مطلوب عروسة

 

 

إيمان العادلى

 

الحلقة العشرون والأخيرة

 

أنا حمادة العريس اللى مش عارف يبقى عريس ولف على عرايس أشكال وألوان لكن للأسف مفيش واحدة منهم قدرت تكون نصى التانى أنا قررت أعتزل فكرة الجواز مؤقتآ وقررت أخد بالى من شغلى ومكتبى وأركز مع شريكى سامح و٠٠٠٠٠

 

حمادة : صباح الفل يا سامح أدينى أهو حنسى الجواز وسنينه وحركز معاك

 

سامح : صباح الانوار يا حمادة

ان شاء الله نصيبك موجود ومتزعلش نفسك هدنة كده وندور تانى على عرايس و ٠٠٠٠٠٠

 

صوت نسائى رقيق دخل المكتب و ٠٠٠٠٠

صباح الخير أنا أنسة نسمة الفخرانى وجاية أشوف أخبار الصيدلية بتاعتى خلص الشغل فيها ولا لسه

 

حمادة : الله الله أيه الصوت الملائكى ده ولا صاحبته خطفتنى من نفسى الله يا حمادة أنا بتشد لها كده ليه أحم أحم إجمد يا حمادة و ٠٠٠٠٠

 

سامح :أهلا يا أنسة نسمة تقريبا الشغل قرب يخلص فيها أسبوع كمان وحنسلمك المفتاح مش كده يا أحمد

 

حمادة : أه اه صح كده حنسلمك المفتاح وكله

 

نسمة : طيب ميرسى أووى

أ احمد وعلى فكرة ذوق حضرتك راقى فى إختيار الألوان وطريقة الأدراج والرفوف بجد كان نفسى أشكرك بنفسى بس مكنتش بلاقى حضرتك فى المكتب قبل كده

 

حمادة : أنا أللى ميرسى أنك موجودة وشفتك و٠٠٠٠٠

 

نسمة : هههههه مش فاهمة بجد حاجة من كلام حضرتك

 

حمادة : هههههه ولا أنا فاهم مالى

 

نسمة: وأ سامح طبعا ذوقه رائع فى تقسيم الصيدلية وعملى مساحات من مفيش بجد ميرسى لكم أووى شغل مكتبكم فعلا رائع

 

حمادة : لأ حددى بقى ميرسى أكتر أنا ولا سامح هههههه

 

نسمة : هههههه أنتم الأتنين بجد رائعين وشغلكم جميل جدآ

حضرتك فانى أ احمد وحد جميل حاسة أنى شفت حضرتك قبل كده بس مش عارفة فين و مش عارفة ليه

 

حمادة : وأنا كمان أ نسمة

بقولك أيه أنا مش شايف دبل فى إيدك انتى مش مخطوبة صح كده

 

نسمة: ( مكسوفة ) أه لسه مجاش النصيب أ حمادة

 

حمادة : أه أنتى منهم برضه أ نسمة سولتير وقايمة أوفر وشغلك اهم من الجواز و ٠٠٠٠٠٠٠

 

نسمة : لأ طبعا أنا ولا بابا ميهمناش الحاجات دى خالص المهم انا ارتاحله ويكون ابن ناس وكل حاجة سهلة بعد كده هى الدنيا أتخلقت فى يوم ولا 7 أيام أ حمادة

 

حمادة : الله عليكى و تقريبا بقى النصيب جه

انا مهندس زى ما أنتى شايفة و جاهز شقة وشبكة وقايمة وكله

و بصراحة أنتى شدتينى ليكى فيك حاجة بتجذبنى بتهزنى جوايا حاسس قلبى فرحان بيكى وبيدق وعمره ما دق كده و تقبلى أتقدم ليكى أنا وعيلتى وأخد ميعاد من دكتور فخرانى يوم الخميس الجاى

 

نسمة : ( مكسوفة) بسرعة كده أ احمد من غير حتى ما تعرفنى أكتر أو تسأل عليا

 

حمادة : حاسس إنى أعرفك كويس ومرتاح لك ومتهيأ لى أنك كده كمان

 

نسمة : وأنا كمان حاسة إنى أعرفك

برضه ومكسوفة ومتلخبطة ومش عارفة مالى

أنا حبلغ ماما وهى تقول ل بابا يشوفك ويقابلك واللى بابا يقوله انا حوافق عليه

 

حمادة : بجد موافقة عليا وعندك نفس أحساسيى المتلخبطة الفرحانة والحيرانة و حاجات كتير كده غريبة

 

نسمة : هههههه تصدق أه بس أنا مكسوفة وحمشى بقى و ٠٠٠٠٠

 

حمادة : أستنى متمشيش خليكى شوية

 

نسمة : حمشى وأكييد لو فى نصيب حنتقابل

مع السلامة

 

و هوبة

حمادة وعيلته راحوا يوم الخميس

والحاج محمود والدكتور فخرانى أتفقوا وذللوا الصعاب وعلوا الجواب وكملوا فرحتهم بقراية فتحتهم ولبسوا شبكة خطوبتهم

وأخيرا حمادة بعد الضنى لبس البدلة و لقى مسك الختام ونصه التانى اللى قلبه دق لها من أول نظرة وربنا يتمم له على خير

 

وعقبال عندكم

وتوتة توتة خلصت الحدوتة