التوأم_الصامت  #جون_وجينيفر

إيمى عمرو

يوم 11 أبريل سنة 1963 اتولدت بنتين توأم جون وجينيفر جيبونز محدش كان يتخيل إن التاريخ ده هيكون بداية لواحد من أغرب الألغاز الطبية والنفسية اللي مرت على العالم لغز فضل مستمر سنين طويلة وانتهى بجثة وحياة جديدة

البنتين كبروا وهما نسخة طبق الأصل من بعض بس المشكلة مكنتش في الشبه.. المشكلة كانت في العهد اللي خدوه على نفسهم.

من وهما أطفال قرروا يقطعوا علاقتهم بالعالم تماما بطلوا يتكلموا مع أي مخلوق لا أب ولا أم ولا مدرسين عملوا لنفسهم عالم خاص واخترعوا لغة غريبة وسريعة جدا عبارة عن أصوات وهمهمات محدش في الكون بيفهمها غيرهم.

كانوا بيتحركوا كأنهم روبوتات متبرمجة.. لو واحدة رفعت إيدها التانية ترفعها في نفس الثانية.. لو واحدة ضحكت التانية تضحك بنفس النبرة.

ارتباطهم ببعض كان مرضي ومخيف لدرجة إنهم لما بدأوا سن المراهقة اتجهوا للسرقة وإشعال الحرايق كنوع من التسلية المشتركة وده اللي وصلهم في النهاية لمستشفى برودمور للأمراض النفسية شديدة الحراسة.

جوه المستشفى ولمدة 11 سنة الدكاترة كانوا بيشوفوا العجب.. كانوا بيتبادلوا الأدوار يعني لو واحدة كلت التانية تصوم وتجوع نفسها لأيام.. كأنهم بيقسموا الحياة بينهم بالتساوي.

وفي يوم الأمور وصلت لنقطة اللاعودة التوأم وصلوا لقناعة مرعبة كتبوها في مذكراتهم.. إحنا مينفعش نعيش سوا.. ظلنا بيغطي على بعض.. عشان واحدة تعيش وتكون طبيعية التانية لازم تموت.

وقعدوا يتناقشوا بهدوء تام.. مين اللي هتموت؟ جينيفر قالت: أنا اللي همشي.

وفي يوم 9 مارس 1993 وهو يوم نقلهم لمستشفى أقل حراسة عشان يبدأوا حياة جديدة.. حصلت الكارثة وهما في العربية جينيفر ريحت راسها على كتف أختها جون وقالت لها آخر كلمات: أخيرا.. إحنا بقينا أحرار وفي لحظة ماتت جينيفر.

الأطباء اتشل تفكيرهم، البنت كان عندها 29 سنة قلبها زي الحديد مفيش سموم مفيش مرض مفيش أي سبب طبي للوفاة غير التهاب مفاجئ في القلب ملوش تفسير كأنها قررت توقف قلبها بإرادتها عشان تنفذ الاتفاق.

والاكتر رعبا من الموت كان اللي حصل بعده.. جون -الأخت اللي عاشت- نزلت من العربية شخص تاني خالص. لأول مرة في حياتها اتكلمت مع الناس بطلاقة ضحكت بصوت عالي وعاشت حياة اجتماعية طبيعية جدا.. وكأن اللعنة اتفكت بمجرد ما نصها التاني مات.

جون قالت جملة لخصت كل الرعب ده.. أنا كنت مسجونة جوه جينيفر وهي ضحت بنفسها عشان تحررني.

تفتكروا ده كان مرض نفسي نادر.. ولا رابط روحي ملعون كان لازم يتقطع بالدم؟