بحب صباحها

بقلم مصطفى سبتة
بحب صباحها من
كلمة وحدوتة
ولما توشوشنى
صباح الفل يا حبي
بحب كمان من غمزة
كدة بعنيها وحاجبها
ومن غمضة تقولي
بحبك يا ننى ويا عينى
بحب كمان ايديها لما بتلمس
خدود وشى وجبيني
وتنكشلى كمان شعرى
ولما تقول بموت فى نظرة
من عينك يانورعيني
وكل دا عشان اصحى
واقولها صباح جميل
زيها واناصاحي
وانكش شعرها بأديا
واخدها فى حضنى
واقولها يا اغلى من روحى
يا كل حياتي وحبايبى
يا هدية من رب السما
وناخد فى الكلام دا يجى
ساعات وساعات وزيادة
ولا كلامنا الحلو خلصان
ولا صحينا ودى عادة
بحب كلامها وسكوتها
وهي تحبنى صاحي
ومش نايم بعيدعنها
و تعشق رغى وانا صاحي
وبرطمتى وانا نايم
وبتفك الطلاسم من غمغمتى
وانا مش صاحي ولا نايم
و تضحك ضحكتها تخلينى
افوق دغرى انامن نومي
واموت واعرف قولت انا ايه
ومش واعي وانا نايم
وتضحك ضحكتها تخلينى
اقولها صباحوووو احلى
من صبحى ومن ظهرى
بحب صباحها من كلمة وحدوتة
ولما توشوشنى وتقولى
صباح الفل يا حبي صباح الفل