أفتاكسات زوج محظور

 

 

إيمان العادلى

 

الحلقة الواحدة و الثلاثون

 

(الجزء الثانى ) أفتاكسات زوج صايم

 

إلهام وممدوح

 

بعد خناقات وحبشتكنات إلهام مع خالد واللى حصل وأللى جرى

نشوف

 

إلهام : عاوز تبلغ عن أمك يا خالد إهئ إهئ

علشان طبق سبانخ ولا حتى بصارة

يا خسارة تربيتى فيكم

 

رهف : وأنا مالى بقى بتجمعى ليه أنا حاكل سبانخ وبصارة كمان

 

ممدوح :اه منك يا سوسة أنتى ( طالعة لناس فى بالى طالعة واكلة نازلة واكله )

 

خالد : أيوووه أنا بقى الأبن العاق واقولك أنا اللى كلت الجبنه

ها

مرضية يا ماما وأستنى بقى البوليس جايلك يوديك الحجر

 

إلهام : إمشى يا واد من وشى على الصبح بدل ما أطلع جنانى عليكم

 

ممدوح : وأنا مالى يا ستى أنا راضى باللى حتطبيخيه يا عنيا وبعدين مالها السبانخ دى حتى كلها حديد

 

خالد : أيووة كده فلة حبلغ على أتنين مش واحد

يأما تطبخلى حاجة غير السبانخ

 

إلهام :تصدق يا واد ياخالد صعبت عليا والدمعة فرت من عينى

حعملك ملوخية يا واد مع السبانخ

يلا هيصوا بقى وإدعولى

 

خالد ورهف : تعيش ماما تعيش

 

ممدوح : تسلمى لنا يا ست الكل

 

إلهام :دوحة يا حبيبى عاوزاك فى موضوع كده

 

ممدوح : خير يا حبيبتى إن شاء الله

 

إلهام : أنت عارف سامية أختى

 

ممدوح : اه مالها عارفها طبعا

 

إلهام : اصطبر كده حعمل كوبيتين شاى وأحكى لك

 

ممدوح : أستر يارب هى وصلت للشاى هى اختك اتطلقت من إبراهيم ولا أيه

ولا عيالها أنا عارفهم عاوزين الحرق تلاقيهم عملوا مصيبة

 

إلهام : يووووة على أفكارك أللى زى الزفت دى

محصلش حاجة من أفكارك دى

 

ممدوح : أمال فى ايه مالها أختك سامية وموضوع ايه وكوبيتين شاى وحاسس بمصيبة جاينى

 

إلهام : هههههه يا لطيف يا لطيف

بص يا حبيبى انت عارف سامية اختى عاملة مشروع سيبر للدروس الخصوصية ومن يوم كورونا يا حبة عينى والحظر وهو مقفول

 

ممدوح : يا حبة عينك ما أنا كمان أكل عيشنا مقفول ومحل البلاى سيتشن محظور ومشروع ملاعب الترتان وحمام السباحة مع زمايلى محظورين يا عنيا وأنتى مش راحمة

طالع نازل تقوليلى هات هات

العيال محظورة وبتاكل يا دوحة

ودوحة يجيب لما خلاص روحى طلعت منكم

متفكرنيش يا إلهام وسيبنى فى غلبى ده أنا مشفتش منك طقم الحنية ده وأكل عيشنا مقفول يا حنينة

قال سامية أختها قال يا حبة عينها مشروعها مقفول

 

إلهام : يووة انت كده ما تصدق تمسك فى سلبية من سلبياتى وتفتحلى فيها ما تتسدش

بص بقى على بلاطة كده سامية حتغير النشاط يعنى حتعيد تدويره

 

ممدوح : نعم يا مثقفة سلبياتك وسكتنا لكن أيه دى كمان حتعيد تدويره دى

 

إلهام : بص من الأخر كده حتغير النشاط وانا حشاركها

فى النشاط الجديد وعاوزة فلوس منك علشان أشاركها

 

ممدوح : يا لهووى على ممدوح وسنينه وعلى الغلب اللى انا فيه

وكورونا وعيالك وكمان مشروع

يا إلهام

طب تعالالى بقى وانا حخلى يومك محصلش

 

إلهام : يا لهوووى يا أناااا يا عيال ألحقونى من ابوكم

 

بكرة حنعرف إلهام وممدوح عملوا ايه

أستنونى