مطلوب عروسة

 

 

إيمان العادلى

 

الحلقة الرابعة

 

بعد حكايتى مع الراجل أبو العروسة الوضيع مكذبش عليكم أنا زعلت على نفسى أوووى

بس برضه يا واد يا حمادة أنت أديتهم له فى الفون وخدت حقك منه و ٠٠٠٠٠٠ هوبه نشوف هانى صاحبى عاوز أيه

 

هانى : بص يا حمادة بقى أنا لازم أجوزك ما هو مينفعش تقضى حياتك كده فردانى زى فردة الشراب الضايعة كده ملهاش لازمة

 

حمادة : أنا مرتاح كده وكفاية اللى حصل لى من العروستين أللى فاتوا

انا مبسوط يا سيدى إنى فردة

انا لا عاوز أتجوز ولا أتهبب

 

هانى : حتغير رأيك بعد ما أقولك على العروسة أللى جايبهالك

 

حمادة : عروسة أيه ومين

لا يا عم أنا حرمت بقولك

 

هانى : دى مها مراتى جبتها لك وأنت عارف ذوق مها بقى وعارف تناكتها

 

حمادة : أه لو مها شخصيا أبقى موافق

قول وإشجينى منا خلاص عامل زى فردة الشراب الضايعة إهئ إهئ

 

هانى : بص يا سيدى هى زميلتها فى البنك بس أيه فلقة قمر وأخلاق أيه مقولكش وأهلها ناس كلاس وراقيين أووى مش بتهمهم المظاهر

ومها من الأخر خدت لك ميعاد الخميس الجاى وحنيجى معاك

إبسط يا عم

 

حمادة : بجد يا هانى البت قمر وبتشتغل كمان والله وحتضحلك بينها يا حمادة وحلاقى الفردة التانية

موافق يا عم علشان أنا بس واثق فى ذوق مها

 

المهم عدى الوقت وحمادة روح البيت وهوبه

 

حمادة : ماما يا ماااااما انتى يا بت يا أميرة يا وش النحس

بابا يا حاج هلموا هنا بسرعة لاقيت عروسة

 

الحاجة أميمة : والنبى يا أبنى أيوة كده فرحنى نفسى أشوفك عريس

 

الحاج محمود: أستنى يا أميمة شوية

العروسة كويسة يا أبنى وبنت ناس طيبين

 

حمادة : أيوة يا بابا مجايب مها مرات هانى صاحبى

 

أميرة : مبرووك أيووة كده أخيرا حبقى أخت العريس

 

الحاجة أميمة : يلا يا حاج ساعد الواد ب ال300ج بتوع التورتة

إلهى يا أبنى يجعلها من قسمتك ونصيبك

وهوبة

 

الحاج محمود : دى ساكنة فى حتة فخيمة اوى ش أبو الفدا فى الزمالك أنت متأكد يا أبنى أنهم عارفين ظروفك

 

حمادة : رد يا هانى وطمن الحاج

 

هانى : ايوة يا حاج مها قالتلهم كل حاجة والله مش كده يا مها

 

مها : أيوة والله يا عمو قلت كل حاجة متقلقش انت هما يهمهم الاخلاق وبيشتروا راجل

 

حمادة : أخ الجملة دى سمعتها قبل كده من الراجل الوضيع إياه

الفار بيلعب فى عبى

 

الحاجة أميمة : يوووة تفائلوا بقى يلا رن الجرس يا عريس

 

ابو العروسة : أهلا وسهلا نورتونا

أهلا يا مها يا بنتى والأستاذ هانى كمان مشرفنا أهلا وسهلا

 

هانى : الشرف لنا يا عمو

اتفضل سلم على العريس

 

حمادة : الشقة فخيمة أووى وذوقهم راقى وبصراحة مكلفين الشقة والديكور والعفش كمان زى أللى بيطلع فى المسلسلات يا ترى أيه الخازوق المرة دى يا حمادة

يارب يطلع ظنى غلط والأمور تمشى أو حتى يرفضونى من غير أى كوبرى ولا راجل بيبيع بنته

 

ابو العروسة : والله يا حاج محمود انت راجل قعدتك حلوة ميتشبعش منها

 

الحاج محمود : وحضرتك والله ونعم الراجل المهذب

 

الحاجة أميمة : أيه مش حنشوف العروسة ولا أيه

 

مها : حقوم أجيبها أصلها مكسوفة

 

وهوبة العروسة دخلت قمر ماشاء الله وهل هلاله جمال ايه وشياكة أيه ورقة ايه وذوق ايه وثقافة كمان مقولوكوش

 

الحاجة أميمة : ماشاء الله عليكى يا بنتى يجعلك كده من نصيب أبنى

 

الحاج محمود : تمام كده يا بشمهندس نغيب يومين وناخد الرد من حضرتك أن شاء الله

حمادة أبنى يكلمك فى الفون وأللى رايده ربنا يكون

 

أبو العروسة : ويومين ليه أنا والعروسة موافقين وأخواتها حيوافقوا وممكن نتكلم فى التفاصيل بالمرة دلوقتى

ههههههه خير البر عاجله

 

حمادة : الفار عمال يلعب فى عبى معقول يا حمادة حتتجوز خلاص من القمر ده والدنيا فتحت لك دراعتها

 

الحاج محمود : أتفضل يا باشمهندس قول طلباتك وأحنا سامعين

 

ابو العروسة : ملناش اى طلبات يا حاج أنا مجهز بنتى من الإبرة للصاروخ حتى الشقة بتاعتها هنا فى البرج فى الدور السادس يعنى ممكن يتجوزوا الاسبوع الجاى

بس ليا طلب واحد بس شكليات يعنى علشان بنات العيلة وكده

نكتب مؤخر مليون جينه

 

حمادة : مليون جنيه ليه

 

الحاج محمود :بس ده مبلغ كبير أوى يا باشمهندس ده حتى أبنى ميقدرش يدفع أجرة المأذون

 

أبو العروسة : شكليات يا حاج ملهوش اى لازمة يعنى البت لو كرهته ما هتتنازل له عليه وبعدين ده انا حديله بنتى وشقة تسوى 10 مليون

 

الحاج محمود : أعتبرنا موافقين وحكلمك فون بكرة نتفق على الباقى

 

عدى الوقت وروحوا البيت

 

حمادة : انا حاسس المبلغ كبير اوى يا بابا افرض متفقتش معاها وعاوز أطلقها ادفع منين

 

الحاج محمود : يا ابنى الراجل شاريك زى ما قال

بصراحة جوازة لقطة وبت يتيمة وزى القمر ولا حماة ولا وجع دماغ

 

أميرة : بص يا اخ حمادة انت تروحلها عند البنك وتستناها وتاخدها اى مكان هادى كده وتثبتها وتشوف نفسك

 

حمادة : صح يا وش النحس أول مرة تقولى كلام عدل

 

حمادة مكدبش خبر وراح لها البنك وأشترى لها بوكيه ورد وفضل مستنيها فى الشارع قصاد البنك

ولاقاها نازلة ولسه حيروح لها قال استنى اما الزحمة تخف وهوبه طلعت الفون وطلبت رقم وكلمته

 

العروسة : ايوة يا مهاب بابا جبلى عريس مش أد كده ولا فى مستوايا بس علشان اصلح غلطتى معاك

لا لا هو ميعرفش بغلطتى

بابا طلع شاطر حيكتفه بمليون جينه علشان ميطلقش ولا يعمل فضيحة ولما يكمل وقت معايا حخلعه وأبقى مطلقة قدام الناس و ٠٠٠٠٠

 

حمادة : أه يا واطية يا حلوة يا بلحة يا مئمعة

بلغى أبوكى الواطى أن مفيش جواز

ومها وهانى حسابهم معايا

وأدى الورد أهو حدعكه بجزمتى

 

ويقطع الجواز واللى عاوزين يتجوزه

 

أستنونى بكره وحكاية جديدة