش الذهني
لكنها مش دليل على ان الدوا بيدمر المخ
ولو حصل تغير واضح في التركيز او الذاكرة لازم ترجع للدكتور
🔴 هل الستاتين بيضر الكلى؟؟؟؟؟
الستاتين مش معروف انه بيدمر الكلى عند الاستخدام المعتاد
وبالعكس مرضى الكلى من الفئات اللي ممكن تحتاجه لحماية القلب والشرايين
لكن لو حصل تكسير شديد في العضلات في حالات نادرة ممكن تتاثر الكلى
وعشان كده لازم الانتباه لالام العضلات الشديدة والضعف غير المعتاد
🔴 هل كل انواع الستاتين بتتاخد بالليل؟؟؟
لا
بعض الانواع يفضل تتاخد بالليل
لكن فيه انواع تانية ممكن تتاخد الصبح او بالليل
المهم الالتزام بتعليمات الدوا والميعاد المناسب للنوع المستخدم
🔴 هل فيه ادوية بتتعارض مع الستاتين
اه
بعض المضادات الحيوية ومضادات الفطريات وادوية القلب ممكن تزود تركيز بعض انواع الستاتين في الدم
وده ممكن يزود احتمال حدوث مشاكل العضلات
كمان عصير الجريب فروت ممكن يتداخل مع بعض الانواع
عشان كده لازم الدكتور والصيدلي يعرفوا كل الادوية اللي المريض بياخدها
🔴 اامتى نحتاج دواء الستاتين؟؟؟
مش كل شخص عنده كوليسترول مرتفع محتاج نفس العلاج
لكن فيه حالات بتحتاج الستاتين بشكل واضح
★ اللي حصل لهم جلطة قلبية او دماغية
★ اللي عندهم انسداد او ترسبات واضحة في شرايين القلب
★ اللي عندهم ارتفاع شديد في الكوليسترول
★ بعض مرضى السكر
★ بعض مرضى الكلى
وفيه حالات تانية بنحدد احتياجها للدوا حسب العمر والضغط والتدخين والوزن والتاريخ العائلي
يعني مش بنعالج رقم التحليل لوحده
احنا بنقيم خطورة الشخص على القلب والشرايين
🔴 هل لو الكوليسترول نزل نوقف الدوا؟؟؟
دي من اخطر الاخطاء
لما الكوليسترول ينزل اثناء العلاج ده مش معناه ان المشكلة اختفت
ممكن يكون نزل لان الدوا بيؤدي وظيفته
ولو وقفت العلاج من نفسك ممكن يرتفع تاني
خصوصا لو السبب وراثي او عوامل الخطورة لسه موجودة
عشان كده متوقفش الستاتين لمجرد ان التحليل بقى كويس
🔴 ازاي نساعد الدواء بالتغذية؟؟؟؟
الدواء مهم لكن التغذية جزء اساسي من حماية الشرايين
★ قلل السمنة والزبدة والقشطة والدهون الحيوانية
★ قلل اللحوم الدسمة واللانشون والسجق
★ استخدم زيت الزيتون بدلا من السمنة
★ تاكل الشوفان لانه غني بالالياف اللي بتساعد على خفض الكوليسترول
★ خلي الفول والعدس والحمص جزء من اكلك
★ المكسرات غير المملحة بكميات معتدلة
★ السمك بانتظام مره فالاسبوع
★ زود الخضار والفاكهة الكاملة
★ قلل الحلويات والعصائر والمشروبات السكرية
★ مارس المشي والنشاط البدني بانتظام
ومعلومة مهمة
مش معنى انك مريض كوليسترول انك تمنع الدهون تماما
المطلوب تستبدل الدهون المشبعة الموجودة في السمنة والزبدة واللحوم الدسمة بدهون صحية زي زيت الزيتون والمكسرات والسمك
🔴 نموذج يوم غذائي لمريض الكوليسترول
الفطار
فول بزيت زيتون بكمية بسيطة مع عيش بلدي وخيار وطماطم
او شوفان مع زبادي قليل الدسم وتفاحة
او جبن قريش قليل الدسم مع خضار
بين الوجبات
ثمرة فاكهة مع كمية صغيرة من اللوز او الجوز
الغدا
سمك مشوي مع سلطة وارز
او فراخ مشوية من غير جلد مع خضار
او عدس او فاصوليا مع سلطة وعيش بلدي
العشاء
زبادي قليل الدسم مع شوفان
او فول وخضار
او جبن قريش وسلطة
🔴 اشهر الاشاعات عن الستاتين
★ الستاتين مش ادمان
★ مش بيدمر الكبد عند كل من يستخدمه
★ مش كل وجع عضلات سببه الدوا
★ مش بيسبب الزهايمر حسب الادلة المتاحة
★ مش ممنوع لمريض الكبد الدهني المستقر
★ مش لازم كل مريض ياخده بنفس الجرعة
★ مش معنى ان الكوليسترول نزل اننا نوقف العلاج
★ مش بديل عن التغذية الصحية والحركة
🔴 اخيرا
الستاتين مش دواء مخيف ولا دوا ناخده بشكل عشوائي
هو علاج مهم جدا لما يكون الشخص محتاجه
وفي ادلة علمية قوية انه بيقلل الجلطات ويحمي القلب والشرايين
والاثار الجانبية موجودة لكن معظمها ممكن التعامل معاه بتغيير النوع او الجرعة او طريقة العلاج
المشكلة مش اننا نخاف من الدوا
المشكلة اننا نستخدمه من غير داعي او نوقفه من غير سبب طبي
افهم علاجك قبل ما تحكم عليه
التعليقات مغلقة.