نصائح العاصمة
إيمان العادلى
مخاطر الكلور
الفتره دي اغلب الناس بدأوا يستعملوا الكلور في تنضيف كل حاجه تقريبا بسبب ڤيروس كورونا ولكن يجب اتخاذ الاحتياطات اللازمه عند التعامل مع الكلور لانه ماده سامه لها مخاطر صحيه
?- ممنوع الكلور مع الصابون :
ممنوع خلط ولو نسبه بسيطه من الكلور مع صابون المواعين وغسل الاطباق و الكوبايات لانه خطر جدا على الصحه و بيسبب الفشل الكبدي و تآكل الاغشيه المخاطيه مع التكرار و دخوله للجسم وحتى بعد غسل الكوبايات الكلور بيفضل فيها و صعب يطلع الا مع مرور وقت و كميه كبيره جدا كمان من الميّه.
?- ممنوع الكلور فى مكان الغذاء :
الكلور نستعمله في الحمامات او ارضيات المطابخ و ممكن مسح ارضيات البيت بنسبه بسيطه مخلوطه بكميه كبيره من الميّه لكن التحذير ان ما يتمسحش او يترش بيه مباشرة حتى لو مخفف ترابيزات الأكل او رخامة المطبخ او اي مكان ممكن تطوله مواد غذائيه او خضار و لحوم ، زي ما قلنا مادة الكلور سامه و غلط جدا تختلط بأي اكل الانسان ممكن ياكله.
?- ممنوع استعمال الكلور على الجلد :
استعمال الكلور على الجلد بيسبب التهاب في الجلد بنسبه عاليه و اكزيما ولو لمست ايدك عنيك او انفك بيحصل تهيج و تآكل في الاغشيه المخاطيه الموجوده فيهم !
طبعا بديل تعقيم الايدين هو الكحول و الي تركيزه بالنسبه المسموح بيها (٧٠٪ او ٨٠٪) و يترش على مناديل مبلله او ممكن يترش مباشرة على الايد و يترك دقيقه و تشطف ايدك بميه نضيفه قبل الاكل طبعا.
و عند التنظيف بالكلور لازم استعمال جوانتي مطبخ او انشالله جلافز طبي المهم الجلد ما يحتكش بالكلور ابدا.
?- ممنوع استنشاق الكلور :
الكلور ماده ريحتها نفّاذه جدا الاقتراب منها بمسافه قصيره و التعامل معاها مباشرة بيعمل ضيق تنفس و هياج للأغشيه المخاطيه و التنفسيه وبالتالى بتعمل دوخه و غثيان و كحه ممكن توصل لإلتهاب الرئه.
و طبعا ممنوع خلط الكلور بمواد اخرى زى الفلاش وغيرها من المطهرات لان التفاعل ده بينتج عنه مواد خطره جدا ممكن تؤدى لتوقف التنفس خصوصا لو فى مكان مقفول عشان كده التهويه الجيده مهمه جدا اثناء التعامل مع الكلور.
واخيرا منظمة الصحه العالميه قالوا طالما عندك صابون و كحول ف هيقتل فيروس كورونا يعني بلاش مبالغات في تنضيف الجلد ولا تلجأ للكلور ابدا في التعامل المباشر مع الجلد وخد احتياطاتك عند التعامل مع الكلور بشكل عام.
يجب عليك تسجيل الدخول لكتابة تعليق.