كل البشر يوسف! بقلم احمد ربيع

بلمح بعيني البشر واتأمل التفاصيل
لاقيت الكل واقف علي الحافه
والكفّه قدامي عمّاله بينا تميل
ولا حد قال فينا نعدل الكفّه
مالها الحياه بتجر فينا لفين!
ماشيين وراها وكلنا تايهيين
مش لاقي حد يقول خلاص توبه
وبنبني في المعصيه طوبه ورا طوبه
ومبقعين الدنيا بالاخطاء
وان يوم تلوم علي حد
نبع الغباء بيفيض ويقولوا مش ذنبنا
كل الغلط مش قصد والصح من قلبنا
ولا تلقي لينا مثيل
بارعين وفي التمثيل ولا حد يشبهلنا
لو كلنا يوسف ومبرائين الديب
مين اللي رامي التاني!
ولا الغلط ع البير؟!
محتار انا جدا ودي غلطه في التعبير
انا بقصد اني لا يمكن هبقي في يوم يوسف
ولا انتوا ليا اخوات
وربي في السموات وعيونه شيفاني
وقميصي مش مبلول بالدم ولا حاجة
زيي كباقي الخلق في زماني
بغلط واقول اني مش هميل تاني
وبرجع بَميل تاني.