مطلوب عروسة

الحلقة الأولى

 

إيمان العادلى

 

 

حنحكى هنا موضوع ظريف جدا

الزواج

هو عموما من اكتر مواضيع البحث و الدراسه و السخريه و النكد فى نفس الوقت ليه

لأن كل بيت عروسة هو حالة فريدة فى نوعها وبيمثل مجتمع لوحده و كل جوازه و ليها ظروفها.

يعنى مثلا ممكن نلاقى راجل البيت مثلا هو الراجل مالك مستغرب ليه فعلا قصدى الراجل

وفى بيت تانى راجل البيت تبقى مراته أه والله زى ما بقولكم كده

وبالتالى كل عروسة مختلفة عن التانية والغريب بقى أن كل البيتين سعداء

المهم حنحكى كل يوم عن عريس وهو يا عينى متبهدل فى بيوت العرايس عروسة عروسة

البيضة والسمرة والحلوة والوحشة

والفرفوشة والنعنوشة والنكدية يا ساتر يارب

وحنتابع رحلة علبة الجاتوه وهى داخلة وخارجة

بص يا سيدى وأنتى يا ستى أنا نسيت أعرفكم بنفسى أنا شاب ثلاثينى مسمسم وأنفع كده يتكرش عليا بلغة اليومين دول

أحم أحم المهم أنا أسمى أحمد ومعنديش مانع تقولولى يا حمادة

أبويا الحاج محمود راجل عسل وجميل بس عيبه عاوز يفرح بيا ويشوفنى أعوذ بالله عريس

وأمى بقى الحاجة أميمة ملهاش غير دعوة واحدة ليل نهار ( يارب يا أبنى أشوفك عريس وأشيل عيالك )

وأختى بقى الأنسة أميرة هى عسلاية برضه لكن معندهاش بصيرة خالص كل حاجة بتشوف عكسها بس فى الأخر أختى

وبصراحة أنا قررت أحقق لهم أمنياتهم

وقررت أدور على عروسة ( زى ما هما عاوزين )

وقررت أكتبلكم كل يوم عن معاناتى فى بيت كل عروسة

يمكن تتعظوا ومحدش يتجوز

 

عموما أستنونى كل يوم

 

أستنونى بكرة وأول عروسة