يوميات زوجه صايمه ٣ الحلقة ٧ بقلم سهير عسكر بواسطة bwabt 0 شارك -عمااااد…ياعمااااااد….إصحى ياعماد -ايه يامها فيه إيه؟ حد يصحى حد بالطريقة دى…حرام عليكي يا شيخه -أومال عايزنى أصحيك ازاى..قوم فِز كفاية نوم..انت عارف الساعة كام؟ -انتى نسيتى ان النهاردة أجازتى؟! – لأ منسيتش – أومال مصحيانى ليه؟! – قوم هاتلنا الخضار واللحمه عشان ألحق أعمل الفطار،وهات العيش،وتعالى ركبلى الأنبوبة،وانت راجع عَدى على شركه المية إدفع الفاتورة المتأخرة لحسن يشيلوا العداد،وخد الزبالة فى إيدك وانت نازل….آاااااه هات لبن وبيض للواد وبامبرز عشان عنده إسهال – يافتاح ياعليم يارزاق ياكريم…طاب روحى وأنا هقوم – عمااااااد…إنجز وقوم -أعوذ بالله منك ياشيخه..حاضر هتنيل أهه…الله يلعن أبو الجواز ع اليوم اللى إتجوزت فيه -بتبرطم تقول إيه؟ -بقول حاضر هقوم أهه وبعد قليل – إنت لسه جاى …عارف الساعه كام؟! أطبخ امتى انا بقي؟؟ – فين مفتاح الزفت الأنبوبه – أنا عارفه…دَوَر عليه – كل حاجه ضايعه فى البيت ده…الواحد حاسس إنه عايش فى سيرك وبعد السحور – عماد. ياعمااااااد – بطلى إسلوبك ده…عارفه لو ناديتى عليا بالطريقة دى تانى مش هرد عليكي،وإيه الربطه اللى عملاها دى؟ دا منظر ده؟! – ايه …عندى صداع… بس تعالى صلح حنفية المطبخ…عماد أنا بكلمك…انت مالك مبحلق فى السقف كده ليه؟! وبتضحك على ايه؟ – بضحك على نفسي – انت اتجننت وللا إيه؟ – بفتكر لما كنت هتجنن عليكى زمان وكنت هموت واتعرف عليكى – أيوة طبعاً..كنت هتموت وكنت بتبعتلى جوابات وبتتصل كل يوم وتعاكسنى وتوقفلى بالساعات تحت البيت…فاكر لما أخويا ضربك؟ – هو دا بس اللى فكراه…الواحد كان عبيط – ليه ان شاء الله؟! – كنت فاكر إن الجواز حلو ،وهنقعد طول اليوم نجرى ورا بعص زى الأفلام ،ونضرب بعض بالمخدات المحشية ريش نعام – وأنا كمان…كنت فاكره انك هتجيبلى كل حاجه نفسي فيها وهتقولى كلام حلو طول الوقت،وهتخرجنى وتفسحنى كل يوم – هو احنا بقينا كده ليه؟! – كده اللى هو ازاى يعنى؟ -طول اليوم زعيق وخناق وصوت عالى – مش عارفه؟؟ – ماتيجى ناخدلنا اسبوع وللا اتنين أجازة نسافر فيهم ونغير جو نبعد شوية عن الشغل والبيت والضغوط – فى رمضان؟! – وايه يعنى.. انا معايا قرشين كنت شايلهم للظروف..تعالى نسافر بيهم ونعيشلنا يومين – يانهارك اسود..إنت بتحوش من ورايا – ياساتر عليكى – ومعيشنا فى قحط ،وأتاريك معاك فلوس – هو فين القحط ده؟…دا انتى إيدك مخرومه..نفسي مرة أكلمك وتردى عليا بإسلوب حلو… إهدى شوية …اومال فين كلامك الناعم الجميل اللى كنتى بتقوليه أيام الخطوبة – آاااا…ماهو انت اللى بتستفزنى ياعماد – فين مها الرقيقة الهادية الكيوت …اللى كان كل شباب الحته هيموتوا عليها – خلاص …حقك عليا…آسفه يابيبي – طاب ماتيجى نسافر بقي – ماشي ….بس…..حضانه عمر – ياختى هو هياخد الدكتوراه،وبعدين إحنا مشةهناخده خالص…سيبيه عند أمك – ماشي….طاب و – ايه تانى؟ – وقسط الجمعية بتاع أم محمد؟! – حد يدخل جمعية بالإسبوع…انتى بتستهبلى يامها؟ سيبيها مع أى حد – بس…..انت نسيت قسط التلاجه والسخان الجُداد ،والقرض بتاع بنك اسكندرية اللى سحبناه …معاده الاسبوع الجاى – يابنتى هو إحنا مهاجرين…نسيب الفلوس لأى حد يدفعهم لحد مانيجى،وفكى القمطه اللى على راسك دى…ايه ده؟ ايه ريحه البصل والتوم دى – مش كنت بجهز السحور – حد يعمل مسقعه ع السحور وفول بتقليه – اومال هعملك ايه ياعين امك؟ آااا ….أقصد يابيبي – طاب روحى بقي جهزى الشنطة عشان نمشي الصبح – أجهز ايه ياحسرة…هو انا حيلتى حاجه…هات ألف وللا اتنين من الفلوس اللى معاك…أجيب بيهم هِدمتين زى الناس ألبسهم – حااااااضر – تسلملى يابيبي…وبقولك ايه. ابقي زود مصروف البيت٥٠٠جنية كمان – ليه بقي ان شاء الله؟؟ – عشان أجيبلك ريش النعام اللى هتنضرب بيه – تصدقى …انا غلطان إنى بكلم واحدة زيك أصلاً…غورى من وشي…اطلعى برة ومفيش سفر – والفلوس اللى معاك؟؟ – ومفيش فلوس ،وإوعى تصحينى تانى…برررررررة وبعد قليل – ياعمااااااد….عماااااد – يابنت ال…….. بتصحينى تانى.. والله لأطلقك …فيه ايه يازفته؟ – الواد ياعماد…عمر…سخن أوى – عمر…ابنى حبيبي…مالك ياحبيب بابا..الواد ماله يامها..مش بينطق ليه – فوقه معايا ياعماد…هات الكمادات اللى فى التلاجه…بسرعه ياعماد – خدى أهه ….امسكيه معايا كويس – رد على ماما ياحبيبي ….عمر – ماتخافيش يامها..كفايه عياط – الحمد لله…آهو بدأ يفتح عينه أهه..ألف حمد وشكر ليك يارب…روح ياعماد نام انت شوية عشان تلحق تروح شغلك – انام ايه…انا مش رايح بكرة ….روحى انتى ارتاحى شوية وأنا هقعد بيه..انتى حامل وتعبانه واليوم كله واقفه على رجليكى – لا ياحبيبي ..انا كويسه..انت اللى تعبت النهاردة وطلعت ونزلت السلم كتير – يابنتى انا كويس – لا ياعماد عشان خاطرى ارتاح انت – ماشي..تصبحى على خير وفى الصباح – صباح الخير ياحبيبتى..عمر عامل إيه؟ – الحمد لله بقي كويس خالص،وبيلعب أهه – طاب روحى ارتاحى انتى – ماشي..ماتنساش تجيب الخضار والفاكهه ،وخد صلح الريسيفر دا وإنت جاى .الواد بوظه…آااا وخد الزبالة معاك ،والعيش إوعى تنسي العيش..إخلص انت لسه واقف وللا لازم انا اللى أعمل كل حاجه بنفسي…ماهو أصل انا الخدامة اللى جابوهالك – يافتاح ياعليم *****يتبع**** شارك هذا الموضوع:فيس بوكXLinkedInتويترTelegramWhatsAppمعجب بهذه:إعجاب تحميل... مرتبط 0 شارك FacebookTwitterWhatsAppالبريد الإلكترونيLinkedinTelegramطباعة
يجب عليك تسجيل الدخول لكتابة تعليق.