مطلوب عروسة
إيمان العادلى
الحلقة الثامنة
وبعد العروسة أللى أبوها عاوز يديهالى بشنطة هدومها ويقولى سلو عيلتهم قال
طب سلو قلبى أللى متشحتف على عروسة يا نااااس أكمل بيها نص دينى
يلا يا حمادة ملهمش فى الطيب نصيب ومسيرى برضه ألاقى بنت الحلال
الحاجة أميمة : حمااادة تعالى يا حبيبى عاوزاك
حمادة : خير يا ماما
أوعى تقوليلى عروسة أنا عامل إضراب يجى شهرين كده مليش نفس أنا كمان يعنى أعمل أللى عاوزه
الحاجة أميمة : أتلهى يا واد على عينك قال إضراب قال عاوز تبقى عاق لأمك وتكسب غضبى عليك
حمادة : مال العقوق يا ماما والعروسة
الحاجة أميمة : أهو كده كله مرتبط ببعض المهم لاقيتلك عروسة
حمادة : تانى يا ماما تانى
مين دى أن شاء الله
الحاجة أميمة : عارف فاتن مرات خالك حمدى قالتلى عليها أم العروسة زميلتها فى البنك وناس محترمين ومستواهم المادى معقول والبنت ماشاء الله عليها رياضية ومتعينه فى وزارة الشباب والرياضة وعضوة فى نادى الجزيرة يعنى أنت وعيالك حتبقوا أعضاء فيه
هى بنت وحيدة على 4 صبيان ودلوعة أمها وأبوها والبت حلوة وبيضة وزى القمر
حمادة : خلاص يا ماما أللى تشوفيه قولى ل بابا يجهز ال300 ج بتوع التورته وحددى ميعاد
الحاجة أميمة : ابوك موافق وحددت ميعاد الخميس الجاى حنروح لهم
وعدى الوقت و٠٠٠٠٠٠٠
أبو العروسة: أهلا وسهلا شرفتونا والله
الحاج محمود: الشرف لنا يا دكتور والله معرفتكم وأن شاء الله يكون لنا نصيب معاكم
أم العروسة : يا أهلا بيكم نورتونا اهلا يا فاتن يا حبيبتى
أهلا بأم العريس أتفضلوا هنا فى الصالون
يا عصمت الحاجة السقعة للضيوف والجاتوه هنا فى الصالون
حمادة : الأمر مريح لحد دلوقتى والناس بصراحة محترمين أووى وناس ذوقهم راقى مع بساطه فى شقتهم بصراحة نسب يشرف يارب تطلع العروسة حلوة زى أخوها عصمت اللى قاعد معانا والله قعدته حلوة وأنا خدت عليه بس هو مسمسم حبتين مدى على حلاوة بنات أكيد العروسة حتبقى قمر زى أخوها أللى هرانى أسئلة ده
بشجع فريق أيه بحب أندرتيكر ولا لأ بجرى كام كيلو فى الساعة
مقاس صدرى كام سم
محسسنى أنى داخل شرطة مش رايح أتجوز و ٠٠٠٠٠٠
الحاجة أميمة : أيه يا فاتن مش حنشوف العروسة ولا أيه
لنا 3 ساعات يا حبيبتى وقربنا نقوم شوفى أمها وقوليلها تنادى عليها
فاتن : أسم الله عليكى يا أميمة ما العروسة قاعدة معانا أهى من ساعة ما جينا
الحاجة أميمة وحمادة : أيه بتقولى ايه هو عصمت العروسة
يا نهااار أزرق عصمت طلع أنثى متخفية فى ملابس راجل
وقعتك سودة يا فاتن معانا ده مقلب برضه تعمليه فينا ودى عروسة تجبيبها لأبنى
حمادة : انا خايف يا ماما من نظرات عصمت ليا والنبى نقوم نجرى من هنا إعملى أى أشارة ل بابا خليه يفك من هنا بسرعة قبل ما يكتفونى والأقينى متجوز واحد صاحبى
الحاجة أمال غمزت بعينها للحاج محمود زى ما متفقين على الإشارة و ٠٠٠٠٠٠٠
الحاج محمود : أحنا أتشرفنا بيكم يا دكتور والله نسب زى الفل أن شاء الله
أدونا فرصة كده نتشاور مع بعض ونشوف أمكانيتنا تسمح ولا لأ ونرد عليكم كمان يومين كده
مع السلامة يا دكتور مع السلامة يا عصمت يا أبنى
حمادة : أبنك ايه يا بابا عصمت هى العروسة يا لهووووووتى يلا نفك من هنا بسرعة يا بابا
الحاج محمود : أشهد أن لا اله الا الله
الحاجة أميمة : سبونى بقى محدش يحوشنى تعاليلى هنا يا فاتن والله ما سيباكى و٠٠٠٠٠٠
حمادة : أما أروح أخلص مرات خالى من إيدين ماما
أستنونى بكرة وحلقة جديدة
