كنت مطلقه3 سنين ومعايا طفلين وكنت عايشه لوحدى.

 

نزلت اشتغلت في شخص شافنى فى شغلى وهو كمان منفصل اتقدم لى وانا رفضت كنت خايفه اخد خطوة الجواز واهلى كمان رفضوا

بعد سنه ونص تقريبا اتقدم تانى وكلم زمايلى علشان يقنعونى وقالهم انا بحبها ومش هتجوز غيرها وفعلا جه اتقدم واهلى حاولوا يمشوة قالهم بحبها وهعمل كل إلى تطلبوة

انا كنت ساكنه فى شقه ايجار صاحبها كان عاوز يمشينى علشان يبعها والدنيا كانت غليت عليا وخايفه الاقى نفسي في الشارع خصوصا انى كنت عايشه لوحدى محدش بيسال عنى ولا حد بيعطينى جنيه كنت معتمدة على نفسي الحمد لله. المهم وافقت وأهلى وافقوا. قولتله شرطى تجيب لى شقه ايجار جمب اهلى علشان ولادى لانه من بلد تانيه وعفش جديد .وفعلا جاب. اتخطبنا 7 شهور

واتجوزنا.

تانى يوم جواز ضربنى وعورنى فى وشي. وكان بيتكلم كلام غريب زى روحى البسي هدومك متقعديش معايا كدة ويبرقلى انا خوفت وعيطت قالى بتعيطى ليه قولتله ايه الى انت بتقوله دة ينكر أنه قال كدة ومش فاكر

لحد ما لقيتوا بيقولى أنه معموله عمل من طليقته ولقيتوا متابع مع شيخ من زمان وحكيلوا عنى كل حاجه والشيخ دة قاله مراتك كمان معمولها عمل والشيخ دة حالنا البيت وانا اخدت رقمه وكلمته قالى معموله سحر شديد وهيبقي كويس

وحماتى جاتلى البيت واتكلمت معايا وقالت لى متعرفيش حد بس هو بيعاملنى حلو يومين ويرجع يتقلب عليا من غير اسباب ويضربنى ضرب جامد لحد ما يعلم جسمى وبعدها يقولى تعالى اخرجك وافسحك وانا طبعا مش بوافق.

وكمان طلع بخيل.من كام يوم ضربنى بعصايه المقشه وعضنى وكان هيخنقنى بالعصايه وطردنى وكل مرة يهددنى بالطلاق.

بيشتمنى شتايم وحشه وسب دين ويغلط فى امى .

وانا بصراحه برد عليه لما يغلط فى امى .

وفجاءة الاقيه بيكلم نفسه وبيبص للحيطه ويقول خلاص متدخلش بينا

أقوله انت بتكلم مين يقولى قريني ويقولى فى حد عدى من وراكى روحى شوفيه

بس انا حاسه انه بيستهبل

حاسه انه موهوم بالأعمال.

انا عملت فيه محضر اهلى عاوزين يطلقونى وانا نفسي اعيش مطلقش تانى موجوعه من إلى حصل زعلانه علشان هونت عليه وصعبان عليا نفسي متجوزة من شهرين بس.

مش عارفه اعمل ايه

 

رد بريد قراء بوابة العاصمة

ياريت تعرفي السكة الصح طالما بيكلم حد يبقي مريض ضلالات والطب النفسي موجود ده لو متعالجش ممكن يؤذيك أو اطلقي انفدي بجلدك كان لازم تسالي من ناحيه طليقته اصلا أطلقوا ليه.

يمكن مريض فصام وأطلقت لنفس السبب.

بلاش تكملي اهلك صح.

وممكن ياذي حد من ولادك مش انتي بس