أكلات وحلويات المبروشة

كتبت : أسماء فكري السعيد علي

هي أحد أنواع الحلوي اللذيذة جدا وشبيهه جدا للحجازية ولكن مع اختلاف المقادير والمكونات قليلا ..

الأهم من كل ده اسمها ( المبروشة ) والسبب اننا بنبرش العجين بتاعها بالمبشرة علي الوجه ويمكن ده

مش متعارف عليه في الحلوي الأهم انها كسناكس حلوة جدا جدا …

المقادير سهله خالص وكلها موجوده ف البيت

المقادير :
كيلو دقيق
كوب ونص سكر خشن عادي
كوبين سمن او كوبين زيت او كوب سمنه علي كوب زيت
خمس بيضات كبار او سته وسط
فانيليا ،
٢ باكو بيكنج بودر
رشه ملح ( حوالي ١/٤ ملعقة صغيرة )
ملعقة خل
مربي ويستحسن تكون فراوله أو مشمش بتبقي تحفة

الطريقه :

* هنحط السكر ع الدقيق ع البيكنج بودر ونقلبهم كويس مع رشه الملح البسيطة .
* هنحط البيض مع الڤانيليا ونقلبهم بالشوكه مش هنستخدم لا مضرب ولا خلاط .
* ننزل بقا ع الدقيق بالبيض وبعدها ننزل بالزيت او السمنه علي حسب اللي اختارتوه وبعدها ننزل معلقه صغيره خل .
* هنبدأ نعجن ب إدينا لحد ماتبقي عجينه جامده زي البسبوسه كده أو أجمد حبتين .
* الأفضل اننا بعد كده ندخل العجينة الثلاجة لمدة ساعة علي الأقل أو ١/٤ ساعة في الفريزر .
* ندهن الصينيه ونحط نص المقدار بتاع العجينه ونساويه كويس بادينا وبعدين نحط المربي ونكتر منها علي قد ما نقدر بعد كده بقا هنبشر نص العجينه اللي باقي ع المربي بالمبشره ونساوي الوش براحه خالص علشان تغطي المربي كلها .
* علي نار هاديه بقا يعني ع حرارة ١٦٠ أو ١٨٠ درجة بكتيره نقوم مدخلنها لغايه ما تتماسك حوالي نص ساعه ونطلعها تاني نقطعها ونقوم مدخلنها تاني الفرن حوالي نص ساعه كمان لما تتحمر كويس .. يعني مدة خبزها كاملا ساعة لكن علي مرحلتين .
* يفضل لو سبتوها تبرد خالص وبعدين تؤكل او يتم تناولها تاني يوم مع قهوه بقا او شاي زي ماتحبو او تتاكل لوحدها .
وبالهنا والشفا