بيقولوا من زمان إن الجدعنة فيا .
أصل أنا بنت أصول ومتربية .
عشت مع أبويا وأمي في بيت صغير مع عيلة قروية .
قروية يعني بساطة وأحترم الصغير وكلام الكبير يمشي عليا .
أحب أخدم أهلي من قلبي من غير ماتتكسر عنيا.
أسمع كلام أخويا حتي لو أصغر مني وعمر ما ايده اتمدت عليا.
إتعلمت في مدارس حكومية وذاكرت والمقشة في ايديا .
لا عمري كليت ولا ندمت علي أصلي حتي لو دخلت الجامعة الأمريكية .
حلوة بأدبي وأخلاقي ولا بعوج لساني حتي لو قالوا عليا فلاحة شوية .
أتجوز فقير أتجوز غني أفضل معاه أفضل معاه لحد مايفرجها ربنا القوي .
أكلي بسيط وعيشتي أبسط مانا إتعلمت الكلام ده في الكتاتيب.
أملي كبير وحلمي أكبر إن ولادي
يستروني لما أكبر
ماهو علمتهم علي الشهامة والأصول وقولتلهم أصل المبادئ ماتتجزأ.
وعلمت بنتي إن حجابك حتة منك الكلمة من لسانك لجام ليكي ولأي إنسان .
قبل ماتقوليها تفكري فيها وقبل ماتضحكي تختشي .
سيرتك حياتك وحياة أولادك من محياكي لمماتك .
ماتبصيش لفوق وبصي قدام عينك .
إلي فوق بعيد عنك لكن الي قدامك ممكن يكون في يوم من نصيبك .
إرضي بالي ربنا مدهولك ده لو رضيتي بيه ربنا هيصونهولك .
وعلمت إبني الولد إزاي تكون لأمك وأبوك وأختك وأهلك سند.
مش بالزعيق ولا الضرب ولا بالشنب .
الرجولة مش محتاجة خيل ولجام .
الرجولة محتاجة حب العباد .
الي بيجي بالرضا وفهم تعاليم الرحمن .
كمل ياولدي مشوار جدك وأبوك وراعي ناسك وأعرف الأصول .
عمر الإنسان مش بالمال ولا القصور .
عمره بسيرته وقفته جنب الغلابة ومجالسته لأصحاب العقول .
جلبيتك مش عار وعمتك والسروال .
إوعك تمشي ع الموضة وتقطع البنطال .
كدة هيبتك راحت وسط الرجال.
ويوم ماتحب حب بنت بلدك إتربت زيك وماتنساش إنها هتبقي أم العيال .
العيال الي هتشيل إسمك وتعليه للعنان .
وبكرة تقول يأمي كلامك كان ياقوت ومرجان