مطلوب عروسة
الحلقة السادسة
إيمان العادلى
بصوا بقى بعد حكايتى مع البنت اللى 3 فى 1 اللى أسمها مى
وأنى صدمتها فى مشاعرها ومردتش عليهم قررت أنى أخد هدنة محارب وأرتاح من موضوع الجواز ده وهوبه ٠٠٠٠٠
الحاجة أميمة : واد يا أحمد يا حمادة رزقك فى رجيلك يا واد اما أنا لاقيتلك حتت عروسة جمال أيه وحلاوة أيه
حمادة : تااانى يا ماما
انا فى هدنة محارب بلا عرايس بلا زفت تلاقيها زى اللى قبلها كلهم
الحاجة أميمة: يا واد بقولك قمر 14 نقاوة عينى وأنت عارف ذوق أمك فى البنات
حمادة : والنبى يا ماما نقاوتك بصحيح
طيب شفتيها فين قولى بسرعة
بيضة ولا سمرة طويلة ولا قصيرة
٠٠٠٠٠
الحاجة أميمة : شوف الواد حيموت أزاى أمال استراحة محارب ونيلة ايه دى
بص يا حبيبى وأنا فى السوق قابلت جارتنا أللى فى أول الشارع وكان معاها بنتها بوسى زى القمر وعرفت منها أن بنتها بشتغل مدرسة أطفال وروضه ولسه متخطبتش فخدت منهم ميعاد الخميس الجاى
حمادة : على خيرة الله يا ماما قولى ل بابا بقى يجهز ويطلع بال 300 ج بتوع التورتة ولا أيه رأيك أنا أتشائمت من التورت تيجى ناخد جاتوه
الحاجة أميمة: ناخد اللى ناخده أما أخش اقول لأبوك علشان يسأل عنهم قبل ما نروح
وبعد شوية
الحاج محمود :أحسن حاجة فى الجوازة دى أنهم جنبنا رايحين مشى بدل ركوب العربية ووجع الدماغ
حمادة : حرن الجرس أهو
يارب يكون فى قبول والجوازة تتم
أبو العروسة : أهلا أهلا بجيران الهنا وجوز بنتى المستقبلى
حمادة : أهلا يا عمى بحضرتك
الحاجة أميمة : أهلا يا سعاد أمواه يا حبيبتى يا أم الغالية بوسى مرات أبنى أن شاء الله
أم العروسة : نورتوا يا حبيبتى وشرفتونا ربنا يجعلها من نصيبه
أتفضلوا يا حبيبتى
حمادة : أبو العروسة راجل فرفوش ومش معقد وتحس أنك تعرفه من زمان وأمها كمان ست كده جدعة وحنينة وأخواتها عيال دمهم عسل
بصراحة كده انا مرتاح أووى ومبسوط وحاسس أنى فى بيتى كده او بيت خالتى
يكونش ده القبول يا واد يا حمادة أللى بيقولوا عليه و ٠٠٠٠٠٠٠
أم العروسة : تعالى يا بوسى متتكسفيش
سلمى على عريسك وأقعدى هنا قصاده
حمادة : يا وعدى دى قمر بصحيح وبيضة زى اللبن وعينيها حلوة أوووى يا سعدك يا هناك يا حمادة
الحاجة أميمة : شفت يا واد نقاوة أمك مش الدرجة التالتة اللى كنت بتجبهم لنا يا خايب
حمادة : أه يا ماما قولى أللى نفسك فيه كله بصراحة دى شكل تانى جمال وحلاوة واخلاق وذوق كمان
وأول ما أتكلمت حسيت أنى أعرفها من زمان وقلبى دق لها كمان
تكونش حبيتها يا حمادة من أول نظرة و ٠٠٠٠٠
الحاج محمود : على خيرة الله فى قبول ورضى من العروسة والعريس كمان
الحمد لله نتفق بقى وخير البر عاجله
نتفق ونعرف طلباتك يا حاج
أبو العروسة : على خيرة الله
طلبات أيه يا حاج محمود بس دى أحنا بنشترى راجل
حمادة : (بنشترى راجل) الجملة دى أنا عارفها كويس وسمعتها كتير قبل كده إهئ إهئ بين الجوازة حتبوظ وبوسى حتطير منى
الحاج محمود : بص يا حاج أحنا نقرأ الفاتحة الاسبوع الجاى أن شاء الله وبعدها نعمل خطوبة ونقدم شبكة زى ما نتفق عليها
وفى خلال 6 شهور نكون جبنا العفش والادوات الكهربا و الحمد لله شقتنا جاهزة على المفتاح
التقيل علينا والخفيف عليكم والفرح هدية منى فى اكبر قاعة لأبنى الوحيد فرحتى الأولى
أبو العروسة : متاخدنيش فى دوكة يا حاج كل حاجة بالأصول تمشى
الحاج محمود : وهو أنا أتعديت الأصول برضه
أبو العروسة : لأ لاسمح الله ده أنا بس عاوز اعرفك سلو عيلتنا مش أكتر
الحاج محمود : أتفضل يا حاج أتكلم
حمادة : الفار إياه لعب فى عبى أنا عارفه لما بيلعب الموضوع بيكون فيه إن أستر يارب حكم البت بوسى دى عجبانى أوووى
أبو العروسة : شوف يا حاج قبل الفاتحة والخطوبة والذى منه نتفق على القايمة ونكتب فيها ايه ونوع الاجهزة وأهم حاجة التكييف
بوسى متعرفش تنام من غيره
الحاج محمود : وهو أحنا أشترينا أجهزة لسه يا حاج علشان نكتبها فى القايمة
وابنى ما لازم حيجيب تكييف هو فى حد بينام فى الحر دلوقتى
ابو العروسة : يبقى ننزل نشترى الاجهزة الاول والعفش كله ونكتب القايمة ونظبطها وأبنك يمضى عليها وبعدين نعمل الخطوبة
الحاج محمود : كلام ايه ده يا حاج دى عمرها ما حصلت قبل كده
هو احنا جيبنا الشبكة لسه
أبو العروسة: القايمة أولا قبل أى أتفاق
الحاج محمود : الشبكة والخطوبة أولا وبعدين نجهز الجهاز وقبل كتب الكتاب نكتب القايمة هى دى الاصول المتعارف عليها
ابو العروسة : أنت بتشمتنى فى بيتى يا حاج وبتقولى إنى معرفش فى الأصول
طيب يمين كبير من بيتى القايمة الأول قبل أى شئ
الحاج محمود : قوم يلا يا واد يا حمادة يلا يا حاجة بلا هوسة دماغ
حمادة :يا بابا أهدى شوية والنبى
طيب نتفاهم معاهم
قولى حاجة يا ماما
الحاج محمود: طيب
بقى كده طيب يمين كبير ما فى جواز من بوسى دى
يلا يا واد أنت وهى
قال قايمة الاول قال
حمادة : وباظت الجوازة وراحت بوسى وكله بسبب القايمة وتنشيف الراس
أستنونى فى حلقة جديدة
