بعتذر
خالد المنصوري /مصر
بعتذر أنا لكل اللي زعلتهم
ومش قادر اروح اعتذرلهم
اللي مش بيفتكروني بخير
وبكل خير انا بفتكرهم كلهم
بعتذر على كل جرح سببته
في قلوب عمرها ما جرحتني
لو تعرفوا ان الندم صاحبته
والدنيا بعدكم ولا مرة ريحتني
بعتذر لكل من اخلص لي وسبته
وتفيد بإيه كلمة آسف وياريتني
بعتذر يا أمنياتي اللي فاتت
بعتذر يا ذكرياتي اللي فاتت
شفتكم بتنتهوا قدام عيني
ما عملت حاجة وفضلت ساكت
بعتذر يا قلبي اني علقتك ف أحبة
علقوك في جروح ما ينفعلهاش أطبة
وإني بعدتك عن ناس بتحبك
وقربتك من ناس في حضنهم حسيت بالغربة
خالدالمنصوري
