مطلوب عروسة

 

 

إيمان العادلى

 

الحلقة السابعة

 

أنا حمادة التعيس قصدى العريس أللى كل يوم بدور على عروسة

وبالذات بعد بوسى ماراحت منى

قررت حعتزل الجواز وسنينه و ٠٠٠٠٠

 

الحاج محمود : حمادة تعالى عاوزك

يا حاجة تعالى لاقيت عروسة إنما ايه لحمادة نقاوة أبوك بقى

 

الحاجة أميمة : والنبى بصحيح يا حاج عروسة ل حمادة

 

حمادة : مليش نفس يا بابا مش عاوز أتجوز ولا عاوز أشوف عرايس تانى

 

الحاج محمود: دى شكل تانى غير أللى شفتهم قبل كده

وبعدين نقاوة أبوك وجربنى المرة دى وأنت تكسب

 

حمادة : ماشى يا بابا أنت غاوى تدفع ال 300 بتوع التورتة

 

الحاجة أميمة : وماله ما يدفع بس تتجوز يا نور عيونى

هى العروسة مين يا حاج ؟

 

الحاج محمود : عارفة أبن عمتى حسن جالى الشغل النهاردة كان عاوزنى أخلص له حاجة فى الضرايب والكلام جاب بعضه وعرفت أن تحيه أخته عندها بنت قمر وعلى وش جواز فخدت منه ميعاد الخميس الجاى ناس محترمين ومتدينين ونعرف أصلهم وفصلهم

 

حمادة : على بركة الله

 

وعدى الوقت وهوبه

 

الحاجة أميمة : مشوارهم بعيد أوى ربنا يجعل فى العروسة القبول

 

أبو العروسة: أهلا أهلا حاج محمود وأ أحمد والحاجة أميمة وحسن كمان منورنا والله لو أعرف أن بنتى ياسمين السبب فى جيتكم دى كنت خطبت أنا أحمد لها ههههه و شورتها وبعتها لحد عندكم

 

الحاج محمود : كلك واجب يا حاج ومنور بيكم

 

أم العروسة : منورة يا أميمة وشرفتونا أنتى وأحمد ربنا يجعلك من نصيب بنتى يارب

 

حمادة : هما ناس طيبين وكرماء وولاد أصول وتقريبا أنا مرتاح لهم وبعدين قرايبنا بقى وزيتنا فى دقيقنا والعروسة كمان أسمها حلو يارب تطلع حلوة زى أسمها وتتفك عقدتك يا حمادة و ٠٠٠٠٠٠

 

الحاجة أميمة: مش حتنادوا العروسة بقى تسلم علينا ولا أيه هههههه

 

أم العروسة : لأ ازاى ودى تيجى ده حتى ياسمين بتسأل على خالها الحاج محمود من زمان

تعالى يا ياسمين متتكسفيش

 

الحاجة أميمة : ماشاء الله عليكى قمر يا عروسة أبنى

 

حمادة : أيوة يا ماما دى قمر بجد وبيضة كمان ورفيعة معقول كل شروطى ألاقيها مرة واحدة أحمدك يارب

أنا موافق خلاص إرتحت لها

يلا يا بابا خش على التقيل بقى البت عجبتنى وشكلى حبيتها

 

الحاج محمود: على خيرة الله ياحاج نستنى الرد من حضرتك يومين كده إن شاء الله

 

حمادة : يومين أيه يا بابا ما بنته مبسوطة أهيه والسكوت علامة الرضا خش فى الموضوع يا بابا

 

ابو العروسة : يومين ليه يا حاج الواد أبننا والعروسة بنتنا ونتفق ونحدد الفاتحة امتى والخطوبة والجواز

 

حمادة : أنا مش مصدق نفسى معقولة الجوازة ماشية كده بسهولة

سرك باتع يا بابا

خلاص حتتجوز يا حمادة وحتبقى عريس أحمدك يارب

 

الحاج محمود: طبعا يا حاج ولادك أمال ايه

نتكلم فى الطلبات والشبكة والجهاز بقى

أحنا شقتنا جاهزة ومتشطبة والفرح عليا فى أفخم قاعة هدية للعرايس والجهاز التقيل علينا والخفيف عليكم أو شوفوا عاوزين تجهزوا أيه مع المطبخ و٠٠٠٠٠٠٠

 

أبو العروسة : شوف يا حاج محمود أنا مديكم بنتى ودى أغلى حاجة عندى وجوازها وجهازها زى أخواتها البنات بالظبط و ٠٠٠٠٠

 

الحاج محمود : ابن أصول يا حاج فعلا وياسمين فى عينينا

أتفضل قول طلباتك

 

ابو العروسة : معنديش طلبات غير زى الناس شقة وعفش كويس وبنتى تختاره من أحسن محلات الموبليا والأجهزة الكهربا والستاير والتنجيد وكل ما يخص المطبخ لازم بنتى وأمها يختاروه بنفسهم

اما الشبكة دى هدية من العريس للعروسة وقيمته بقى هههههه يجيب اللى يجيبه

 

الحاج محمود : معهلش مش فاهم يا حاج لمؤاخذة يعنى أيه يختاروه هو أنتم مش حتجيبوا حاجة فى الجهاز معانا للبنت علشان نعرف برضه

 

ابو العروسة : أه يا حاج محمود كده أنت مسألتش كويس عليا ولا على سلونا فى الجواز ولا عرفت جوازات أخواتها البنات

 

الحاج محمود : لأ مسألتش فى المسائل دى الصراحة و ٠٠٠٠٠

 

ابو العروسة : انا حديكم العروسة بشنطة هدومها زى أخواتها تمام

هو أنا حديكم بنتى وحجهزها كمان تيجى أزاى دى هههههه

 

حمادة : أستنى أنت يا بابا سيبلى الطلعة دى

ما كده كده الجوازة باظت

بص ياحاج ما أنت كمان حتاخد أبنهم وحتاخد شقة وحتكتبنى قايمة بجهاز أنا جبته بعرق جبينى

و شبكة كمان وفرح فى أجدع قاعة علشان تتبسط أنت وقرايبك

وحفضل عمرى كله أأكل وألبس فى بنتك

ليه أن شاء الله هو أنا طالب إيد السفيرة عزيزة ولا بنت بارم ديله و ٠٠٠٠

 

الحاج محمود : بس يا حمادة يلا بينا

شكرا يا حاج مفيش نصيب وبنتك تستاهل حد أحسن من أبنى

 

حمادة: مشتنا ليه يا بابا سبنى عليه الراجل ده أعرفه غلطه

 

الحاجة أميمة : إلهى يطفحوا التورتة البعدا

 

حمادة : يقطع الجواز وسنينه

خلصت الحكاية وأستنونى بكرة

وحلقة جديدة