بيتنا الكبير
بقلم: د. باسم موسى
…
يا بيتنا الكبير…
حبيبي يا بيت
ياللي فيك ياما بحبك ارتويت
فتحت عيني ع الدنيا فيك
و للحياة منك خطيت
وابتدت فيك قصتي
عرفت معنى فرحتي
ولما جه يوم ما انتهت
من قلبي… من روحي بكيت
يا جزء مني ومن كياني
يا شقيق لعمري
يا أحلى بيت
فاكر قعادنا في المغربية؟
تشوف معانا التمثيلية؟
و ضحكة صافية
حنية دافية
ونكتة حلوة و معدية
فاكر شعوري يوم ما سبتك؟
حسيت يوميها بمعنى شيبتك
ازاي يا بيت شعرك يشيب؟
(شوفتك يا بيت..)
صورتك في قلبي حتملا غيبتك
يا بيت لعمري أنا عشت فيه
الناس تغير الحلو ليه؟
تغيير في شكلك
لونك…. ملامحك
احساسي بيك، انا حزين عليه
ضاع ويا تغيير الملامح
أنا مش لاقيه
بأتمنى يوم من ذكرياتي
يرجع حقيقة
دي أمنياتي
نرجع سوا لنفس الزمان
بنفس احساسنا اللي كان
بنفس لمتنا وصحبة كانت منورة في المكان
بتيجي على فكري ليلاتي
يا جزء من أصل حياتي
يا عشرة من عمري كتير
يا حبيبي يا بيتنا الكبير
