أفتاكسات زوج صايم

إيمان العادلى
الحلقة الخامسة عشر
إلهام وممدوح

الديلفرى جاب الطلبات والدقيق والسكر والبيض ونشوف

إلهام : رهف تعالى ساعدينى فى المطبخ علشان نخلص الكحك والبسكوت

رهف : حاضر يا ماما وسى خالد بقى موقعه ايه من المطبخ

خالد : انا حدور ماكينة البسكوت وحقطعه كله وحقطع البيتفور بالمكبس
الحاجات دى عاوزة رجالة زييا تستحمل ههههههه وكده حكون ساعدتكم النص بالنص

إلهام : يلا يا رهف أضربلى السمن والسكر بسرعة بالمضرب وضيفى البيض خلينا نخلص البسكوت

رهف : حاضررر يا ماما أهو شغالة شغل نار

ممدوح : ماشاء الله عليكم منورين المطبخ والله
مش حاسين انكم ناقصكم حاجة

رهف وإلهام : ناقصنا أيه ؟؟

ممدوح : أنا طبعآ ولمساتى اللولبية
فسحى كده يا رهف أنا اللى حساعد ماما وأكمل عجن البسكوت
هى قلبة واحدة منى والعجينة حتبقى فل الفل

إلهام : يالهوووى يا ممدوح
حتساعدنى يبقى تحت رعايتى وتعمل اللى حقوله
أستبينا يا دوحة

ممدوح : حاضر يا روحى من عنيا

إلهام : ضربت البيض والسمن والسكر كويس يلا ضيف عليهم اللبن والنشادر والدقيق وقلب يا حبى

ممدوح : اهو يا قلبى عجينة تجنن أهو تسلم إيديك يا دوحة يا خطير
( انا ححط شوية كاكاو سر كده من أسرارى على حبة عجين ويبقى بسكوت شوكلاته ولا عمايل الشيف حسن )

إلهام : بتقول حاجة يا ممدوح

ممدوح : لا لا يا حبيبتى مبقولش حاجة ده انا بنادى على خالد يجى يشغل الماكينة

خالد : انا أهوووو تحت النظر
وجاهز أهو

خالد ورهف قطعوا البسكوت كله ورهف سوته فى الفرن ونفذوا وعدهم وساعدونى وطلع جميل

ممدوح : رهف لما يتبقى ربع كمية العجين قوليلى أنا اللى حقطعه فى المكنة

رهف وخالد قايمين بالواجب وبيسوا البسكوت وأنا أنتهزت الوقت وعجنت الكحك كمان وسبته يخمر على ما البسكوت يخلص

رهف : بابا تعالى يلا ربع العجين أهو أللى قلتلى عليه

خالد : بابا أنت ناوى على أيه
بلاش أفتاكسات والنبى ل ماما تقلب العيد علينا

ممدوح : كده برضه يا خالد مش واثق فى إمكانيات بابا

رهف : من ناحية واثقين ف أحنا واثقين فى إمكانياتك وأفتكاستك ههههههه

خالد: ألحق يابابا أفتكس بسرعة قبل ماما ما تخلص الفون مع خالتو
بس ايه نتفق الأول

ممدوح : نتفق على ايه

خالد ورهف : لو الدنيا باظت أحنا مشفنكش ولا نعرف
ولو الدنيا حلوة كده وأفتاكستك نجحت يبقى النجاح لنا كلنا
أتفقنا يا سى بابا

ممدوح : أتفقنا يا ولاد إلهام
رهف هى ماما لسه بتتكلم فى الفون

رهف : أه بتتكلم مع خالتو سامية
وبيحكوا فى الفون عن الكحك والبسكوت وعمايل إيديها
وههههههه
وأنها سابت المطبخ أمانة فى إيدى أنا و خالد

ممدوح بقى ميقدرش يعيش من غير ما يفتكس
أفتكس ايه بقى حقولكم فورآ

ممدوح : رهف ناولنى بسرعة الكاكاو وحبة لبن صغيرين

رهف : أستر يارب
أنا مليش دعوة يا بابا بأختراعك
أدى اللبن والكاكاو اهو وأعمل اللى عاوزه بسرعة

خالد : يلا بسرعة يا بابا أخلص وأعجن بسرعة أنا مراقب ماما أهو لسه بتتكلم فى الفون

ممدوح عجن كاكاو مع حبة لبن وضافهم لعجينة البسكوت وبسرعة خالد قطع البسكوت ورهف دخلته الفرن بستوى مع الكحك

إلهام : رهف خلصتى البسكوت أنتى وخالد
ودخلتى الكحك فى الفرن يستوى

رهف: أيووة يا ماما بسوى الكحك اهو والبسكوت خلاص قرب يخلص يا حبيبتى
أستريحى أنتى شوية على ما أخلصهم ونعمل البيتفور يا حبيبتى
( أستر يارب لما ماما تشوف أفتاكسة بابا )

إلهام : ماشى يا حبيبتى بس اوعى البسكوت ولا الكحك يتلسعوا منك

رهف : حاضر يا ماما

الوقت عدى ورهف وخالد سوا الكحك والبسكوت وكمان بسكوت ممدوح بالشوكلاته
ألهام دخلت المطبخ تشوف الحاجات وهوب شافت بسكوت الشوكلاته

إلهام : يا لهوووووى أيه البسكوت ده أنا معملتوش
مممدددددوح ياااااا رهف
خااااااالد
تعالوا هنا كلكم

ممدوح ورهف وخالد : أيووووة يا ماما
ممدوح
فى أيه يا إلهام

إلهام : فى خيانة وأفتاكسات وحاجات بفلوس باظت ووعود وعدتها وخلفتها يا سى ممدوح

ممدوح : يوووة انتى كده بتزعقى علطول يا حبيبتى
طيب دوقى الأول وبعدين أحكمى

إلهام : مش حدوق ولا حنيل انا بتكلم على الموقف ككل و ٠٠٠٠٠

ممدوح : دوقى كده يا حبى بسكوتة مشكلطة من عمايل إديا

إلهام : أمممممم

رهف وخالد : ها أستر يارب

إلهام : الله يا دوحة يجنن يا حبيبى أول مرة تفتكس صح
كل سنة وأنت طيب يا حبيبى وتعيش وتفتكس لنا

بكرة العيد ونكمل مع إلهام وممدوح
أنتظرونى