مطلوب عروسة

 

 

إيمان العادلى

 

الحلقة الخامسة عشر

 

بعد مشوارى مع فتاة الأحلام وبالذات أخر فتاة فيهم أللى دمرت كل أحلامى وكانت حتلففنى كعب داير على أقسام مصر أنا أعلنت توبة نصوحة على الجواز وبصراحة أنا قررت أشترى قط أه قط شيرازى أربيه مش قطة أنا كرهت نون النسوة و٠٠٠٠٠٠٠

 

الحاج محمود : حمادة تعالى عاوزك

 

حمادة: ايوة يا بابا بس بالله عليك مش عاوز عرايس تانى أنا حعيش مع ميشو وأنسى الموضوع ده

 

الحاج محمود : مين ميشو ده اللى حتعيش معاه يا أبنى وبعدين أنا جبتلك عروسة لقطة وجميلة وجبت صورتها كمان أهو علشان أوفر عليك واحمسك

 

حمادة : القط بتاعى يا بابا

مش عاوز عرايس ولا أتجوز

 

الحاج محمود: هو بمزاجك ولا بمزاجك خد شوف الصورة وبطل هبل انا مش ناقصك

 

حمادة : الله دى حلوة يا بابا ورفيعة وبيضة أحمدك يارب

توكلنا على الله مين العروسة بقى

 

الحاج محمود : سلمى بنت الدكتور يحى فى العيادة أللى فوق عمتك دكتورة أطفال ووحيدة أبوها وشغالة معاه فى العيادة وعمتك صورتها بالفون من غير ما تاخد بالها وأتفقت خالص حنروح لهم الخميس الجاى وحنجيب جاتوه بلاش التورتة

 

حمادة : توكلنا على الله يا بابا

 

وهوبه

 

الحاجة أميمة : حرن أنا الجرس المرة دى أهو نفك النحس علشان الجوازة تصيب المرة دى

 

أبو العروسة : أهلا وسهلا بعريسنا والحاج محمود أهلا أهلا يا حاجة وأ أحمد أتفضلوا

 

الحاج محمود : أهلا بيك د يحى

 

أم العروسة : يادى النور أتفضلوا يا جماعة نقعد هنا فى الليفنج ما أنتوش أغراب أن شاء الله

منورة يا حاجة منور أ أحمد عريس بنتى

 

حمادة : الله ناس حلوين فعلا ومثقفين وبسطاء وذوقهم راقى جدا فى شقتهم هما مريحين جدا

بس غريبة سلمى صورتها زى القمر وأمها وأبوها مش حلوين خالص غريبه دى بس مشكلة لو عيالى طلعوا شبهم ههههههه يلا المهم العروسة حلوة

 

أم العروسة : بنتى الدكتورة سلمى دكتورة أطفال تعالى يا حبيبتى متتكسفيش

 

الحاجة أميمة : ماشاء الله ربنا يحميكى يا حبيبتى جمال وعلام

سلمى على عريسك

 

حمادة : أزيك أنسة سلمى

 

العروسة : الحمد لله بخير

 

الحاجة أميمة : عسل ياناس بنت أصول صحيح صوتها واطى وهادى

يا زين ما ربيتوا يا دكتور ربنا يجعلها من نصيب أبنى

ممكن يا حبيبتى حمادة يستأذن ويقعد معاها لوحدهم جنبنا يتعرفوا على بعض

 

أم العروسة : طبعا يا حبيبتى

أتفضلوا يا عرايس خدوا جنب لوحدكم

 

حمادة : أنا أحمد مهندس معمارى و ٠٠٠٠٠٠

 

العروسة : أه بابا قالى وحضرتك فعلا حد محترم وجميل

 

حمادة : الحمد لله يعنى فى قبول منك ناحيتى وممكن ندخل فى مشروع خطوبة وكده

 

العروسة : (مكسوفة) أه ممكن تتكلم مع بابا

 

حمادة : بابا يا باااابا تعالى

 

الحاج محمود : انت لحقت الله ده مغمزش ليا يبقى الجوزاة ماشية أحمدك يارب

شوف يا دكتور يحى شكل الولاد كده موافقين على بعض وفى قبول الحمد لله ممكن نتكلم فى التفاصيل وخير البر عاجله ونعرف طلباتكم وطلبات العروسة بنتنا

 

أبو العروسة : احنا ملناش طلبات حاج محمود أنا بشترى راجل لبنتى الوحيدة واللى تطلبوه من عنيا أجيبه لها

 

حمادة : (بنشترى راجل) مبرتحش للكلمة دى الفار بدأ يلعب فى عبى تانى أستر يارب

 

الحاج محمود : كلام محترم من ناس ولاد أصول أحنا عندنا الشقة كاملة ومتشطبة وحنجهز جهاز يليق بيكم والفرح هدية منى للعرسان فى المكان اللى يختاروه والشبكة وكله تحت أمركم

 

أبو العروسة : شوف يا حاج الجهاز بينا بالنص وشهر العسل هدية منى لبنتى وأبنى فى اى مكان برة مصر أسبوع هدية منى والشبكة دى هديتكم للعروسة ملناش كلام فيها

 

الحاج محمود : على خيرة الله د يحى نقرأ الفاتحة

 

أبو العروسة : قبل ما نقراها عاوز العريس لوحدنا فى كلام عاوز أقوله له وبعدين نعمل كل حاجة

 

حمادة : (الفار بدأ يجرى فى عبى)

أه اتفضل يا عمو نتكلم مع بعض

 

أبو العروسة :بص يا حمادة بنتى مفيش فى أخلاقها ولا جمالها ولا تعليمها وانا كاتب لها كل ثروتى وكل ما أملك أنا ومامتها

 

حمادة : اكيد ياعمو هى جميلة ومحترمة ربنا يخليها لك لكن والله انا بعد ما حتجوزها ان شاء الله مليش دعوة بفلوسها ياعمو أطمن حضرتك و ٠٠٠٠٠٠

 

أبو العروسة : لا لا مش قصدى يا أبنى كده خالص الفلوس وكل ما أملك ملكم انتم الأتنين انا عاوزك فى موضوع تانى

 

حمادة : خير يا عمو أتفضل

 

أبو العروسة : الموضوع ده يفضل سر بينا سواء أتجوزتها أو لأ لو سمحت أوعدنى أنك متقولوش ل بابا ولا ماما ولا سلمى نفسها

 

حمادة : حاضر ياعمو

 

أبو العروسة : بص يا أبنى انا ومراتى مبنخلفش ويستحيل نخلف وأتبننا سلمى من ملجأ وهى لحمة حمرة وللصدف أسمها فى الملجأ سلمى يحى محمود وأنا يحى محمود أبوغريب أنا ربتها وأحسنت تربيتها وخليتها عروسة وكتبت لها كل ما أملك بيع وشراء

كان لازم تعرف الحقيقة دى لأنك حتبقى جوزها و ٠٠٠٠٠٠٠

 

حمادة : ( انا قلت الفار بيجرى فى عبى) هى قلبت حزينى كده ليه وحتعمل ايه يا حمادة فى الموقف ده

 

الحاج محمود : حمادة خلصت يا أبنى

 

حمادة : أبويا بيظهر فى الوقت المناسب و جاى اهو يا بابا

 

الحاج محمود : ( ايه ده الواد بيغمزلى يعنى فركش يا ترى حصل أيه بوظ الجوازة ) أن شاء الله د يحى نتصل بحضرتك يومين كده وربنا يجيب اللى فيه الخير

 

حمادة : سلامو عليكم يا عمو وأوعد حضرتك حفكر

 

وبكده خلاص فكرت وقررت أنى أشوف عروسة تانى وأنى للأسف اتغيرت من السر ده وبصراحة خفت مش عارف ليه يمكن ظلمتها

هى بنت عشرة على عشرة وتعليم وجمال وأخلاق بس انا خفت من أصلها الحقيقى أللى أنا معرفوش للأسف أنا برضه أنسان

 

أستنونى بكرة وحلقة جديدة