مطلوب عروسة
الحلقة الخامسة
إيمان العادلى
بعد حكايتى مع البت البلحة المئمعة أستغفر الله العظيم نويت والنية لله أخد أجازة من موضوع الجواز ده وأعيش بكل أريحية حياة العزوبية كشاب جميل كده زييا ودمه خفيف و ٠٠٠٠٠٠٠
الحاجة أميمة : حمادة بقولك يا حبيبى سحر بنت خالتك كلمتنى النهاردة وجبتلك عروسة
حمادة : عروسة تانى يا ماما
لأ مش عاوز أنا واخد هدنة
الحاجة أميمة : هدنة فى عينك جرى أيه يا واد عاوز تحرمنى من حقى يبقى لى أحفاد وأفرح بيهم
عاوز تبقى ولد عاق إهئ إهئ
حمادة : خلاص يا ماما متعيطيش مين العروسة دى
الحاجة أميمة : دى بنت صاحبتها سناء أللى شغالة معاها فى الشغل بتقول البنت قمر وعيلتها ناس طيبين من توبنا يعنى وأمها ست زييا كده وأبوها مدير ضرايب و ٠٠٠٠٠
حمادة :خلاص يا ماما توكلى على الله وحددى ميعاد
وبعد رحلة ال300 ج من الحاج والتورتة بتاعة كل مرة روحنا بيت العروسة
أبو العروسة : اهلا وسهلا نورتوتا والله وشرفتونا
أم العروسة : اهلا بيكم
نورتى يا سحر أتفضلوا بيتكم ومطرحكم
حمادة : الله البيت مريح أووى ناس شبهنا أوى
شكلى أرتحت لهم الناس دول
حتى ريحة البيت شبه ريحة بيتنا والست أمها لبسها شبه لبس أمى
ونفس الحوار برضه بتاعها
يارب بقى تكون العروسة حلوة وأخلص من موضوع الجواز ده
ده انا يارب بتوع الجاتوه حفظونى
وصعبان عليهم و ٠٠٠٠٠
الحاجة أميمة : أمال أيه يا سحر مش حنشوف عروستنا ولا أيه
سحر : أيه يا سناء فين عروستنا أمال
أم العروسة : مى تعالى يا حبيبتى سلمى على عريسك تعالى متتكسفيش
حمادة : وأسمها مى كمان يا خواتى على الأسم أكييد صاحبته موزة ورقيقة زيه كده
لا وأيه أمها بتقولها عريسك كمان ده فال حلو أوووى و هوبه العروسة دخلت و ٠٠٠٠
وأيه ده مين دول يا سحر إنطقى بقولك
سحر : أييييه العروسة
مسمسة وزى القمر أهى وقلبها أبيض زى القشطة
حمادة : وانا مالى ومال وشها دلوقتى دى عروسة ميكروباص دى تطلعلها 200 ك
يا لهوك يا حمادة إلحقينى يا ماما
الحاجة أميمة : أممممم ماشاء الله جميلة يا مى ربنا يبارك
حمادة : ماشاء الله ايه يا ماما خايفة عليها تتحسد
إحسديها يمكن تخس ولا أقولك دى عاوزة تتسيح مينفعش فيها خسسان دى شكلها مخلفة يجى 100 عيل وممكن تاكل 100 تانى زيهم يا لهوك يا حمادة دى لو أتخانقت معايا تخبطنى كف يجيلى فيه تخلف عقلى واللى زى دى ميخلفش أطفال لأ ده يخلف وحوش صغيرة بتاكل الاخضر واليابس وممكن تاكلنى كمان
أيه ده أيه الصوت ده يا ماما مين بيشخر وهو قاعد هنا
يا لهوك يا حمادة ده صوت نفس مى وهى قاعدة ما بالك لو نايمة بقى
الحاج محمود : أحنا أتشرفنا بيكم والله وان شاء الله حنكلمكم تليفون يومين تلاته كده
الحاجة أميمة : قول سنتين تلاتة يا خويا يلا يا واد افلت بجلدك
وأنتى يا سحر حسابك بعدين
يا خسارة التورتاية
حمادة : مع السلامة يا عمى
وبعد شوية
حمادة : انا كنت فى كابوس صح أنا مشفتش دول أللى أسمهم مى يا ماما
انا خايف يا ماما إهئ إهئ
الحاجة أميمة : كده يا سحر ده مقلب تعمليه فينا وفى ابن خالتك
عاوزة تعقديه من الجواز
سحر : والله يا خالتى البنت طيبة اوى وغلبانة وست بيت ممتازة
هو وزنها زيادة حبتين
ممكن حمادة يحلف عليها تعمل رجيم
الحاجة أميمة : وأبوها محلفش عليها ليه
حمادة أبنى السفيف ده حيقدر عليها دى بغلة يا أختى دى بتشخر وهى صاحية
إخص عليكى يا سحر إخص
حمادة : ماما أناا خايف يا ماما
خلى بابا يعمل لرقم أبوها بلوك
خبونى منها
مش عاوز أتجوز خلاص
عاوز افوق من المهزله دى
انا عاوز أعيش
انا مضايق جدا علشان البنت الصراحه انا شايفها مظلومه و ضحيه.
ضحية بنت خالتى وأمها اللى عرضوها للموقف الزفت ده و ضحية العقليات اللى حبستها فى المطبخ وبس
مين مسؤل عن نفسية البنت دى إن عريس شافها وجرى ومرجعش تانى
استنونى بكرة وحلقة جديدة
يجب عليك تسجيل الدخول لكتابة تعليق.