محمد ربيع يكتب .. كُلنا الأهلي !!

حزنت جدًا من انتشار مقالات وآراء شامتة ساخطة في الكابتن حسام حسن وخروج نادي المصري البورسعيدي ” المصري ” من بطولة الكونفيدرالية علي بعض المواقع ، ولا أعرف سببًا واحدًا لتلك الفرحة الهسترية التي انتابت بعض الجماهير والنقاد لتلك النتيجة –الحزينة – وكأن فريق المصري من كوكب آخر رغم أن الكابتن حسام حسن وجهازه الفني ولاعبيه الرجالة بالإضافة لمجلس إدارة النادي حققوا انجازًا رهيبًا لم تتمكن أندية أخري كبيرة تحقيقه ورغم ذلك شن البعض السكاكين لقطع رقبة التوأم .

أعلم أن النتيجة كانت مخيبة للآمال ولكن ما حققه المصري مع حسام حسن يستحق التحية والتقدير فما سبب تلك الشماته من مصريين لنادي مصري ،هذه النقطة هي التي دفعتني للكتابة الآن ، كيف يفرح مصري في هزيمة نادي مصري خاصة أن ناديه ليس طرفا ولا منافسا ، ما الدافع لجمهور ما يشجع نادي ليس مصريًا منافسًا لنادي مصري ؟ ما هي الحكمة في ذلك ،  وما الفائدة التى عادت علي الشامتين والمتعصبين ،  وهل تلك هي  الوطنية التي نتشدق بها ليل نهار ؟

أكيد فيه حاجة غلط ، الإعلام الرياضي أصبح ليس له شاغل غير توجيه  الجماهير للغلط ، هل الحرية انك تغلط في الآخر ، لكل فعل رد فعل – يعنى لو واحد غلط التانى هيرد – ، طيب وبعدين هنروح فين بعد كدا ؟ عيب نكون فى نهاية 2018 وداخلين علي عام جديد ويكون هذا مستوى تفكير الناس وهذه تكون أخلاق الجماهير وأسلوب التعامل الرسمي ، زمان كانوا بيقولوا الرياضة أخلاق أين ذهبت الأخلاق الآن؟

فين المسئولية ، هو كل إعلامي رياضي يحب يعمل برنامج سخن ويسخن الحلقات يقوم يزيد التعصب بين جماهير الأندية علشان يجيب مشاهدة وإعلانات كتير علشان الفلوس وللأسف إن اغلب الاعلامين الكبار اصبحوا في منتهى قله الأدب والتخلف وحاجة تكسف والله ، كل هذا من اجل كورة ده لو أصلا عندنا كورة !! فبلاش نضحك على نفسنا وياريت نفوق لأن فى الآخر كلنا مصريين والمفروض المهم عندنا البلد والمنتخب .

السؤال الآن أنت مصري , و أنا مصري كوره القدم مصدر إمتاع مش تريقه أو استفزاز هل إنا غلطـان في كلامي ؟ هتقـولى في جماهير من هنا بيتسفزوا الواحد – هقـولك بـرضه فى أعضاء من هناك بيستفزوهم ، تقولى خـلاص – خلينـا كده – طب ده حــل ؟؟؟ – لا ! ,, طب الحـل ايه ؟؟؟ الحل بسيط و سهـل , احنا نـاس كبـار , عندنا عقـل و دين – وعارفين الصح من الغلط التعصب , شـئ مش كـويس – بيترتب عليـه حـاجات مش كويسة – فاكرين مذبحـة بورسعيد ؟

يا جماعة كرة القدم مصدر إمتاع , عشق النادي حاجة جميلة ، اعشقـه , غنيله – روح وراه فى كل مكـــان , اكسب – افــرح ، اخسـر , قول مبـروك للفـائز – إنما أروح استفز الخسـران و اشمت فيه – ليــه ؟ – هتستفـاد ايـــه ؟
تعصب .. يعني أبقى مش شايف غير نفسي ، و غيري مش محسوب من البني أدمين !
تعصب .. يعني أرمي كلمة تبسطني ، و ما أفكرش في رد فعل اللي قدامي عليها أيه ، لإنه بالنسبة ليا كيبورد !

تعصب .. يعني أتكلم على غيري ، و لما غيري يتكلم عليا أزعل و أشيط في وشه .. يبقى أنا ليه أتكلم كلام يزعله من الأول ؟!
لو كل واحد فينا فكر في غيره قبل ما يفكر في نفسه .. و إن اللي بيكلمه ده بني أدم حتنتهي الظاهرة دي أو على الأقل حتخف من وجهة نظري المتواضعة وعيب لما نبقى كبار و نزعّل بعض علشان كورة .. و لازم كلنا نبعد عن التعصب ..

من هذا المنطلق :  أري انه من الواجب علينا جميعا كجمهور مصري وتحديدا في البطولات القارية ننسي التعصب ونكون كلنا ايد واحدة وقلب واحد وشعب واحد ووطن واحد وفريق واحد نفسي نبقي كلنا يد واحدة اهلاوي و زملكاوي و نشجع النادي الأهلي اللي بيمثل مصر… وتكون قلوبنا جميعا مع النادي الأهلي العريق ممثل مصر في نهائي بطولة أبطال أفريقيا والأب الروحي للكرة المصرية نؤازره بقوة حتي يفوز لمصر وليس للأهلي فقط بتلك البطولة الهامة وهو بإذن الله قادر علي ذلك نتاج طبيعي لعمل مؤسسي يرفع شعار إنكار الذات والجميع في واحد من أجل القلعة الحمراء.. النادي الذي خرجت منه ثورة 1919 ولتحيا مصر.