القبض على متحرش #الاتوبيس_الترددي ، الداخلية تتمكن من الوصول اليه بعد اقل من ٢٤ ساعة  

أحمد المصرى

الحكاية أن في ست نزلت تحكي تجربة وحشة حصلت لها في أتوبيس، وحبت توصل صوتها للناس، مش علشان تشهّر بحد، لكن علشان تقول: أنا اتأذيت

لكن اللي وجّع أكتر من اللي حصل جوه الأتوبيس، اللي حصل بعدها على السوشيال ميديا ،، بدل ما التركيز يكون على الفعل، وعلى حقها، وعلى إن اللي حصل جريـ.ـمة، لقينا أسئلة غريبة ملهاش علاقة باللي حصل: لابسة إيه ؟ وحاطة إيه في بوقك؟ أسئلة شكلها عادي، بس معناها خطير 🫣 معناها إن الغلط دايمًا لازم يتلزّق في الست، مش في اللي آذاها ،، كأن المطلوب منها تبقى مثالية علشان تستحق الحماية، وكأن كرامتها ليها شروط ❗️

🔷 الحقيقة البسيطة اللي لازم كل ست تسمعها وتصدقها: مفيش لبس يبرر تحـ.ـرش، ومفيش شكل يلغي حقك، ومفيش تعليق ليه قيمة أكتر من وجعك ، و اللي حصل جريـ.ـمة، مش رأي.

واللي اتقبض عليه مش ضحية سوء تفاهم، ده متهم بيتحقق معاه ، وأي حد ساب الفعل وركّز في شكلها، هو بشكل غير مباشر شريك في إسكاتها، حتى لو فاكر نفسه بيهزر