مطلوب عروسة

 

 

إيمان العادلى

 

الحلقة الثامنة عشر

 

حمادة خلاص شبع مقالب من جنس حواء بلا عرايس بلا هم

مالها حياة العزوبية يعنى حرية ومتعة ودلع على الأخر وسفر وخروج ولا حد يقولك رايح فين ولا خد كيس الزبالة وأنت نازل فى إيدك و ٠٠٠٠٠٠٠

 

الحاج محمود : حمادة أيه أخبار العرايس معاك اليومين دول

 

حمادة : مفيش أخبار ولا أهرام انا خلاص كرهت نون النسوة يا بابا

وأعتزلت الملاعب قصدى الجواز

 

الحاجة أميمة: لأ لسه بدرى على الأعتزال يا حمادة لسه قدامنا ماتش كمان ههههه حتروحه وبعدين تعتزل

 

حمادة : أه بتلقحى أنتى على عروسة جديدة يا ماما قولى مين يلا خلينى أخلص قبل ما تقلبى وأبقى الواد العاق

 

الحاجة أميمة : شاطر يا حمادة بص بقى واحدة زميلتى فى الشغل قالتلى على عروسة حلوة وأهلها ناس كويسين وطيبين وأخواتها من حلاوتهم بيتجوزوا بدرى وماشاء الله مخلفين وعيالهم كتير وأنا قلت لأبوك وخدنا ميعاد الخميس الجاى وخد ال300ج جيب تورتة حلوة

 

حمادة : ماشى يا ماما توكلنا على الله علشان ترتاحى وترضى عليا

 

وهوبه ٠٠٠٠٠

الحاج محمود : رن الجرس يا أبنى ربنا يجعلها من نصيبك لو فيهم الخير

 

أبو العروسة :يا اهلا وسهلا بيكم اتفضلوا أتفضلوا يادى النور

 

الحاج محمود: منور بيكم ياحاج أسامة

 

حمادة : أهلا يا عمو بحضرتك

 

أم العروسة :يا اهلا وسهلا بيكم منورين والله وعريسنا منور الدنيا

 

وعدى الوقت و٠٠٠٠

 

حمادة: الناس شكلهم طيب اووى وعلى نياتهم وكمان أخوات العروسة حلوين اوى بس غريبة متجوزين وعيالهم كبار ومش باين عليهم ماشاء الله زى ما يكونوا أخوات مش ام وولادهم و ٠٠٠٠٠

 

الحاجة أميمة : والله قعدتكم حلوة والواحد خد عليكم بس ما تعجلى لنا بالعروسة نشوفها ربنا يجعلها من نصيب حمادة

 

أم العروسة: أسم الله عليكى يا حاجة العروسة قاعدة من بدرى معانا أهى قومى أقفى يا سهى خلى الحاجة والعريس يشوفوكى

 

حمادة : أيه ده يا ماما دى عيلة من العيال اللى قاعدين من بدرى عروسة أزاى دى

 

الحاجة أميمة: عروسة ايه دى متأخذنيش يعنى دى طفلة عيلة صغيرة متجيش أولى ثانوى حتى

أنتى متأكدة معندكيش بنات تانى نشوفها غيرها يعنى بنت أكبر منها شويتين تلاته

 

ابو العروسة : هى دى العروسة ياحاج قمر اهو وبنت صغار وتاخدها تربيها على عجب عينك يا أ حمادة كل أخواتها أتجوزوا كده 16 سنة جوزات زى الفل وأهو عيالهم طولهم

 

الحاج محمود : بس دى قاصر ولسه طفلة وحرام عليك وعلينا تتجوز دلوقتى ولا تشيل مسؤلية بيت وجوز وولاد

 

ام العروسة : مسؤلية ايه أللى متعرفش تشلها دى ما أخواتها اهو فاتحين بيوت وزى الفل وجوازهم طايرين بيهم وبعدين البنات مسيرها للجواز والبيت وخلفة العيال والجواز الصغير حلو لك ولها

 

الحاجة أميمة : لا أنا مرضاش أظلم طفله ولا أبنى كمان ولو كنا عرفنا سنها قبل ما نيجى مكناش خدنا ميعاد ولا جينا

 

ابو العروسة : ياجماعة ده سلو بلدنا وعيلتنا البنات تتجوز من السن ده وأقل كمان متزعلوش نفسكم أحنا لو أتفقنا وأرتحنا لبعض حنتمم الجواز زى ما أنتم عاوزين بس حيبقى عرفى لحد ما تكمل 18 سنة ونعقد رسمى وحنكتب قايمة وحنجيب شبكة وكله و٠٠٠٠٠٠

 

حمادة: أنا بعتذر لك يا حاج أسامة عن الجوزاة دى مقدرش أتجوز طفلة صغيرة لسه قاصر انا ضد الانتهاكات دى أصلا دى طفلة ياناس ارجوك سيبها تكمل تعليمها ومتحرمهاش منه خليها تعيش أيامها صح والجواز قاعد مستنى حيروح فين

 

أبو العروسة : يعنى أفهم كده يا أ احمد ان العروسة معجبكتش و ٠٠٠

 

الحاج محمود : أستنى أنت يا حمادة حرد انا علشان نلحق نمشى

ياحاج أسامة العروسة قمر وانتم ناس زى الفل ونسب يشرف لكن بنتك طفلة وأحنا منقدرش نشارك فى الذنب ده وبنستسمحك انت كمان تسيبها تكمل تعليمها ينوبك ثواب

 

ابو العروسة : شرفتونا والله بس للأسف مفيش نصيب

 

حمادة : السلامو عليكم وربنا يهديكم

 

وأستنونى بكرة وحلقة جديدة