مطلوب عروسة

---

 

 

إيمان العادلى

 

الحلقة الثانية

 

أنا حمادة العريس

لاقيت واحد صاحبى ( أسامة ) بيكلمنى و بيقولى على عروسة من بلد جنب بلدنا و ٠٠٠

 

أسامة : بص يا سيدى جبتلك عروسة لقطة وأبوها راجل متريش وعنده أراضى وبلدهم جنب بلدك

 

حمادة : ايوة متريش ايه أنا يهمنى العروسة يا أبنى شكلها وتعليمها و قوامها برضه والبياض عندى أهم حاجة أنا أتنازل عن أى حاجة ألا البياض

 

أسامة: بياض ايه وزفت ايه بقولك أبوها عنده 5 فدادين

 

حمادة : ايوة يعنى اقطاعى ولا أيه

بلاش ياعم الجوازة دى

ده أقله حيقولى عاوز فدان شبكة لبنته أنا عارف تفكير الناس دى

.

أسامة : يووه يا حمادةالحاجات دى مقدور عليها لما تتفقوا مع بعض والدنيا تمشى المهم البنت جميله و متعلمه و فلاحين بقى يعنى هتاكل فطير وحمام وبط و مش و عسل و طبيخ على حق بالسمنه البلدى بدل اكل المطاعم المقرف بالسمن الصناعى

 

حمادة : أيوة والبنت تقولى صباح النور يا تاج راسى ولما أخرج تقولى البيت كان وحش من غيرك وتفضل تمشى ورايا وانا خارج وتدعيلى تروح وترجع بالسلامة يا سى حمادة

 

بلغت أسامة بالموافقه و فرحت طبعا حكيت لابويا و امى و اخواتى وكالعادة أبويا منحنى ال 300ج منحة التورتة و نشوف ٠٠٠٠

 

أبو العروسة : شرفتوتا ونورتونا يا حاج محمود وأحمد مفيش غبار عليه بس والله مش حينفع أخلى العريس يشوف العروسة ولا أديكم كلمة دلوقتى ألا بعد شهرين فى شوية حاجات كده حعملها الأول وبعدين تيجوا وتشوفوا بعض

 

الحاج محمود: شهرين ليه يعنى

عموما اللى يعمله ربنا يا حاج سلامو عليكم

 

وبعد شوية وقت

 

حمادة :رد غريب الصراحه يا بابا حاجات أيه دى أللى تمنعنى أشوف العروسة غير بعد شهرين أمال وافق نزوره ليه من الأول

حضرتك أزاى تقوله كده وتقوله اللى يعمله ربنا

أكيد فى سر فى الموضوع

مفيش غير البت أميرة أختى أللى حتعرف السر ده

 

وبعد شوية

 

أميرة : حمادة جبتلك السر المتين من بنات صحابى فى بلدهم

 

حمادة : إشجينى يلا وقولى

 

أميرة : بص يا سيدى هو قالك بعد شهرين علشان مستنى شباب بلدهم أللى شغال فى الخليج ينزلوا اجازة ويمكن واحد متريش منهم يخطب بنته و٠٠٠٠

 

حمادة : يعنى الراجل الواطى حاططنى ( استبن) يعنى لو مفيش شاب خطبها من بتوع الخليح اهو الستبن موجود

نبقى نبعتله ييجى يدفع و يمضى و يشيل.

 

الصراحة أنا حسيت بالغيظ و الغضب من الراجل الواطى ده ولازم أدبه وأعرفه مقامه هما ولاد الناس لعبه ولا لعبه

 

الحاج محمود: بص يا حمادة يا أبنى راجل بالتفكير ده مينسبناش ولا ينفع معانا لا بعد يومين ولا شهرين فكك من الجوازة دى

 

الحاجة أميمة :بص يا حمادة أنا لو طلت زمارة الراجل ده حقطمها نصين أنا حخطط لهم نفرسهم أزاى

وبعدين ولا يهمك يا حبيبى حقوم أعملك صينية بقلاوة بالمكسرات ولاتزعل أبدآ و بكره هجوزك ست ستها المعصعصه المعرقبه دى

 

و عدوا الشهرين و ٠٠٠٠٠

 

أسامة: ألو يا حمادة الراجل أبو العروسة كلمنى ومنتظرك تزروهم يوم الخميس الجاى وتشوف العروسة

 

حمادة : هو لسه فاكر عمومآ أدينى رقمه

 

وبعد شويه

 

سلامو عليكو يا حاج ازيك و ازى الصحه

 

ابو العروسة : الحمد لله ايه احمد أستنيتك تتصل ومتصلتش يعنى ولا حس ولاخبر

تكونش العروسة معجبتكش ولا أيه

 

حمادة : انا انتظرت حضرتك كتير وحضرتك اللى مسألتش

 

ابو العروسة: معلش بقى اصلنا كنا بنجدد البيت وبنشترى حاجات جديدة علشان تليق بيك هههههه

 

حمادة : طيب يا حاج الف مبروك و عتبه سعيده ان شاء الله

 

ابو العروسة : انا بلغت أ أسامة اننا منتظرينكو على الخميس الجاى تنورنا أنت والحاج والحاجة

 

حمادة: معهلش بقى بعتذر عن الزيارة يا حاج أصلى عقبال بنتك كده امى جابتلى عروسه بنت ناس

 

الرجل: ٠٠٠٠٠٠٠٠٠٠٠

حمادة : الله انت سكت ليه يا حاج مش هتقولى مبروك انت لازم تشرفنى فى الفرح طبعا اصل العروسه عقبالك املتك ابوها لواء فى الشرطة وأخوها ظابط مهندس وأمها ٠٠٠٠٠٠

الله الراجل قفل السكة فى وشى

 

لقيت نفسى بتصل بيه تانى وأقوله اصلى فرحتى بالعروسه نستنى اقولك على مكان القاعه اللى هعمل فيها الفرح و ٠٠٠٠٠٠

 

راح الراجل شتمنى ومهزئنى أما راجل غريب صحيح عاملنى أستبن ولما خدت حقى منه زعل

أما أنه راجل قليل الادب

 

يلا هو كده الجواز

 

أستنونى الحلقة الجاية