العالم الخفى

إيمى عمرو

 

جوزي ممثل وسبق عمل فيلم بيتكلم عن الجن اسمه عزازيل اكيد في ناس من الي هتقرا القصه سمعته .

 

اثناء تمثيل الفيلم اسم عزازيل كان بيتكرر كتير .. من كثر ما نادوا اسم عزازيل اثناء التصوير طلعلهم حاجات كتير .. واختفت حاجات كتير من اللوكيشن وترجع تظهر .

 

وفجأه المكان كله يمسكوا في بعض ويظهر اي خلاف من غير اي سبب وجيه وبعدين يهدوا واطياف تظهر وحاجات كده كتير .

يعني يعرف وفاهم ممكن يواجه ايه .. مش هنا الحكاية .

 

الحكاية ان اولادي في يوم كنا بنتعشى وقالولنا انهم لما بيبقوا سهرانين واحنا نايمين بيلمحوا طفل بيجري من المطبخ لاوضه معينه في البيت وبيروح وبييجي في المطبخ .. وانهم بيلاقوا كورة قدم احنا شايلينها فوق الثلاجه تقع لوحدها يرجعوا يحطوها فتقع تاني ..

 

فجوزي عشان ما يخليهمش يقلقوا او يركزوا في الموضوع قالهم ان كل دي تهيأت ..

 

ولما خلص اكله قام واخد طبقه في ايده عشان يحطه في المطبخ.. فدخل المطبخ وكان مظلم تماما .

 

وهوا لسه عالباب عمل كانه بيتكلم مع طفل صغير يعني باصص للفراغ كده وبيقوله ماتبقاش تلعب بالكوره تاني واحنا نايمين وماتقعدش تجري شمال ويمين الولاد خافوا وياله يا عم من هنا وبحركه هزار قال يعني بيشوطه برجله بحركه خفيفه كده ..

 

المهم ان لون الحيطه عندنا في الريسيبشن نبيتي غامق .. فجأه وبدون اي حد ما يتحرك كنا كلنا قاعدين خمس اطفال واخته وانا وهوا لاقينا على اول الحيطه من تحت السقف على طول يعني مانطولهوش الا لو وقفنا على حاجه عالية او سلم ..

 

قسما بالله لاقينا كفين شمال ويمين بالشكل ده 🖐 على الحيطه ولونها ابيض زي ما يكون محطوطه في اسمنت ابيض او دقيق ايوه زي ما بقولكم كده بالظبط .

 

المشكله كانت ان حجم الكفين اكبر من اي كف شوفناه كف عملاق والله العظيم ..

 

خوفنا واتخضينا لانه كان منظر يرعب اي شخص ويموته من الرعب كمان لو قلبه خفيف ..

 

ساعتها كلنا بصينا لبعض وجوزي افتكر ان حد عمل مقلب فطبعا لا .. لان كلنا قاعدين ومحدش وقف على حاجه او اتحرك من مكانه اصلا وكمان الحجم مش طبيعي ..

 

كلنا فضلنا نحاول نفسر طب منين طب ازاي حوالي خمس دقايق .. الاولاد اكبرهم كان ١٢ سنه والاصغر كان ٧ وانا وهوا واخته .. كلنا شفناها ..

 

المهم بعد شوية بنشوف تاني وسبحان الخالق مفيش حاجه اختفى الكفين زي ما ظهروا 😑 وكلنا يومها من الرعب نمنا في اوضه واحده والله العظيم..

 

ولحد دلوقتي انا تفسيري الوحيد ان ده من عمار البيت وحب يثبت لجوزي انه مش طفل صغير زي ما كان بيكلمه في المطبخ ..والله اعلم