مطلوب عروسة

 

 

إيمان العادلى

 

الحلقة السابعة عشر

 

الظاهر يا حمادة مش باينلك جواز ليه كده يا مصر مال بناتك مش عاجبهم العجب ولا حمادة عجبهم

هأ على رأى أبويا نسأل الله التساهيل و ٠٠٠٠٠٠

 

الحاج محمود : حمادة يا أبنى أنا حاسس بيك وعارف أنك زعلان علشان متوفقناش فى عروسة لدلوقتى لكن كل شئ بأوانه ومن الأخر كده أنا لاقيتلك عروسة بنت ناس ومن توبنا ولا حتقول سوليتر ولا تخييم

 

حمادة : تانى يا بابا أنا مش عاوز عرايس ولا عاوز أتجوز ولا زعلان أنا عاوزة فترة افصل فيها وأريح شوية يمكن اعرف أختار

 

الحاج محمود : حترتاح لما تخطب صدقنى يا أبنى وبالك حيروق

أنا المرة دى جبتلك عروسة كويسه وحلوة عارف عمتك عطيات تبقى العروسة بنت سلفتها فى البلد ناس كويسين هما 5 بنات ومتعلمين تعليم عالى والعروسة خريجة كليه تجارة وانا خدت منهم ميعاد حنروح الخميس الجاى علشان تعمل حسابك

 

حمادة :مش خلاص خدت ميعاد يعنى حقول أيه غير ماشى يا بابا أللى تشوفه ومين حيجيب التورتة المرة دى

 

الحاج محمود : أناااا اللى حجيبها على مزاجى

 

وهوبه ٠٠٠٠٠

 

حمادة: رن أنت يا بابا على الباب المرة دى خلى النحس يتفك

 

ابو العروسة: مرحب مرحب حاج محمود وحاجة أميمة وعريسنا

والحاجة عطيات كمان يا مرحب بيكم نورتونا

 

الحاج محمود : نوركم والله ياحاج حسن

 

أم العروسة: اهلا بحبايبنا منورين الناحية كلها والله

 

الحاجة أميمة: نورك يا حبيبتى ونور الحاج حسن ونور عروستنا الحلوة

 

حمادة : ها المكان مريح أوى وريحته جميلة فيها عبق الماضى والناس الطيبة المريحة اللى بطبيعتهم اللى لا بتوع ألماظ ولا تخييم ولا حقوق أنسان

يارب العروسة تطلع حلوة وتكمل فرحتى

 

الحاجة أميمة: ما تقوليلهم يا عطيات نشوف العروسة خلينا نلحق نرجع القاهرة الليل حيليل علينا

 

عطيات : فين العروسة يا حاجة سامية جهزتيها تطلع لنا ولا أيه

 

أم العروسة : تعالى يا الأء سلمى يا حبيبتى على الضيوف

 

الحاجة أميمة : ماشاء الله تبارك الله ربنا يحميك يا حبيبتى

 

حمادة : العروسة حلوة وبيضة الحمد لله يارب تكون بتعرف تتكلم و٠٠٠٠٠

 

بعد شوية والعروسة أتكلمت هى وحمادة والحمد لله حصل وفاق وراحة بينهم والناس أتبسطوا وأخيرا حمادة لقى نصه التانى و ٠٠٠٠٠

 

الحاج محمود : كده يا حاج حسن الدنيا ماشية وممكن نتفق على الخطوبة ونشوف طلباتكم وربنا يتمم على خير

 

ابو العروسة : ملناش طلبات احنا بنشترى راجل وبنشترى أصل ونسب يشرف

أحنا إن شاء الله حنجهز المطبخ من مجميعه والشبكة دى قيمة العريس يجيب أللى يجيبه ويختارها هو بمعرفته كمان والقايمة والمؤخر زى ما انتم عاوزين وانا أجهزها وأجبها لحد عندك يا حاج محمود

 

الحاج محمود : أدى الكلام أللى يريح من ناس ولاد أصول زيكم يا حاج

يبقى نقرأ الفاتحة لو مش ممانع النهاردة والخميس الجاى نلبس الدبل والشبكة على بركة الله

 

الحاجة أميمة : لولولى مبروك يا حمادة ربنا يتمم على خير يا ابنى

 

وعدى الأسبوع وحمادة مش مصدق انه حيخطب ويلبس دبلة خلاص وليل نهار بيحلم ب الأء عروسته و٠٠٠٠٠٠

 

الحاجة أميمة : الف مبروك يا سامية تفرحى بولادها يارب

مبروك يا حمادة حتبقى عريس رسمى وتلبس الشبكة يا حبيبى

 

حمادة : أنا مش مصدق يا ماما أنى خلصت من موال العروسة ده

شغلوا يا جماعة اغنية حتجوز وياولاد بلدنا يوم الخميس عاوز أحس أنى عريس و ٠٠٠٠٠

 

الحاجة أميمة : فين يا سامية العروسة نادى عليها يا حبيبتى هى وأخواتها تلبس الشبكة والدبلة ونفرح بالولاد ونهيص كده ونفرح

 

ابو العروسة: قبل الشبكة والهيصة انا أشتريت راجل لبنتى وأكيد حمادة كمان أشترى نسب وأصل وناس طيببن زينا وأنا كلمتى واحدة مرجعش فيها فى أى أتفاق قلته وأنت يا حمادة ايه

 

حمادة : كلمتى واحدة يا عمو طبعا ومرجعش فيها أبدا ونسب حضرتك يشرفنى طبعا وأنا رضيت بيه

 

أبو العروسة : على خيرة الله توكلنا عليه نادى على العروسة يا حاجة

 

ام العروسة: تعالى يا الأء سلمى على عريسك

 

حمادة : ايه ده مين دى

مش دى العروسة اللى انا شفتها مين دى

هو فى ايه يا جماعة

 

أم العروسة : سلامة الشوف يا أبنى ماهى دى مالك أمال

 

حمادة: لأ مش دى التانية كانت بيضة وحلوة ودى سمرة ومش حلوة يعنى أنا متأكد من عنيا ولا ايه يا ماما ما تشوفى اللى بيحصل

 

الحاجة أميمة : أيوة مش دى العروسة هو أنتم بدلتوها ولا أيه

ايه شغل القرن الماضى ده والكلام الفاضى ده يا سامية

عاوزة تلبسى أبنى فى واحدة تانية

احنا عاوزين الاء اللى شوفناها مش دى

 

أم العروسة : هى دى الأء وهى دى اللى عليها الدور تتجوز فى أخواتها أنتم بينكم مكنتوش مركزين وقتها

 

حمادة : استنى يا ماما حرد انا بقى

احنا كنا مركزين اوى على فكرة أنتم اللى خدعتونا وورتونا واحدة غير العروسة وده أسمه خداع وغش على فكرة وأنا رافضه ورافض العروسة ورافضكم

 

ابو العروسة : ترفضه كيف يعنى أنت قريت فاتحة معاى وكلمتك مبترجعش فيها كلام رجالة وفيها دبح رقاب دى وبتى لك وحتلبس الشبكة دلوقتى

 

الحاج محمود : يعنى ايه دبح رقاب هو بالعافية ولا ايه ولا هو أرهاب يعنى وتدبيسه وخلاص أنا أبنى مش حيتجوز دى ولا حيلبسها حتى كلبشات مش شبكة

حيتجوز اللى شافها أيآ كان أسمها

موافق ولا لأ

 

ابو العروسة : لأ مموافقش وحيتجوز ألاء ومعنديش حكى تانى هى أللى الدور عليها

 

حمادة : يبقى مفيش جواز وانا راجل وكلمتى واحدة مش غشاش ولا محتال وأنت كده بتظلم بناتك باللى بتعمله سيب كل عريس يجى يشوف اللى عاوزاها من غير تحايل

يا حاج كل حد وله جماله وكل فولة ولها كيال

 

الحاج محمود : سلامو عليكم يا حاج وربنا يسعد بناتك

يلا يا حمادة. يلا يا حاجة

وأنتى يا عطيات أستنى دورك معايا

 

وخلاص باظت الخطوبة

وأستنونى بكرة وحلقة جديدة