أفتاكسات زوج صايم

 

 

الحلقة السابعة عشر

إلهام وممدوح

الإذان أدن وفطرنا أخر يوم فى رمضان و ٠٠٠٠٠

إلهام : كل سنة وأنتم طيبين حبايب قلبى وكل رمضان وأحنا بخير وربنا يخليك لنا يا دوحة ياروح قلبى

ممدوح : كل رمضان وأحنا طيبين يا حبايبى وأعيش وافتكس لكم ههههه

رهف وخالد :وانت طيب يابابا وأنتى طيبة يا ماما ربنا يخليكم لنا

إلهام : أما أدوق البيتفور الملون أفتاكستك يا دوحة أللى حتفضحنى بيه وسط أخواتى والمجتمع ههههههه

بيتفور أحمر وأخضر يا دوحة يا لهوووى

ممدوح : أيش فهمك أنتى فى الجديد فى السوق أنا متابع الجديد السنة دى وكله بالألوان يا حبيبتى

المهم دوقى كده وقوليلى رأيك

إلهام : أممممممم طعمه حلو يا حبى الأحمر يجنن أما أدوق الأخضر بقى

واوو يجنن والله تسلم الايادى يا حبى ( بس حقول للناس ايه لما أقدمه لهم )

ممدوح : بتكلمى نفسك يا حبى من الحلاوة ههههههه

إلهام : أه أه من الحلاوة ( ده أنا بفكر فى الأفتاكسة بتاعتك حقولهم أيه )

الحمد لله مفيش حد حيجلنا من كورونا وأسترت من عند ربنا

خالد : بابا حبيبى فين العيدية

رهف : وأناااا كمان يا حبيبى عاوزة العدية

ممدوح : عديات أيه هو فى حد حيخرج وبعدين أنا مش أدتكم فلوس اللبس

مفيش عديات هو أنا حلاقيها منين ولا منين كحك وبسكوت ورنجه وفسيخ ولبس

هى كلمة مفيش عديات ولا فى خروج من البيت

إلهام : يوووة يا ممدوح متعكننش على العيال فى العيد مجتش على العدية يا حبيبى

ممدوح : لأ بقى جات عليها

مفيش عديات وكلمة وقلتها وخلاص فى ليلتكم دى لأقلبها ضلمة عليكم فى ليلة العيد

رهف : إهئ إهئ إهئ عاوزة عدية مليش دعوة زى صحابى

خالد : وأنا كمان عاوز العدية يا بابا ليها مشروع عندى متكتك له

ممدوح : مشروع ايه يا أبو مشروع ده احنا محظورين كلنا يا حبيبى فى البيت ومفيش خروج من البيت

إلهام : يووووه يا ممدوح دايما أنت كده تبوظ اللحظات الحلوة وتنكد علينا

ما تديهم العيدية وأنا حعمل حسابى فى ميزانية الشهر الجديد حختصر من المصاريف وبالذات مصاريفهم

يعنى أعتبرها يا حبيبى سلفة من الشهر الجاى و٠٠٠

خالد : ماماااا سلفة ايه ياستى دى اللى حتخصميها الشهر الجاى دى

إلهام : ( غمزت بعينها ل خالد )

خلاص يا خالد أسمع الكلام وبعدين أنت بتخرج فين يعنى

خالد : ماشى يا بابا موافقين سلفة من الشهر الجاى مراعاة منا لظروف كورونا وغلو الأسعار

ممدوح : كده أستبينا ومش حنكد عليكم

نادى على رهف أختك وتعالوا خدوا العيدية

( الواحد لازم يكون حمش وكلمته متنزلش أبدآ)

إلهام : بتقول حاجة يا حبيبى

ممدوح : لا يا حبببتى ده أنا بنادى على الولاد

خد يا خالد عيديتك أهو 200 ج

مخصموين الشهر الجاى

خالد : خلاص يا بابا لازم تفكرنى وتنكد عليا

عموما كل سنة وأنت طيب يا حبيبى

ممدوح : رهف تعالى خدى عديتك يا حبيبة بابا

رهف : حبيبى يا بابا كل سنة وأنت معانا يا حبيبى

ممدوح : كل سنة وأنتم طيبين حبايب بابا

إلهام : يا سلام مفيش عيدية لكى يا إلهام على تعبك معانا طول رمضان ووقفتك فى المطبخ

كده يا ممدوح إهئ إهئ مش مسمحاك

ممدوح : أنتى الكل فى الكل يا روح ممدوح وعيديتك أهى مجهزها يا حبيبتى

إلهام : تسلملى يا حبيبى ربنا يخليك لنا وميحرمنا منك

ممدوح : ويخليكى ليا

بس إعملى حسابك مخصمومة برضه من مصروف الشهر الجااى

إلهام : نعم يا سى ممدوح بتقول أيه

بكرة نكمل ونشوف ممدوح وإلهام والعيدية والعيد

أستنونى