نصائح هامه فى المطبخ

إيمى عمرو

شوية نصائح مهمه هتفرق معاكي جدا

 

رشه السكر الخفيفه جداً ع الصلصة بيقلل حموضه الطماطم وبخلي الطعم متوازن

 

غسيل الفراخ بالخل بيخليها تاخد وقت اكبر في السوا ..

 

كتر البهارات بيضيع الطعم الأساسي للأكل

 

لما برش الفلفل الاسود ع البصل وهو نصف تحميره بيخلي ريحته وطعمه شبه اكل امهاتنا زمان

 

اي اكل بيتذكر عليه أسم الله بيطلع جميل وفيه بركه

 

تنظيف المطبخ اول باول بيحسسني براحه نفسيه

 

بحمر دقيق البشاميل بالزيت ولما بطفي عليه بحط معلقه زبده بيبقا أخف اكتر

 

لما تعملي الكيكه وحطي السوايل ع الجاف متقلبيهاش كتير عشان دا بيبقا سبب للفرغات الكبيره اللي جوه الكيكه

 

السمنه مع الزيت ع الرز بيخليه أحلي بكتيررر من السمنه بس

 

رشه الزعتر ع الصلصة بيخلي طعمها رهيب خصوصاً صلصه البيتزا والمكرونة

 

اوعي تستخدمي معلقه مبلوله ف برطمان الصلصه

 

لما بهدي النار على الاكل وهو بيستوي بيبقي أحلي واطعم

 

رشه الفانيليا ع اي عصير بيخلي طعمه وريحته حلوه اوي

 

لما بخلص خليط الكيك اخر حاجه بعملها بحط أقل من ربع معلقه كربونات مع معلقه خل وبحطهم ع الكيك دا بيخليها تنفش اكتر واستحالة تهبط منك

 

متمسكيش الحاجه السخنه بقماشه مبلوله لانها هتوصل الحراره

 

كل كام يوم بغلي مياه في براد الشاي وبحطه في الحوض وبحط فيه معلقه كربونات مع خل بيفور وبينظف البرد الاستنلس من جوه ومن بره كمان

 

لما ببدا في تنظيف البيت ببدا بالمطبخ والحمام الاول

 

واخيرا وليس اخراً اذاعه القران الكريم في المطبخ سحر للراحه النفسيه وانتي بتطبخي