موجة غضب عارمة من انقطاع فيسبوك وماسنجر وإنستجرام.. وميتا تلتزم الصمت
أحمد المصرى
متخافش حسابك على فيسبوك متهكرش… ده عطل غريب وواسع النطاق ضرب فيسبوك من شوية، ونص المستخدمين على الكوكب فجأة لقوا نفسهم مطرودين بره حساباتهم!
اللي حصل بالضبط هو ان على الساعة 4:30 بتوقيت مصر تقريبًا، فيسبوك فجأة اتعطل تماما وبطل يحدث الفيد، أو في حالات تانية عمل تسجيل خروج إجباري لكل الناس… تيجي تدخل الباسورد وتتأكد منها مليون مرة، يقولك “الباسورد غلط” أو تظهرلك الشاشة القديمة اللي مكتوب فيها “حدث خطأ غير متوقع” أو “في Error حصل وإحنا شغالين عليه”.
القصة دي حصلت معايا بردو، وافتكرت الحساب اتهكر، بس لا… الموضوع مطلعش عندي لوحدي، ده طلع سيستم شركة “ميتا” بالكامل وقع في نفس اللحظة!
بعد عملية بحث سريعة، عايز اقولك ان العطل ده وصل لحد ماسنجر كمان؛ وفجأة عمل Logout للناس، ومفيش أي رسالة راضية تتبعت ولا تتوصل… وحتى في انستجرام الناس اشتكت إن الفيد واقف ومبيعملش ريفريش، والرسائل الخاصة (DMs) اختفت أو بقت بتوصل متأخرة، وحتى الموقع بتاعه على الكمبيوتر كان عطلان تمامًا، في حين إن واتساب هو الوحيد تقريبًا اللي نجا من الأزمة دي وفضل شغال عادي…
الغريب كمان إن موقع Downdetector الشهير، واللي الناس عادة بتستخدمه عشان تعرف إذا كانت الخدمات الإلكترونية واقعة ولا لأ، اتعرض هو كمان لمشكلات في نفس التوقيت تقريبًا، بعد ما سجل انفجار ضخم في عدد البلاغات الخاصة بفيسبوك ومنصات ميتا المختلفة…
طب إيه السبب في كل ده؟
محدش عارف ومفيش تعليق رسمي من ميتا لحد دلوقتي، لكن الدلائل كلها بتقول إنها مشكلة سيرفرات ضخمة من جوه الشركة نفسها، وتحديدًا في أنظمة التحقق من الهوية واستدعاء البيانات… يعني بالعربي كده، المشكلة من عندهم مش من عندك، وعشان كده مهما حاولت تفتكس وتغير شبكة، أو تشغل VPN، أو تمسح الأبليكيشن وتنزله تاني، مفيش أي حاجة من دي هتنفع، وملهاش أي تلاتين لازمة غير إنك تستنى لما مهندسين ميتا يحلوا المشكلة ويرجعوا الخدمة بالتدريج…
لكن السؤال الحقيقي هو: يا ترى إيه اللي حصل بالضبط داخل أكبر شبكة تواصل اجتماعي في العالم عشان تقع بالشكل المفاجئ ده في كل حتة تقريبًا؟
