10نصايح لصيام طفلك فى رمضان

• كتبت  : سماح فتح الله

1. بلاش ضغط على الأطفال .. الأطفال مش بالغين مش واجب عليهم أصلاً صيام ولا صلاة … احنا بس بنشجعهم عشان يتعودو مش أكتر !

2. السن المناسبه لبداية تشجيعه على الصيام من أول ما يبدأ ” يميز ” أيوا يعرف الصح والغلط والعيب .. يعنى ٦ سنين #بشرط تيجى منه هوا انه يقولك انا عاوز اصوم زى بابا أو ماما .. إنما نبدأ نطلب احنا منه على سن ١٠ سنين .. لإن ده السن اللى يقدر ” يتحمل الصيام ” وبرضه كل طفل وليه طاقته ومن غير إجبار .. هوا لسه مش واجب عليه يصوم !

3. نبدأ بإيه ؟؟ أول حاجة يتسحر معانا و نعوده يقطع الفاكهة .. يغسل طبق مع ماما .. يساعد فى وضع الأكل على “السفره” الحاجات دى صدقونى بتعمل جو بهجة جميل جداً وبتشجع الأطفال وبتدى روح للصيام – هما أصلاً صعب يفهموا الحكمة كامله فى السن ده .

4. بعد كده الأطفال من ٥-١٠ سنين صيامهم يكون متقطع .. إياكى تجبريه يصوم زينا ١٣ او ١٦ ساعه متنسوش ان الأطفال فى الحر ده عرضه للجفاف أكتر من الكبار ..

5. هقولك على كام طريقة ممكن تفيدنا ونختار منها :

* صيام قبل المغرب ب ٣ ساعات – صيام من العصر للمغرب – السنة اللى بعدها من الضهر للمغرب – لما يعدى ١٠ سنين ويستحمل الصيام ممكن “نجرب” يصوم معانا ،، بلاش صيام من الصبح للضهر ده عشان وجبة الفطار أهم من الغدا ?
* صيام انتقائى : صيام عن الأكل بس . انما يشرب براحته . تانى هفكركم ان مش عشان نشجعه نجيبله جفاف !!
* صيام يوم اه ويوم لأ . أو صيام خميس وجمعه .

كل دي أفكار عشان نعودهم عالصيام ونقرب فكرة العباده منهم وأكيد مع الوقت الطفل هيحب يقلد ويصوم صيام كامل .

6. المشاركة فى إعداد إفطار صائم .. وتفهيمه إن” من فطر صائماً كان له مثل أجره غير أنه لا ينقص من أجر الصائم ” فميزعلش انه مفطر عشان هياخد ثواب .

7. التركيز على إن الأهم من صيام الأكل والشرب .. صيام اللسان عن الشتيمة والصوت العالى .. صيام العين عن الحرام والعورات … صيام الإيد عن الضرب والسرقة .. وهكذا .. فيكون رمضان تعويد ليه على الأخلاق لغاية ما يكبر ويقدر يصوم صيام كامل.

8. اللعب وهوا صايم ؟؟؟

مننساش إن مش معنى انه صايم يتحنط فى البيت !! لأ ينزل ويلعب مع أصحابه بشرط .. نتأكد انه مش هيلعب فى عز الحر عشان الجفاف . ولو مصر هينزل يلعب يبقى نكسر الصيام و يشرب مياه . مننساش إن أحيانا أطفالنا بيرجعو من المدرسه -وهما نازلين صايمين- بيرجعوا عالساعه ٣-٤ ويكملو لعب من غير غدا لغاية ٦-٧ المغرب ودى مأساه ! ممكن إنخفاض السكر يدخلهم فى إعياء شديد ..!

9. بلاش الله يكرمكم يا فاطر رمضان يا خاسر دينك الكلب الساعرااان هيقطع مصارينك دى عشان الاطفال العنديه هتعند ومش هتاكل ولا تشرب مش مسابقة هيا ?

10. لمة العيله والأسره والحضن الدافى عالفطار بالدنيا كلها عارف انه صعب بس لو نقدر نقفل التليفزيون واحنا بتفطر ونخلى ده وقت العيله يبقى تمام جداً ?