وفاة الفنان الكبير لطفي لبيب بعد صراع مع المرض، عن 78 سنة

أحمد المصرى

وفاة الفنان الكبير لطفي لبيب بعد صراع مع المرض، عن 78 سنة… فنان كبير ومهم، وبطل من ابطال حرب اكتوبر، شارك في الحرب وليه كتاب عن تجربته في الحرب اسمه الكتيبة 26..

وحكي لطفي لبيب، قبل كدا تفاصيل دوره في الحرب، وقال انه كان في كتيبة 26 مشاة، وهجموا على النقطة القوية للاحتلال وكان معهم ضابط اسمه سيد البرعي وقائد الكتيبة عبدالوهاب الحديدي.. والاتنين حصلوا على نجمة سيناء من بين 27 فقط حصلوا عليها في الجيش المصري.

وقال انه فاكر كل زمايله اللي استشهدوا، ومنهم سيد عبدالرازق اللي خد طلقة رشاش في صدره وكان آخر كلامه: «حد ياخد مكاني يا جماعة”…

لسه امبارح كنت بشوف فيلم طباخ الريس، واللي كان عامل فيه دور رئيس ديوان الجمهورية، وقدر بخفة دم انه ينقل الصورة الكاريكاتيرية للمسئول الفاسد.. دا غير موقفه النبيل مع محمد شرف في فيلم عسل اسود..

محمد شرف كان هيعمل دور “السواق الاونطجي راضي”.. وحمدي محمد شرف تعب جدا وجاله مرض شديد.. وكان واضح انه مستحيل يعمل الفيلم.. واعتقد رشحوا احمد راتب.. ومش عارف حصل ايه لكن الدور راح للطفي لبيب.. فلطفي لما عرف ان الدور كان لمحمد شرف .. اشترط انه يكلمه يستأذنه.. فقالوله مش هيقدر يرد اصلا.. دا في غيبوبة.. فقالهم خلاص ياخد اجره كامل.. ودا موقف نبيل للطفي لبيب..

فقدنا فنان مهم، خالص عزائي لأسرته ومحبيه..