الكيكة زي ما بنقولها من سينين يعني بس التاء المربوطة دي بتزعل ناس كتير فنخليها كيك زي ما بتتقال من أيام الفايكنج عشان كان أصل الكلمة كاكا من أيامهم.
للكيك تاريخ كبييير، كانت مختلفة زمان عن دلوقتي أقرب للعيش بس متحلية بعسل ومكسرات وفواكه مجففة زي ما كان بيعملها الرومان أو بإضافة الجبنة زي اليونايين .
وطبقا لما ذكره مؤرخين الطعام قدماء المصريين كانوا أوائل الشعوب اللي أظهرت تفوق وسبق في الخبيز، ولغاية دلوقتي والله أحفاد المصريين القدماء في المطبخ أهو بيخبزوا
قاموس اكسفورد بيرجع أصل كلمة cake للقرن ١٣
وقتها كان بيتعمل خبز الزنجبيل وكيك الفاكهه اللي كان بيقعد شهور سليم
بس نفس المؤرخين دول بيقولوا إن شكل الكيك الحالي اللي نعرفه اللي هو المدور ده وعليه طبقة زينة إتعرف في أوروبا في القرن ١٧ بعد الطفرة الصناعية اللي حصلت في صناعة الأفران
والقوالب وظهور صناعة السكر المكرر
وكانت بتتعمل في صواني حديد .
بس أول icing أو طبقة زينة كانت معمولة من السكر المكرر النقي جدا وبياض البيض، يتحط علي الكيكة وبعدين ترجع الفرن والعجينة نفسها كانت بتحتوي علي الزبيب والفواكه المجففة واللمون مثلا .
لحد القرن ١٩ ظهر بقي الكيك اللي نعرفه الأيام دي ، المعمول من الدقيق المكرر والباكينج بودر بدل الخميرة
وظهرت في كتاب .
The Cassell’s New Universal cookery Book
سنة 1849وصفة كيك الطبقات مع طبقة زينة مكونة من الزبدة والكريمة والسكر
في فرنسا معروف تاريخيا
Antonin Careme أنطوني كاريم
١٧٨٤- ١٨٣٣
يعتبر أول شيف رائد في تاريخ الخبز والكيك الحديث
طيب ليه الكيكة مدورة ؟
سؤال عادي؟
ده فيه نظريات تاريخية اتحطت عشان تجاوب علي السؤال ده
واعتمدت النظريات دي في تفسيرها علي الزمن والثقافة وأصول المطبخ في كل منطقة عشان تجاوب السؤال ده
أصل الكيك المدرور هو العيش المدور من زمان العيش بيتعمل مدور، كان بيتعمل بالإيد والشكل الدائري أسهل في التشكيل ، وبعدين كانت الصواني كتير وقتها مدورة فبقوا يعملوا الكيك في نفس الصواني بدل ما يجيبوا صواني جديدة..بسيطة اهي
لا برضه
في القرن ١٧ بدأوا بقي يعملوا صواني مفرودة وصواني علي أشكال
كتير كما ذكر في كتاب
E.SMITH ‘S The compleat Housewife
اللي اتنشر سنة ١٧٢٧
مع ٤٠ وصفة لعمل الكيك ..
نظرية قالت إن الكيك كان من ضمن أهم الأطعمة اللي بتتقدم قرابين للآلهة، والآلهة بتحب الشكل المدور عشان القمر والشمس وكده، ويرمز الشكل الدائري إلي دورة الحياة،
فكان بيتعمل في مناسبات دينية قديما، وفي الحظر في مصر حديثا بقي
حديثا الكيك بيتعمل في المناسبات السعيدة والغير سعيدة
أفراح أعياد ميلاد أجازات جنازات وفي الحظر في مصر برضه
لأن الكيكة لما بتتعمل بروح ونفس حلو وتطلع حلوة مافيش أحلي منها دليل علي الحب والإهتمام، والدليل علي كده تعلقنا كبار وصغار بكلمة هعمل لكم كيكة ولمة العيال وهي بتكسر البيض وبتدوق العجينة من الطبق وبعدين ريحتها اللي بتقلب البيت وهي طالعة من الفرن و الكل مستني ياكلها مع الشاي أو الشاي بلبن ..
أيام جميلة من زمان في لمة العيلة ربنا يبارك في أمهاتنا وآبائنا جميعا ويحفظهم يارب، ويرحم من مات منهم ويخلينا لأولادنا ويحفظنا جميعا ..
يجب عليك تسجيل الدخول لكتابة تعليق.